नयाँ दिल्ली- सात दशकदेखि पाइरहेको विशेष स्वायतत्तासहितको अधिकार जम्मू काश्मीरबाट खोसेको ४ दिनपछि बिहीबार भारतीय प्रधानमन्त्री नरेन्द्र मोदीले राष्ट्रका नाममा सम्बोधन गरे। करिब ३८ मिनेटको सम्बोधनमा मोदीले आफ्ना धेरै शब्द मूलतः विशेष अधिकारबाट मुक्त पारिएका काश्मीरीलाई फकाउनमा खर्च गरे।
संविधानको धारा ३७० खारेज गर्ने आफ्नो कदमलाई मोदीले नयाँ युगको सुरुवातको रुपमा अर्थ्याएका छन्। त्यस क्रममा उनले काश्मीर र काश्मीरीको सुन्दरतामा धेरै शब्द खर्चिएर उनीहरुको मन जित्ने प्रयत्न गरे।
केन्द्र शासित हुन गइरहेको जम्मू काश्मीर र नयाँ प्रान्त बनेको लद्दाखका अब सुनौलो दिन सुरु हुने उनको दाबी छ। आफूले अब जम्मू काश्मीरको विकासलाई प्राथमिकता दिने र त्यसको खाका छिट्दै ल्याउने भन्दै आश्वस्त पार्न खोजे।
जम्मू काश्मीर र लद्दाख सुन्दरतामा आलौकिक भएको बताएका उनले अब आफूले बलिउडका कलाकारलाई फिल्म छायांकनका लागि जम्मू काश्मीर र लद्दाखमा जान आग्रह गर्ने बताए। जम्मू काश्मीर र लद्दाख बहुमूल्य जडीबुटीको खानी रहेको भन्दै त्यसलाई विश्वबजारमा निर्यात गरेर त्यहाँ समृद्धि ल्याउने भन्दै मोदीले आश्वसान दिए।
सम्बोधनको भिडियो-
४ दिनदेखि सञ्चारबाट विमुख भएको काश्मीर र लद्दाखमा सधैं त्यस्तो माहोल नहुने भन्दै उनले इदका लागि सबैलाई शुभकामना पनि दिएका छन्। त्यहाँ लागेको कर्फ्यु पनि इदलाई ख्याल गरेर शुक्रबारदेखि केही खुकुलो बनाइने उनको भनाइ थियो।
उनले काश्मीरबाहिर रहेकाहरुलाई इद मनाउन घर आउने वातावरण सहज बनाउका लागि सरकारले सकेजतिको कोसिस गर्ने आश्वासन दिएर काश्मीरीको मन जित्ने प्रयास गरे।
केही दिनदेखि भोग्नुपरेको कर्फ्युका बाबजुद पनि काश्मीरी जनताले धैर्य देखाएर त्यहाँ द्वन्द्व भड्काउन चाहनेलाई जवाफ दिएको दाबी गरेका मोदीले त्यसलाई आफ्नो कदममा काश्मीरी जनताको अनुमोदनका रुपमा व्याख्या गरेका छन्।
धेरैको अनुमान मोदीले आफ्नो सम्बोधनका क्रममा पाकिस्तानविरुद्ध कडा आक्रोश पोख्नेछन् भन्ने पूर्वमानुमान गरेका थिए तर उनले त्यसो गरेनन्। सम्बोधनका क्रममा उनले पाकिस्तनको नाम केवल एक पटक मात्रै लिए।
संसदमा आफ्नो कदमविरुद्ध खडा भएका विपक्षी कांग्रेस आई र अन्य केही दलप्रति पहिले भन्दा उनी निकै नरम रुपमा प्रस्तुत भए। उनीहरुप्रति उनले खासै आलोचनका शब्द प्रयोग गरेनन्। उल्टै संसदमा आफूले सरकारको प्रस्ताव पक्षमा कसले मतदान गर्यो र कसले विपक्षमा गर्यो भन्ने कुराको पछि नलाग्ने भन्दै सबैलाई एकजुट हुन आह्वान गरे।
सम्बोधनका क्रममा मोदीले भारतीय सेनाप्रति प्रशंसाका शब्द खर्चिएर सेनालाई पनि खुसी राख्न प्रयत्न गरे। काश्मीरमा खटिएका सेनाको प्रशंसा गर्दै उनले विगतमा सेनाका जवानले पाएका पदकको चर्चासमेत गरे।
काश्मीर मामिलामा एकजुट हुन देशवासीलाई आह्वान गरेका मोदीले यसमा सार्वजनिक रुपमा अन्तर्राष्ट्रिय समुदायको साथ खोजेनन्।
यसबाट उनले मुख्यगरी दुई सन्देश दिन खोजेको देखियो।
पहिलो- भित्रभित्रै आफ्नो कदममा अन्तर्राष्ट्रिय साथका लागि कूटनीतिक पहल गरेका मोदीले सार्वजनिक रुपमा अन्तर्राष्ट्रिय समुदायको साथ नखोजेर काश्मीर आफ्नो विशुद्ध आन्तरिक मामिला भएको सन्देश दिए।
दोस्रो- काश्मीर मामिला ‘डिल’ गर्न आफू सक्षम भएको र यसमा कुनै बाह्य मध्यस्थता वा सहयोगको आवश्यकता नभएको पनि स्पष्ट पारे। (तस्बिर : indiatoday)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791822485.png)
-1786602170.png)
