काठमाडौं- थाहा हुन्न, कुन क्षण कति बेलाको टर्निङ प्वाइन्टले मान्छेको जीवन नै परिवर्तन गरिदिन सक्छ। त्यस्तो क्षणलाई सीमित मानिसले मात्र पहिचान गर्न सक्छन्। कतिले जानेर, कतिले अञ्जानमै। उसो त, कामलाई हेरेर अग्रजले गर्ने प्रशंसा र प्रतिक्रियाले पनि हरेकको जीवनमा उत्तिकै महत्व राख्ने गर्छ।
सञ्चारकर्मी, कलकार, गायक हुँदै अहिले समाजसेवामा सक्रिय शिशिर भण्डारी पनि राजेश हमालले आफ्नो कार्यक्रम हेरेर गरेको सराहनाले आफूले गरिरहेको काममा ऊर्जा थपिएको बताउँछन्। उनले २०६४ सालदेखि रेडियो–अडियोमा ‘उल्टो पाल्टो’, ‘छेटे डन’, ‘खबरीलाल’ लगायत थुप्रै कार्यक्रम चलाए। २०६७ देखि तीन वर्षसम्म उनले टिभी फिल्मीमा विभिन्न हास्य व्यङ्ग्य कार्यक्रम चलाए। सुरुमा ‘फिल्मी संसार’ कार्यक्रममा ब्याकग्राउन्ड आवाजका लागि र रेडियो फिल्मीमा कार्यक्रम चलाउन उनलाई त्यहाँ लगिएको थियो। तर, केही हप्तामै टिभी फिल्मीमा ‘डुप्लिकेट’ कार्यक्रम सुरु भयो। दर्शकले त्यसलाई अत्यधिक रुचाए पनि। त्यही कार्यक्रमले चिन्ने उनलाई अहिले पनि धेरै छन्।
कलाकारिता जगतमै पनि ‘डुप्लिकेट’ लोकप्रिय भयो। कस्तो संयोग! भण्डारीलाई पहिलो प्रतिक्रिया दिने थिए, अभिनेता राजेश हमाल। त्यतिबेला राजेश अविवाहित नै थिए।
उनले ‘डुप्लिकेट’मा विभिन्न कलाकारको क्यारिकेर पनि गर्थे। उनले एउटा एपिसोडमा राजेश हमालको क्यारिकेचर गर्दै जोक सुनाएछन्।
त्यो जोकमा भण्डारीले राजेश हमालको विवाह भइसकेको बनाएका थिए। यस्तो थियो जोकः
राजेश हमालको छोरा स्कुलबाट ढिलो आएछन्। त्यहीबीचमा राजेशले छोरालाई सोधेछन्, ‘बाबु, तँ कहाँ गएर आइस्? किन ढिला आइस्?’
छोरा : ड्याडी-ड्याडी आज म्यामले अलि धेरै पढाउनुभयो। त्यही भएर ढिला भयो।
राजेशले घरमा एउटा झुट पक्रने रोबोट राखेका रहेछन्। झुट बोल्यो कि झापड हानिहाल्ने। रोबोटले छोरालाई एक चड्कन हानेछ।
राजेश : तिमी झुट नबोल है। मैले झुट पक्रने रोबोट ल्याएको छु। यसले झुट पत्ता लगाइसक्यो। साँचो के हो बताऊ।
छोरा : ड्याडी, हामी फिल्म हेर्न गएका थियौं।
राजेश : कुन फिल्म हेर्न गयौ हँ?
छोरा : प्यार कि कहानी।
फेरि रोबोटले एक झापट हानेछ।
छोरा : (हडबडाउँदै) शिलाकी जवानी।
राजेश : तिमी निकै बिग्रिएर गयौ। तिम्रो उमेरमा कहिल्यै पनि भागेर हामी यसरी फिल्म हेर्न जाँदैन थियौं।
रोबोटले राजेश हमाललाई पनि एक चड्कन हानेछ।
त्यही समय राजेश हमालको श्रीमती उताबाट आइन्।
श्रीमती : हेर हेर! जस्तो बाउ उस्तै छोरा। आखिर तिम्रै त छोरा पर्यो नि।
रोबोटले लगत्तै श्रीमतीलाई पनि एक चड्कन हानेछ।
त्यो कार्यक्रम राजेश हमालले पनि हेरेका रहेछन्। पछि हमालले नै भण्डारीसँग भेट्दा कार्यक्रमको प्रशंसा गरेछन्। ‘पल’ फिल्मको प्रिमिरय शोका बेला गोपीकृष्णमा राजेशसँग शिशिरको भेट भयो। त्यसबेला राजेशले भनेका रहेछन्, ‘तपाईंको जोक्स मैले हेरेको थिएँ। मेरो श्रीमती चाहिँ त्यस्तो नपरोस् है।’
राजेशले आफ्नो कार्यक्रमप्रति गरेको प्रशंसाले धेरै ऊर्जा थपिएको शिशिर बताउँछन्।
टिभी फिल्मीमा कलाकारको आवातजावत धेरै हुने भएकाले विस्तारै धेरैसँग उनको सम्बन्ध बन्दै गयो। र, विभिन्न भूमिकामा फिल्ममा पनि काम गर्न थाले।
धादिङबाट विज्ञान पढ्न काठमाडौं आएका शिशिर त्यसमा रमाउन सकेनन्। अन्ततः रोजे सञ्चार जगतलाई। आफूले गरेका समाजसेवा, कला, गायन र सञ्चारकर्ममा पनि कला नै देख्छन्। र त उनी आफूलाई कलाकारकै रुपमा चिनाउन चाहन्छन्।
रेडियो–अडियोबाट सञ्चार क्षेत्रमा पाइला टेकेका शिशिरले पहिलो फिल्म ‘सो सिम्पल’ हुँदै अहिलेसम्म १६ वटा फिल्ममा अभिनय गरिसकेका छन्। कलाकारितासँग सञ्चार क्षेत्रमा पनि क्रियाशील उनी अहिले आफ्नै युट्युब च्यानल चलाइरहेका छन्। त्यहीमार्फत समाजसेवालाई पनि निरन्तरता दिइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
