काबुल- तालिबान लडाकूहरुको आक्रमणमा परी अफगानिस्तानमा बुधबार कम्तीमा १४ जनाको मृत्यु भएको छ।
स्थानीय अधिकारीहरुका अनुसार शान्ति सम्झौताको प्रयास भइरहेका बेला भएको घटनामा अन्य १ सय ४५ जना घाइते भएका छन्। राजधानी काबुलदेखि पश्चिमतर्फ रहेको प्रहरी कार्यालय परिसरमा स्थानीय समयअनुसार बुधबार बिहान ९ बजे विस्फोट गराइएको थियो।
विस्फोटपछि प्रहरी कार्यालय क्षेत्रमा कालो धूवाँ फैलिएको स्थानीय प्रत्यक्षदर्शीहरुले जानकारी दिएका छन्।
अफगानिस्तानको गृह मन्त्रालयले तालिबान विद्रोहीहरुले कार बम विस्फोट गराएको जनाएको छ। तर, तालिबान लडाकुहरुले भने लामो ट्रक बम विस्फोट गराएको दाबी गरेका छन्।
तालिबान लडाकूहरुको दाबीको गृह मन्त्रालयले खण्डन गरे पनि अन्य अफगान अधिकारीहरुले भने स्वीकार गरेका छन्। सामाजिक सञ्जालहरुमा पनि घटनासम्बन्धी फोटोहरु फैलिएका छन्। ती फोटोहरुमा ठूलो क्षति भएको देखिएको छ।
अफगानी अधिकारीहरुका अनुसार मृत्यु हुनेमा कम्तीमा १० जना सर्वसाधारण र ४ जना प्रहरी रहेका छन्।
घटनामा परी घाइते भएका १४५ जनामध्ये ९२ जना सर्वसाधारण रहेको अधिकारीहरुले बताएका छन्। रासस/एएफपी
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।