बेनी - म्याग्दीको बेनी नगरपालिका–३ भकिम्लीमा समुदायले निर्माण गरिरहेको स्थानीय जयन्ती माविको भवनलाई साउदी अरबबाट १ लाख रुपैयाँभन्दा बढीको आर्थिक सहयोग प्राप्त भएको छ।
विद्यालयका भूपू विद्यार्थी एवम् आर्थिक संकलन अभियानका साउदी अरब संयोजक मनबहादुर क्षत्रीले साउदी अरबमा रहेका नेपालीबाट संकलन गरेको १ लाख ११ हजार ५५ रुपैयाँ शनिबार विद्यालयलाई हस्तान्तरण गरेका हुन्।
भकिम्लीमा समुदाय र दाताको सहयोगमा ३० कोठे पक्की विद्यालय भवन निर्माण भइरहेको छ। विद्यालय भवन निर्माणका लागि हालसम्म करिब १ करोड ८० लाख रुपैयाँभन्दा बढी खर्च भइसकेको विद्यालयका प्रधानाध्यापक रामबहादुर पुनले जानकारी दिए।
सदरमुकाम नजिक रहेर पनि सरकारी निकायबाट उपेक्षामा परेको विद्यालयलाई विपन्न परिवारले जनश्रमदान र अन्नबाली बेचेर भवन निर्माणमा सहयोग गरेका प्रधानाध्यापक पुनले बताए।
निर्माणाधीन अवस्थामा रहेको भवनलाई जिल्ला शिक्षा कार्यालयबाट १९ लाख ५० हजार रुपैयाँ सहयोग भए पनि बाँकी सबै रकम चन्दा संकलन गरि जुटाइएको विद्यालय व्यवस्थापन समितिले जनाएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766919412.png)
-1764146706.png)
-1766648928.png)
