काठमाडौं– नेपालका युवा स्पिनर सन्दीप लामिछाने इन्डियन प्रिमियर लिग (आइपिएल) मा आबद्ध हुने पहिलो नेपाली खेलाडी बनेका छन्। सन्दीपलाई आइतबार भएको अक्सनमा दिल्ली डेयर डेभिल्सले २० लाख भारु (३२ लाख रुपैयाँ) मा किनेको हो।
५ सय ७८ जनाको अक्सन सूचीमा सन्दीप २ सय ७८ नम्बरमा थिए। सन्दीप एसोसिएट क्याटागोरीबाट आइपिएलमा आबद्ध भएका हुन्।
यसअघि शक्ति गौचनले राजस्थान रोयल्समा ट्रायल दिए पनि छनोट हुन असफल भएका थिए।
यसअघि सन्दीप पाकिस्तान सुपर लिग (पिएसएल) र बंगलादेशको घरेलु लिगको ड्राफ्टमा परे पनि अक्सनबाट टिममा छनोट हुन असफल भएका थिए।
पहिलो चरणमा घोषणा गरिएका ११ सय खेलाडीको सूचीमा भने सन्दीप थिएनन्। तर, सन्दीप लगायत ९ खेलाडीलाई फ्रेन्चाइज टिमको विशेष आग्रहमा राखिएको थियो। सन्दीपको नाम आइपिएलको अक्सन सूचीमा राख्न नेपाल क्रिकेट संघ (क्यान) की पूर्व सिइओ भावना घिमिरले विशेष पहल गरेकी थिइन्। घिमिरेले भारतीय क्रिकेट कन्ट्रोल बोर्ड र आइपिएल व्यवस्थापन कम्पनी इन्टरनेसनल म्यानेजमेन्ट ग्रुपमा कुरा गरेपछि सन्दीपको नाम अक्सन सूचीमा राखिएको थियो।
भावनाको पहलपछि अक्सन सूचीमा परेका सन्दीपका लागि आइपिएल टिम राजस्थान रोयल्सका पूर्व प्रशिक्षक मोन्टी देसाईले पनि कुरा अघि बढाएको स्रोतले दाबी गरेको छ। अहिले पनि देसाई राजस्थान रोयल्सको व्यवस्थापनसँग नजिक छन्। देसाईले सन्दीपको आइपिएलमा पर्ने सम्भावना बलियो भएको बताउँदै सकारात्मक प्रतिक्रिया दिएको बुझिएको छ।
देसाईले तीन महिनाअघि नेपालको यू–१९ टिमको कन्सल्ट्यान्ट प्रशिक्षक भएर काम गरेका थिए। त्यस क्रममा उनले सन्दीपको खेल नजिकबाट नियालेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
