बागलुङ– बागलुङ २ बाट प्रतिनिधिसभामा निर्वाचित सांसद एवं माओवादी केन्द्रका नेता देवेन्द्र पौडेलले आफ्नै कार्यकर्ताको हातबाट पिटाइ खाएका छन्। पौडेलसँगै क्षेत्र नम्बर २ प्रदेशसभा (ख) का सांसद तथा राष्ट्रिय जनमोर्चाका नेता टेकबहादुर घर्तीमगर पनि कुटिएका छन्।
ढोरपाटन नगरपालिका–१ बुर्तिबाङ बजारस्थित मिराज होटलमा बसेका दुवै सांसदमाथि माओवादीका जिल्ला नेता तुल्सीराम अर्यालले हातपात गरेको प्रत्यक्षदर्शीले बताएका छन्। अर्यालले दुई सांसदसँगै पौडेलका अंगरक्षकलाई समेत हात हालेका थिए।
‘होटलमा पौडेललाई दुई झापड हानेपछि अर्यालले धारामा मुख धुँदै गरेका घर्तीमगरलाई पनि हातपात गरे। छुट्याउन गएका पौडेलका अंगरक्षक पनि अर्यालको निसानामा परे। तर, दुवै सांसदले अर्याललाई हात फर्काएनन्,’ एक प्रत्यक्षदर्शीले भने।
बिहीबार दिउँसो निसीखोलामा दुवैजना सांसदको उपस्थितिमा कार्यक्रम भएको थियो। त्यो कार्यक्रमबारे कुनै जानकारी नगराएकोमा आवेशमा अर्यालले हातपात गरेको स्थानीय बताउँछन्। अर्यालले सांसदमाथि हातपात गरेको स्वीकार गरेका छन्।
वाम गठबन्धनबाट उम्मेदवार बनेका पौडेल र घर्ती मगरलाई जिताउन अर्याल सक्रियतापूर्वक लागेका थिए। आफैंले जिताएका सांसदले आफ्नै ठाउँमा कार्यक्रम गर्दा कुनै खबर र समन्वय नगरेको भन्दै आक्रोशित भएका अर्यालले हातपात गरेका हुन्।
अर्यालले यिनीहरुलाई जिताउनका लागि हामी चाहिने, अरु बेला वास्ता नगर्ने भन्दै हातपात गरेको प्रत्यक्षदर्शी बताउँछन्। आफूले कुटाई खाएको स्वीकार गरे पनि पौडेलले यो ठूलो विषय नभएको बताएका छन्। उनले भने, ‘होटलमा बसिरहेका बेला तुल्सीजीले मदिरा लगाउनु भएको थियो।’ सांसद पौडेल शुक्रबार नै बागलुङ सदरमुकाम फर्किसकेका छन्।
माओवादी केन्द्रमा जिल्लाकै प्रभावशाली छवि बनाएका अर्याल २०७० सालको चुनावमा उम्मेदवार थिए। तर, उनी थोरै मात्र मतले पराजित भएका थिए। यो पल्टको चुनावमा उनकै क्षेत्रमा पौडेलले टिकट पाएका कारण अर्याल उम्मेदवार बन्न पाएका थिएनन्।
पार्टी छाडेर नयाँ शक्तिमा लागेको र पछि फेरि माओवादीमा फर्केर पनि पौडेलले नै टिकट पाएकोमा अर्याल असन्तुष्ट थिए। असन्तुष्ट रहँदारहँदै पनि अर्याल वाम गठबन्धनका उम्मेदवारलाई जिताउन लागिपरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
