काठमाडौं - विश्वकप छनोट खेल्ने नेपाली राष्ट्रिय टोलीका लागि प्रारम्भिक चरणमा ३१ खेलाडी छनोट भएका छन्। मुख्य प्रशिक्षक योहान कालिनले अभ्यासमा रहेका ३६ खेलाडीबाट ३१ खेलाडी छानेका हुन्।
पहिलो चरणको छनोटबाट डिफेन्डर कमल श्रेष्ठ र अमित श्रेष्ठ, मिडफिल्डर नितिन थापा, सेसेहाङ आङदेम्बे र मिछेन तामाङ रहेका छन्। नितिन, सेसेहाङ र मिछेन यु २३ राष्ट्रिय टिमको प्रशिक्षणमा सहभागी हुने छन्।
अहिले एन्फा कम्प्लेक्समा भइरहेको प्रशिक्षणमा नरहेको भए पनि भरत खवास, रोहित चन्द र विमल घर्तीमगर पनि टोलीमा समेटिएका छन्। भरत आर्मी प्रशिक्षणका लागि थाइल्यान्डमा छन्। विमल माल्दिभ्स र रोहित इन्डोनेसियामा व्यवसायिक फुटबल खेलिरहेका छन्।
विश्वकप फुटबलअन्तर्गत एसिया क्षेत्रको दोस्रो चरण छनोटका लागि नेपालले तयारी गरिरहेको छ। छनोटमा नेपाल समूह ‘बी’ मा रहेको छ। नेपालको समूहमा अष्ट्रेलिया, जोर्डन, कुवेत र चाइनिज ताइपे रहेका छन्। दोस्रो चरणको छनोट खेल आगामी भदौ १९ गतेदेखि हुनेछ।
नेपालले आफ्नो पहिलो खेल भदौ १९ गते कुवेतसँग घरेलु मैदानमा खेल्ने तय भएपनि दशरथ रङ्गशालाको पुनःनिर्माण काम नसकिएकाले कुवेतमा गएर पहिलो खेल खेल्ने छ। नेपालले कुवेतसँग होम एण्ड अवे दुवै खेल कुवेतमा नै खेल्नेछ।
यी हुन् छनोटमा परेका ३१ खेलाडी
किरणकुमार लिम्बु, एलन न्यौपाने, विकेश कुथु, विशाल श्रेष्ठ, विराज महर्जन, सरोज दाहाल, रन्जिन धिमाल, सुमन अर्याल, अनन्त तामाङ, अजित भण्डारी, देभेन्द्र तामाङ, रवि सिलवाल, दिनेश राजवंशी र बिमल पाण्डे, सुनिल बल, रवि पासवान, सुजल श्रेष्ठ, विशाल राई, रोहित चन्द, विक्रम लामा, सन्तोष तामाङ, तेज तामाङ, त्रिदेव गुरुङ, हेमन गुरुङ, सुभाष गुरुङ, विमल घर्तीमगर, विमल राना, नवयुग श्रेष्ठ, अभिषेक रिजाल, अन्जन विष्ट र भरत खवास।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
