काठमाडौं– माघ अन्तिम सातादेखि नामिबियामा हुने आइसिसी विश्व क्रिकेट लिग डिभिजन–२ का लागि घोषणा गरिएको नेपाली राष्ट्रिय टिममा रोहितकुमार पौडेलले पहिलो पटक स्थान बनाएका छन्। यू–१९ टिमका मध्यक्रमका ब्याट्सम्यान रोहितसहित यू–१९ टिमका ४ खेलाडीले सिनियर टिममा समावेश छन्।
टिममा रहेका बहुमत खेलाडीसँग नामिबियाको कन्डिसनबारे अनुभव छ। टिममा सन् २०१५ मा नामिबियामै भएको डिभिजन–२ खेलेका ८ जना खेलाडी छन्। बिहीबार घोषणा गरिएको १४ सदस्यीय टिममा कप्तान पारस खड्कासहित उपकप्तान ज्ञानेन्द्र मल्ल, शरद भेषावकर, बसन्त रेग्मी, शक्ति गौचन, आरिफ शेख, सोमपाल कामी र करण केसीले तीन वर्षअघि पनि डिभिजन–२ खेलेका थिए।
६ खेलाडीसँग भने नामिबियाको अनुभव छैन। जसमा दिलिप नाथ, ललितसिंह भण्डारी, दीपेन्द्रसिंह ऐरी, सन्दीप लामिछाने, अनिलकुमार साह र रोहित कुमार पौडैल पहिलो पटक नामिबियामा खेल्दैछन्। दीपेन्द्र, सन्दीप, अनिल र रोहित यू–१९ टिमका खेलाडी हुन्।
३ वर्षअघि विनोद भन्डारी, अमृत भट्टराई, नरेश बुढाऐर, भुवन कार्की, सुवास खकुरेल र सागर पुनले डिभिजन–२ खेलेका थिए। विनोद र सागर डिभिजन–२ का लागि घोषणा गरिएको प्रारम्भिक टिमबाट बाहिरिएका थिए। अमृत, भुवन र सुवास भने पछिल्लो ३ वर्षदेखि टिममा पर्न सकेका थिएनन्। नरेश डिभिजन–२ को प्रारम्भिक टिममा परेपनि अन्तिम टिममा भने पर्न सकेनन्।
३ वर्षअघि नामिबियामा नरेश र सुवासले ओपनिङ गरेका थिए। यसपटक ज्ञानेन्द्र र दिलीप नाथले ओपनिङ गर्नेछन्। दिलिपलाई विकेटकिपरको पनि जिम्मेवारी हुनेछ। गत संस्करणको डिभिजन–२ मा विनोद भन्डारीले किपिङ गरेका थिए। सोमपाल र करणले तीब्र गतिको बलिङमा निरन्तरता पाउँदा अमृतको स्थानमा ललितसिंह भण्डारी आएका छन्।
यो पनि – डिभिजन–२ का लागि नेपाली टिमको घरेलु भूमिमा अन्तिम अभ्यास (तस्बिरहरु)
तीन वर्षअघि प्राप्त अनुभवले टिमको प्रदर्शनमा सकारात्मक प्रभाव पर्ने कप्तान पारसले नेपाल लाइभसँग बताए। 'हामीले डिभिजन–२ हुने तीन वटै मैदानमा खेलिसकेका छौं। तीन वटै फरक–फरक कन्डिसन भएका मैदान हुन्। त्यहाँ नखेलेका खेलाडीलाई मैदानबारे जानकारी दिएका छौं,' पारसले भने, 'कुनै मैदानमा एक्ट्रा बाउन्स हुनसक्छ भने कुनै मैदान फ्ल्याट छ। त्यसैले हामीले अनुभव एक आपसमा सेयर गरेका छौ। पहिलाको अनुभव अनुसार योजना बनाएर मैदानमा उतार्न सक्यौ भने राम्रो हुन्छ।'
गत संस्करणको पहिलो खेलमा नेपालले युगान्डासँग खेलेको थियो। खेलमा नेपाल २ रनले पराजित भएको थियो। पहिले ब्याटिङ गरेको युगान्डा १ सय ४६ मा अलआउट भयो। बलिङमा नेपालका सोमपालले ३ विकेट लिँदा करणले विकेट लिन सकेका थिएनन्। कप्तान पारसले ३ विकेट लिएका थिए भने बसन्तले २ र शक्तिले १ विकेट लिएका थिए। ब्याटिङमा तेस्रो नम्बरमा खेलेका ज्ञानेन्द्रले सबैभन्दा बढी ५४ रनले जोडेका थिए। ओपनिङमा सुवासले ३२ र बुढारले १६ रन जोडेपनि अन्यले राम्रो खेल्न नसक्दा नेपाल १ सय ४६ मा अलआउट भयो। यसपटक पनि करण र सोमपाल नेपाली टिममा छन्। तर ओपनिङका ज्ञानेन्द्र मल्ल र दिलीप नाथ हुनेछन्।
दोस्रो खेलमा नेपालले नेदरल्यान्ड्सलाई २ विकेटले हराएको थियो। पहिले ब्याटिङ गरेको नेदरल्यान्ड्स १ सय ५८ मा अलआउट भएको थियो। बलिङमा नेपालका सोमपाल, शक्ति, पारस र बसन्तले २–२ विकेट लिएका थिए। करणले विकेट लिन सकेका थिएनन्। नेपालले ८ विकेट गुमाएर लक्ष्य पार गरेको थियो। विनोद भन्डारीले ३५ रन र शरदले नटआउट २४ रन जोडेपछि नेपालले ३ बल बाँकी छदा लक्ष्य पारेको थियो । सोमपालले पनि २४ रनको योगदान दिएका थिए।
तेस्रो खेलमा नेपालले क्यानडालाई ७ विकेटले हराएको थियो। पहिले ब्याटिङ गरेको क्यानडा १ सय १४ मा अलआउट भएको थियो। खेलमा करण केसीले ५ विकेट लिएका थिए। सोमपालले २ विकेट लिँदा पारस, शक्ति र सागरले १–१ हात पारेका थिए । नेपालले २३.१ ओभरमा ३ विकेटको क्षतिमा लक्ष्य पार गरेको थियो। पारसले नटआउट ७७ तथा ज्ञानेन्द्रले ३२ रन जोड्दा ओपनरद्वय सुवास र नरेश शून्य रनमा आउट भएका थिए।
चौथो खेल नामिबियालाई ३ विकेट हराएको थियो। पहिले ब्याटिङ गरेको नामिबिया १ सय ४२ मा अलआउट भयो। बलिङमा सोमपालले २ विकेट लिँदा करणले ३ विकेट लिएका थिए। बसन्त र शक्तिले पनि २–२ विकेट हात पारेका थिए। ब्याटिङमा पारसले ६४ रन, ज्ञानेन्द्रले ३१ रन र विनोदले १८ रन जोडेका थिए। अन्यले दोहोरो अंकमा रन जोड्न नसकेपनि नेपालले ३७.५ ओभरमा ७ विकेट गुमाएर लक्ष्य पार गरेको थियो। खेलमा आरिफ शेखले डेब्यु गरेका थिए। तर उनी १ रनमा आउट भएका थिए।
पाँचौ खेलमा नेपाल केन्यासँग ५ विकेटले पराजित भएको थियो। पहिले ब्याटिङ गरेको नेपाल १ सय ९४ रनमा अलआउट भएको थियो। ज्ञानेन्द्र मल्लले ९१ रन जोडेका थिए। केन्याले ५ विकेटको क्षतिमा लक्ष्य पार गरेको थियो। बलिङमा नेपालका करण, बसन्त र सागर पुनले १–१ विकेट लिएका थिए।
गत संस्करणको डिभिजिन–२ मा नेपालका लागि ज्ञानेन्द्र मल्लले सर्वाधिक २ सय ३६ रन जोडेका थिए। उनी प्रतियोगिताका सर्वाधिक रन बनाउने खेलाडीको तेस्रो स्थानमा थिए। नेपालका लागि बढी विकेट लिने खेलाडी भने सोमपाल कामी थिए। सोमपालले ६ खेलमा ११ विकेट लिएका थिए। उनी प्रतियोगिताको बढी विकेट लिने खेलाडीको पाँचौ स्थानमा थिए।
अन्तिम खेलमा केन्यासँग पराजित भएपछि लिगमा नेपाल तेस्रो भएको थियो। नामिबिया पहिलो र नेदरल्यान्ड्स दोस्रो भएको थियो। तेस्रो स्थानको लागि भएको खेलमा भने केन्यासँग १५ रनले हारेपछि नेपाल चौथो स्थानमा सीमित बनेको थियो। चौथो बनेपछि नेपालले डब्लुसिएल च्याम्पियनसिपका लागि छनोट भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
