जनकपुर- देश संघीयतामा गइसके पनि स्थानीय तहमा देखापर्ने विवाद साम्य हुन सकेका छैनन्। जनप्रतिनिधिमाथि लाग्ने विभिन्न आरोपले पनि कामकारबाहीले गति लिन नसकेका थुप्रै उदाहरण छन्। कतिपय ठाउँमा मेयर र उपमेयरका विवाद पनि सतहमा आइसकेका छन्। जनकपुरको एक नगरपालिकामा त यतिसम्म भयो कि दुवैको विवादले उग्र रुप लिँदा झडपकै अवस्था सिर्जना भयो। उपमेयरसहित ६ जना स्थानीय घाइते भए।
कार्यालय कहाँ राख्ने भन्ने मुख्य विवादमा हंसपुर नगरपालिकामा मंगलबार झडपको अवस्था सिर्जना भएको हो। यहाँका मेयर रामज्ञान मण्डल र उपमेयर रेणु झाले छुट्टाछुट्टै कार्यालय सञ्चालन गर्दै आएका छन्। स्थानीय तह निर्वाचनको केही दिनपछि नै मेयर-उपमेयरबीच विवाद सुरु भयो। जबकि उनीहरु दुवै राजपाबाट नै निर्वाचित जनप्रतिनिधि हुन्।
मेयर मण्डलले हंसपुरको बेल्ही चोकमा कार्यालय सञ्चालन गरेका छन् भने उपमेयर झा बघचौडास्थित साबिकको कार्यालयमा बसेर कार्य सम्पादन गर्दै आइरहेकी छिन्। कार्यालय बेल्ही चोकमा लगिए पनि मेयरले बोर्डमा भने बघचौडा नै लेखेका छन्।
उपमेयर झा पनि बघचौडा टोलवासी नै हुन्। मेयर र उपमेयर छुट्टाछुट्टै कार्यालय खोलेर बसेपछि सेवाग्राही भने अन्योलमा परेका छन्।
उपमेयर झा मेयरले नियमविपरीत साबिक बघचौडामा रहेको कार्यालय सारेको आरोप लगाउँदै आएकी छिन्। तर मेयर मान्ने पक्षमा छैनन्।
‘मेयरले चोरेर कार्यालय सार्यो,’ उपमेयर झाले भनिन्, ‘कानुनत: भएको भए राति किन लानुपर्यो? दिउँसै सारे भइहाल्थ्यो नि?’ मेयरले तानाशाही लाद्न खोजेको उनको आरोप छ।
मेयर मण्डलले भने आफूहरुले सेवाग्राहीको सुविधालाई ध्यानमा राखेर बेल्ही चोकमा कार्यालय सञ्चालन गरेको प्रतिक्रिया दिए। साबिकको कार्यालयमा ठाउँ अपुग भएपछि बेल्ही चोकमा कार्यालय सार्नुपरेको उनको भनाइ छ।
.jpg)
उपमेयरले चलाएको कार्यालयबेल्हीमा सारिएको कार्यालयको साइनबोर्डमा बघचौडा किन लेखेको भन्ने प्रश्नमा उनले भने, ‘नगरपालिकाको केन्द्र हामीले सारेका होइनौं। केन्द्र अझै बघचौडा नै छ। तर सेवाग्राहीलाई कठिनाइ भएकोले यहाँ कार्यालयमात्र सञ्चालन गरेका हौं।’
उपमेयर झा साबिककै कार्यालयमा बस्दै आइरहे पनि नगरपालिकाका सम्पूर्ण कर्मचारी भने नयाँ सारिएको कार्यालयमा बसेर काम गर्दै आइरहेका छन्।
मेयर मण्डलको निर्देशनमा सबै कर्मचारी बेल्ही चोकमा सारिएको कार्यालयमा बस्ने गरेको उपमेयर झाको आरोप छ। ‘बघचौडामा कार्यालय हुँदा मेयरलाई मनोमानी गर्न समस्या थियो। त्यसैले कानुन मिचेर अन्यत्र कार्यालय सारेका हुन,’ उपमेयर झाले आरोप लगाइन्।
विवादले उग्ररुप लिँदा कुटाकुट
मेयर र उपमेयरबीचको विवादले उग्ररुप लिँदा मंगलबार कुटाकुटसम्मको अवस्था सिर्जना भयो। स्थितिलाई नियन्त्रणमा लिन प्रहरीले लाठी चार्जका साथै अश्रुग्यास नै प्रहार गर्नुपरेको थियो।
मेयर मण्डलले प्रहरीको सहयोगमा आफ्ना पक्षधरका हंसपुर र कठपुलाका केही स्थानीयलाई पठाएर उपमेयरले सञ्चालन गर्दै आएको कार्यालयबाट कार्यालय सम्बन्धी कागजात नियन्त्रणमा लिन खोजेका थिए। तर उनी सफल हुन सकेनन्। उपमेयर झा पक्षधरका बघचौडाको स्थानीयले प्रतिकार गर्न खोज्दा दुवै पक्षबीच झडपको अवस्था सुरु भयो। त्यस क्रममा मेयर मण्डल पक्षधरसँगै आएका प्रहरीले लाठी चार्ज गर्दा उपमेयर झा र वडाध्यक्षसहित आधा दर्जनभन्दा बढी घाइते भए।
मेयर मण्डलले दुई वटा ट्र्याक्टरमा करिब ५ दर्जन व्यक्तिलाई उपमेयरको कार्यालय पठाएका थिए। झडपको क्रममा प्रहरीले ४ राउन्ड आश्रुग्यास र हवाई फायरसमेत गरेको थियो।
लाठी चार्जबाट उपमेयर झा, वडा नं २ बघचौडाका अध्यक्ष उदय साह, तपेश्वर मण्डल, फेकन कापर, झाका सवारी चालक पुण्य खत्री लगायत आधा दर्जनभन्दा बढी घाइते भए। उनीहरुको स्थानीय स्वास्थ्य चौकीमा उपचार भइरहेको छ भने तपेश्वर मण्डलको अवस्था गम्भीर रहेकाले उनलाई जनकपुर अञ्चल अस्पताल पठाइएको छ।
स्थानीयका अनुसार कार्यालयको ताला मेयर पक्षधरका व्यक्तिले फुटाउन खोज्दा झडप सुरु भएको हो। मेयरका मान्छे चढेर आएको ट्रयाक्टर भने नियन्त्रणमा लिइएको घाइते फेकन कापरले बताए। 'झडप साम्य भइसकेको थियो तर दुईजना स्थानीयलाई प्रहरीले नियन्त्रणमा लिएपछि स्थिति तनावपूर्ण बन्यो,' उनले भने।
मेयरले चलाएको कार्यालयआफूहरु सुरक्षाका लागि आएको तर स्थानीयले उल्टै आफूहरुमाथि जाई लागेपछि स्थितिलाई नियन्त्रणमा लिन लाठी चार्ज गर्नुपरेको प्रहरीको भनाइ छ।
साँझ प्रहरी नियन्त्रणमा रहेका स्थानीय चन्दर साह र दिनेश साहलाई मुक्त गर्ने र स्थानीयले ट्याक्टर फिर्ता गर्ने सहमति भएपछि विवाद साम्य भएको थियो।
प्रहरी र लठैतको सहारा लिई कार्यालय लुट्न खोजे : उपमेयर
मेयर मण्डललाई कार्यालय सम्बन्धी विवादका लागि वार्ताबाट समाधान खोज्न पटकपटक आग्रह गर्दै आएका छौं। तर उनले मानेनन्। अहिले आएर बेल्ही प्रहरी चौकीका इन्चार्ज रामकुमार साहको सहयोगमा दर्जंनौ प्रहरी र लठैत लगाएर मेरो कार्यालय लुट्न आए। सोही क्रममा स्थानीयले अवरोध गर्न खोज्दा झडप भयो र सो क्रममा प्रहरीले आधा दर्जनभन्दा बढीलाई कुटपिट गरी घाइते बनाए।
यसअघि मेयर मण्डलले रामा होटलमा भएको वार्तामा मलाई पैसाको प्रलोभन दिएर खरिद गर्ने प्रयास गरेका थिए। जिल्ला समन्वय समितिको बैठकमा कुरै गर्न मानेनन्। पटकपटक मलाई अनौपचारिक वार्तामा जनतासँग खेलबाड हुने गरी विभिन्न प्रलोभन देखाई खरिद गर्ने प्रयास गरेका छन्।
घटनाको जिम्मेवारी उपमेयरले लिनुपर्छ : मेयर
चेकसहित कार्यालय सम्बन्धी केही कागजात उपमेयरले आफ्नो नियन्त्रणमा राखेको हुँदा सो कागजात लिन सम्बन्धित निकायलाई जानकारी गराई कानुनी रुपमा लिन खोज्दा उपमेयरले विवाद सिर्जना गरी झडपको अवस्था सिर्जना गराएकी छन्।
गत आव २०७५/७६ को विभिन्न चेक, समाजिकीकरण लगायत कार्यालयको विभिन्न कागजात उपमेयरले सञ्चालन गरेको कार्यालयमा राखिएको छ। त्यही कारण काम गर्न समस्या भएकाले प्रहरी र कार्यालयका केही कर्मचारीलाई लिन पठाइएको हो। अडिटका लागि विभिन्न कागजात नहुँदा समस्या भइरहेकाले पटकपटक आग्रह गर्दा पनि उपमेयरले नदिँदा सम्बन्धित निकायलाई जानकारी गराइएको थियो। ट्याक्टरमा गएका मान्छे कार्यालयकै कर्मचारी हुन्। हामीले कुनै बलप्रयोग र तोडफोड गरेका छैनौं। घटनाको जिम्मेवारी उपमेयरले लिनुपर्छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
