काठमाडौं- महिन्द्राका प्यासेन्जर कारको नेपालका लागि आधिकारिक बिक्रेता अग्नि इनपर्कोरेटेडले यो वर्षको नाडा अटो शोमा मुख्य गरी दुई मोडल एक्यूभी–३०० र मराजोलाई प्राथमिकता दिने भएको छ।
गत फागुनमा भएको महिन्द्राको एकल सवारी प्रदर्शनी ‘महिन्द्रा उदयमा’मा अग्नि इनकर्पोरेटेडले महिन्द्रा एक्सयूभी–३०० र मराजो शो गरेको थियो। एक्सयूभी कम्प्याक्ट एसयूभी हो भने मरोजो मल्टी युटिलिटी भेहिकल (एमपिभी)।
महिन्द्रा एक्सयूभी ३०० दक्षिण कोरियाको अटोमोबाइल कम्पनी स्याङयोङसँगको सहकार्यमा निर्माण भएको कम्पनीको पहिलो एसयूभी हो। स्याङयोङ टिभोलीको एक्स १०० प्लाटफर्ममा निर्माण भएको एक्सयूभी ३०० मा समावेश थुप्रै विशेषता स्याङयोङ टिभोलीबाट लिइएको छ।
एक्सयूभी ३०० मा उपलब्ध १.२ लिटर पेट्रोल इन्जिनले ५ हजार आरपिएममा ११० पिएस पावरका साथै ३५ सय आरपिएममा २०० एनएम–टर्क उत्पादन गर्छ।
साथै, १.५ लिटर डिजेल इन्जिनले ३७५० आरपिएममा ११५ पिएस पावरका साथै १५ सय २५ सय आरपिएममा ३०० एनएम–टर्क उत्पादन गर्छ। यसको इन्जिनमा ६ स्पिड एमटी ट्रान्समिसन दिइएको छ। पेट्रोल भेरियन्टको एक्सयूभी ३०० ले प्रतिलिटर १७ किलोमिटर माइलेज दिन्छ।
महिन्द्रा एक्सयूभी–३०० डब्लू–८ (अप्सनल) मा एयरब्याग, लेदर–अप होल–स्ट्री, अटो डिमिङ आइआरभिएम, टायर प्रेसर मोनिटरिङ सिस्टम, फ्रन्ट पार्किङ सेन्सर, १७ इन्च आलोय ह्वील, इलेक्ट्रिक सनरुफ, सिल्भर–कलर रुफरेल लगायतका विशेषता दिइएको छ।
महिन्द्राको अर्को मोडल मराजो पनि नाडा अटो शो २०१९ मा आकर्षणको रुपमा रहने छ। यसको डिजाइन सार्क माछाबाट प्रेरित भएको र कारको केही भागहरू सिकारी माछाको रुपमा डिजाइन गरिएको कम्पनीले दाबी गरेको छ।
मराजोका सबै भेरिएन्टमा एबिएस र इबिडी तथा ब्रेक असिष्ट, दुई एयरब्याग तथा चाइल्ड सिटलगायतका सुरक्षा विशेषता रहेको छ। महिन्द्रा मराजोमा नयाँ १.५ लिटर ४ सिलिन्डर डिजेल इन्जिन छ। यसले १२१ एचपी पावर र ३०० एनएम–टर्क प्रदान गर्छ। म्यानुअल ट्रान्समिसनको साथमा उपलब्ध रहेको छ।
यी दुई सवारीका साथै महिन्द्राका अन्य सवारीसमेत नाडा अटो शोमा प्रदर्शनीमा राखिने अग्नि इनकर्पोरेटेडका मार्केटिङ म्यानेजर सिजन न्यौपानेले बताए। मुख्य गरी एक्यूभी–३०० र मराजोलाई प्राथमिकता दिएर अन्य सवारीलाई पनि अटो शोमा उतार्ने योजनाका साथ कम्पनीले तयारी गरिरहेको उनको भनाइ छ।
नाडा अटो शो काठमाडौंको भृकुटीमण्डपमा भदौ १० देखि आयोजना हुँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
