काठमाडौं – पेरिस सेन्ट जर्मेन (पीएसजी) मा रहेका ब्राजिलियन स्टार खेलाडी नेमारको नयाँ सिजन के हुने भन्ने अझै टुंगो लागेको छैन । पीएसजी, बार्सिलोना र नेमार आआफ्नै योजनामा लागिरहँदा एकीन निर्णय भने भएको छैन ।
नेमार पीएसजीमा नयाँ सिजन निरन्तर नगर्ने योजनामा लागेका छन् । उनको रोजाइँ बार्सिलोनामा केन्द्रित छ । पीएसजी पनि उनलाई क्लब छाड्न दिन तयार छ, तर सम्झौता अघि बढ्न भने सकेको छैन । बार्सिलोना पर्ख र हेरको स्थितिमा छ भने नेमार नयाँ सिजनमा के हुने भन्ने अन्योलमा परेका छन् ।
पीएसजी पनि समय बिताउने शैलीमा देखिएको छ । छाड्न चाहने खेलाडीलाई बाटो खुला रहेको बताउँदै आएको पीएसजीले समय सकिएपछि नेमार क्लबकै रहने र प्रोफेसनल रुपमा अघि बढ्ने आशामा छ । उनी क्लबमा नै रहँदा पनि उनको छबी नबिग्रियोस भन्नेमा पीएसजी सचेत देखिन्छ ।
फ्रेन्च पत्रिका ‘एलइक्युप’ ले भने नेमार अगस्ट १० अघि नै आफ्नो नयाँ सिजनको निर्णय गर्ने योजनामा रहेको र उनले पीएसजीमा निरन्तरता नदिने उल्लेख गरेको छ । उनको इच्छा बम्मोजिम बार्सिलोनाले पनि ल्याउने चाहना बढाए पनि दुई वर्षअघि छाडेर गएको खेलाडीका लागि हतारमा निर्णय नगर्न सचेत देखिन्छ ।
बार्सिलोना नेमारका लागि केही खेलाडी पीएसजी पठाउन समेत तयार देखिन्छ तर पनि पीएसजीले उनको रकम घटाउने संकेत देखाएको छैन । पीएसजीका अध्यक्ष नासेर अल खेलाफीले नेमारले सेलिब्रिटीको जस्तो व्यवहार देखाएको र आफूहरु त्यस्तो व्यवहारको पछि नलाग्ने बताइरहेका छन् ।
२७ वर्षका नेमार ब्राजिलियन क्लब सान्तोषबाट २०१३ मा बार्सिलोना आएका थिए । २०१७ मा बार्सिलोना छाडेर २०० मिलियन पाउण्ड कीर्तिमानी रकममा पीएसजी पुगेका नेमार पुनः बार्सिलोना फर्कने प्रयासमा लागेका हुन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
