काठमाडौं - प्रिमियर लिगमा चेल्सीका नयाँ प्रशिक्षक फ्रान्क लामपार्डले स्टामफर्ड ब्रिजको मैदानमा भएको खेलमा प्रशिक्षण गर्नु आफ्नो सपना भएको बताएका थिए। तर, लिसेस्टरसँगको खेलमा १-१ को बराबरीले उनको सपनामा भने कमजोर बनेको छ।
चेल्सीले खेलको सातौँ मिनेटमा नै २० वर्षे मिडफिल्डर मासन मोन्टको गोलबाट अग्रता बनाएको थियो। तर ६७ औँ मिनेटमा एनडिडीले गोल गर्दै लिसेस्टरलाई बराबरीमा ल्याए। दोस्रो हाफमा लिसेस्टर बलियो देखिएको भए पनि थप गोल भने हुन सकेन।
लिगमा दुई खेल सकिँदा लिसेस्टर र चेल्सी दुवै जितविहीन छन्। दुवै खेल बराबरी गरेको लिसेस्टरको दुई अंक छ भने एक खेल हारेर एक बराबरी गरेको चेल्सी एक अंकसहित १५ औँ स्थानमा छ।
‘यो एकदमै ठूलो अनुभव हो। चेल्सीमा फर्कनु र टिमलाई स्टामफर्ड ब्रिजमा प्रशिक्षण दिन पाउनु खुसीको कुरा हो’ लामपार्डले भनेका छन्,
‘हामीले आज खेलेको भन्दा राम्रो खेल खेल्न सक्छौँ, समर्थनका लागि सबै समर्थकलाई धन्यबाद हामी अझ राम्रो हुने नै छौँ।’
पहिलो खेलमा म्यानचेस्टर युनाइटेडसँग ४-० ले हारे पनि लिसेस्टरसँगको खेलमा लामपार्डलाई दर्शकले हुटिङमार्फत स्वागत गरेका थिए। उनीहरु ‘वेलकम होम सुपर फ्रान्क’ लेखिएका ब्यानर बोकिरहेका देखिन्थे। ‘सुपर फ्रान्क लामपार्ड’ बोलमा दर्शकहरु गीतसमेत गाइरहेका थिए। १३ वर्ष आफूले खेलाडीका रुपमा सामेल भएको क्लबमा प्रशिक्षकको रुपमा आउन पाउँदा लामपार्ड पनि संयमित देखिएका थिए।
‘अहिले लिगको सुरुवाती अवस्थामा नै छौँ, हामीले धैर्य गरेर अगाडि बढ्नुपर्छ, त्यसका लागि अझ मेहनत त गर्न नै छ’ लामपार्डले भनेका छन्, ‘केही अवसरको सदुपयोग हुन सकेको भए खेल हाम्रो पक्षमा नै हुन्थ्यो तर त्यस्तो हुन सकेन, यसैले हामीले गोलमा केन्द्रित भएर खेल्नुपर्ने छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775018854.png)
