नेपालगन्ज– खाद्य संस्थानले कर्णालीको उत्पादन सिमी, फापर र मास खरिद गरेर सहरी क्षेत्रमा पुर्याउने कार्यक्रम व्यवस्थानको लापरबाहीका कारण अपलत्र परेको छ।
कर्णालीबाट खरिद गरिएका उत्पादन सिमी, फापर र मासजस्ता पौष्टिक र अर्कानिक खाद्यान्न बजारीकरण नहुँदा संस्थानको काठमाडौं थापाथलीस्थित गोदाममा २ वर्षदेखि थन्किएको छ।
तराईका जिल्लाबाट चामल खरिद गरी सरकारी अनुदानमा ढुवानी गरेर कर्णालीका दुर्गम जिल्लामा पुर्याउने र कर्णालीको उत्पादन खरिद गरेर सहरी क्षेत्रमा पुर्याई बिक्री गर्ने कार्यक्रम सुन्दा जति लोकप्रिय लागे पनि संस्थानको लापरबाहीले गोदाममा ९ सय क्विन्टल सिमी र ७ सय क्विन्टल फापर थन्किएको छ।
आर्थिक वर्ष २०७१/०७२ देखि चामल पुर्याउने ट्रकले कर्णालीको सिमी र फापर ल्याएर फर्कने गरी सो कार्यक्रम सुरु गरिएको थियो।
आफैंले उत्पादन गरेको सिमी र फापर खाद्यको डिपोमा लगेर बेच्न र त्यही पैसाले चामल किनेर ल्याउन सहज होस् भनेर कर्णालीमा अनुदानको चामल पुर्याउँदा स्थानीय बासिन्दाको उत्पादनलाई राम्रो मूल्य दिएर किन्ने कार्यक्रम सुरु गरिएको थियो।
आफैंले उत्पादन गरेको सिमी र फापरले राम्रो बजार भाउ नपाउने समस्याका कारण पछिल्ला वर्ष कर्णालीका बासिन्दाले खेतबारीमा उत्पादन हुने सिमी, फापर र भटमासको खेती गर्न छाडेका थिए। स्थानीयले उत्पादन नगर्ने तर सधैं चामलका लागि हारगुहार गर्ने प्रवृत्ति बढ्दै गएपछि संस्थानले चामल दिने र सिमी, फापर किन्ने कार्यक्रम सुरु गरेको हो।
कर्णालीमा १ सय १० रुपैयाँ प्रतिकेजी पर्ने सिमी काठमाडौंमा प्रतिकेजी १ सय ५० र प्रतिकेजी ८० रुपैयाँ पर्ने फापर काठमाडौंमा ९० रुपैयाँ प्रतिकेजीमा बिक्री गर्ने उद्देश्यले संस्थानले मूल्य निर्धारण गरेको थियो। यद्यपि संस्थानले कर्णालीको उत्पादन बिक्रीका लागि पहल नगर्दा फापर र सिमी २ वर्षदेखि गोदाममै छ।
संस्थानका महाप्रवन्धक कुमारप्रसाद दाहालले भने, ‘कर्णालीबाट सिमी र फापर खरिद गरेर काठमाडौं पुर्याइयो, तर काठमाडौं लगेर कसरी बिक्री गर्ने भन्ने योजना र रणनीति नहुँदा गोदाममै थन्किएको छ।’
सिमी र फापर बिक्रीका लागि पत्रिकामा सूचना निकाल्दा समेत बिक्री नभएपछि मूल्य घटाएर भए पनि खुद्रा बिक्रीका लागि आकर्षक प्याकिङ र ब्रान्डिङ गरेर कर्णालीको कोसेलीका रुपमा बिक्री गर्ने योजना बनाएको महाप्रबन्धक दाहालले बताए।
काठमाडौंमा थन्किएको सिमी, फापर बिक्री गरेर यस वर्ष पनि करिब ६ सय ३० क्विन्टल सिमी र फापर कर्णालीका हुम्ला, जुम्ला, कालीकोट, मुगुबाट खरिद गर्ने लक्ष्य राखिएको उनले बताए।
यो वर्ष संस्थानले कालीकोटबाट १ सय क्विन्टल सिमी र ३० क्विन्टल फापर, हुम्लाबाट ५० क्विन्टल सिमी, मुगुबाट १ सय क्विन्टल सिमी र ३० क्विन्टल फापर र मास खरिद गर्न लागेको छ।
त्यसैगरी, जुम्लाबाट १ सय क्विन्टल सिमी र ३० क्विन्टल फापर तथा दैलेखबाट १ सय ४० क्विन्टल भटमास खरिद गर्न लागिएको संस्थानले जनाएको छ।
संस्थानका कर्मचारीले हुम्लामा दुई केजी चामल बराबर एक केजी सिमी खरिद गर्न सकिने व्यवस्थापनसँग प्रस्ताव गरेका छन्।
यस वर्ष सिमी, फापर र भटमासजस्ता कर्णालीका उत्पादनको नमूनाको गुणस्तर विभागबाट जाँच गरेपछि मात्र खरिद सुरु गर्ने तयारी भइरहेको संस्थाले जनाएको छ।
संस्थानले यो वर्ष मुगुमा प्रतिकेजी १ सय ४० रुपैयाँका दरमा सिमी र ८० रुपैयाँका दरले फापर र १ सय ४५ रुपैयाँ प्रतिकेजीका दरले मास खरिद गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766919412.png)
-1764146706.png)
-1766648928.png)
