बाग्लुङ- नेपाल टेलिकम बाग्लुङ कार्यालयले दुई महिनाको अवधिमा २२ लाख रुपैयाँ बक्यौता रकम असुल गरेको छ ।
धवलागिरिका बाग्लुङ, पर्वत, म्याग्दी र मुस्ताङका ग्राहकबाट सो रकम असुल गरेको हो। अझै ४० लाख रुपैयाँ बक्यौता ग्राहकबाट उठाउन बाँकी रहेको कार्यालयका लेखा प्रमुख दिनेश न्यौपानेले जानकारी दिए।
'पाँच सयभन्दा बढी ग्राहकले पुरानो बक्यौता तिर्न बाँकी छ', उनले भने, 'ठूलो रकम भएका एक सयभन्दा बढी ग्राहकले बक्यौता बुझाएका छन्।'
टेलिकम कार्यालयले २०७२ साल असार मसान्तसम्मको बक्यौतामा जरिवाना छुट दिएपछि तिर्नेको संख्या बढेको छ। कार्यालयले यस वर्षलाई पुरानो बक्यौता उठाउने वर्षको रुपमा लिएको छ। छुटको घोषणा नहुँदै बाग्लुङ कार्यालयले बक्यौता रकम उठाउन अभियान थालेको थियो। धवलागिरि क्षेत्रमा २०५८ सालदेखि ग्राहकले बक्यौता तिर्न बाँकी रहेको कार्यालय प्रमुख केशव शर्माले बताए।
रकम नतिर्नेमा ठूला व्यवसायी, दलका नेता र प्रतिष्ठित् व्यक्ति समेत छन्। कार्यालयले पत्राचार गर्नेदेखि सार्वजनिक सूचना जारी गरेर ग्राहकलाई बक्यौता रकम तिर्न आग्रह गर्दैआएको छ।
'वर्षौं अघिदेखिका ग्राहक पत्ता लगाएर ताकेता गरिरहेका छौं', शर्माले भने। कतिपय सरकारी कार्यालय, संस्थान र परियोजनाले बक्यौता रकम तिर्न बाँकी छ।
एउटाको नाममा रहेको टेलिफोनको प्रयोगकर्ता अर्कै रहेका कारण बक्यौता उठाउन समस्या हुने गरेको कार्यालयले जनाएको छ। माघ मसान्तसम्म जरिवाना छुटको व्यवस्था गरेकोले बक्यौता तिर्नेको संख्या बढ्ने देखिएको छ।
नेपाल टेलिकमले ल्यान्डलाइन फोनमा ‘क्रेडिट लिमिट’ प्रणाली अपनाएकाले अबदेखि ग्राहकको नाममा बक्यौता रकम नरहने कार्यालय प्रमुख शर्माले बताए। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
