काठमाडौं – देशमा क्रिकेटको वातावरण जोगाइराख्न जिम्बावेका क्रिकेट खेलाडीहरु आइपरे सित्तैमा खेलिरहन तयार भएका छन् । क्रिकेटमा राजनीतिक हस्तक्षप भएको भन्दै आईसीसीले जिम्बावे क्रिकेटमाथि प्रतिबन्ध लगाएपछि खेलाडीहरुले यस्तो बताएका हुन् ।
जिम्बावेमा स्पोर्टस एण्ड रिक्रियसन कमिसनले जिम्बावे क्रिकेट बोर्डको चुनावलाई कानुनविपरीत रहेको भन्दै प्रतिबन्ध गरेपछि आईसीसीले कडा कदम चालेको थियो । प्रतिबन्धपछि आईसीसीले जिम्बावे क्रिकेटलाई कुनै पनि सहयोग गरेको छैन । क्रिकेटका लागि दिएको पैसा अन्यत्र खर्च हुने डर रहेको आईसीसीको धारणा छ ।
जिम्बावे क्रिकेटमा जुलाई दोस्रो सातादेखि प्रतिबन्ध लागे जस्तै नेपाल क्रिकेट संघ (क्यान)मा गएको तीन वर्षदेखि प्रतिबन्धमा छ । क्यान पनि आन्तरिक विवादका कारण २०७३ वैशाखदेखि प्रतिबन्धमा रहेको छ । नेपाली क्रिकेटको सम्पूर्ण जिम्मा आईसीसीले लिएर प्रतियोगिताहरुमा सामेल गराइरहेको छ ।
प्रतिबन्धको दुई वर्षसम्म नेपाली खेलाडीहरुले पनि बिना तलब खेल खेल्दै आएका थिए । गएको चैतमा आईसीसीले खेलाडीहरुको दुई वर्षको तलब राष्ट्रिय खेलकुद परिषदमार्फत एकैपटक पठाएको थियो । उस्तै अवस्था देखिएको जिम्बावेका क्रिकेटरले पनि अवस्था सुधार नहुञ्जेल आफूहरु सित्तैमा खेल्न तयार रहेको बताएका हुन् ।
‘हामी देशमा क्रिकेटको अवस्था सुधार नहुँदासम्म सित्तैमा खेल्न पनि तयार छौँ । हाम्रो अबको लक्ष्य टी–२० विश्वकपको छनोटसँग जोडिएको छ । हामी अहिले नै तलब चाहिन्छ भन्नेमा छैनौँ, जबसम्म सबै कुरा मिल्दैन तबसम्म सित्तैमा खेलिरहने छौँ’ खेलाडीहरुले भनेका छन् ।
केही समयका लागि आफूहरुले गरेको त्यागले क्रिकेट लामो समय बाँचिरहन्छ भने आफूहरु त्यो त्याग गर्न तयार रहेको उनीहरुको भनाई छ । ‘जबसम्म क्रिकेटमा भविष्य छ भन्ने रहन्छ तबसम्म कोही खेलाडीलाई पनि क्रिकेटमा लागिरहन आपत्ती हुन्छ जस्तो लाग्दैन’ एक खेलाडीलाई उद्धृत गर्दै क्रिकइन्फोले लेखेको छ ।
जिम्बावेमा आईसीसीको प्रतिबन्धपछि पुरुष र महिला दुवै टिमका खेलाडीले गएको दुई महिनादेखिको तलब पाएका छैनन् । पुरुष टिमका खेलाडीले नेदरल्याण्ड्स र आयरल्याण्डसँग खेलेको सिरिजको म्याच फि पनि पाएका छैनन् । प्रतिबन्धपछि जिम्बावेले आईसीसीको अनुमतिमा खेल्ने प्रतियोगिताहरुमा आर्थिक पाटो आईसीसीले नै हेर्ने छ ।
प्रतिबन्धका बीच पनि दुई देशबीच सिरिज खेल्न भने जिम्बावेलाई बन्देज छैन । तर आईसीसीको आर्थिक सहयोगबिना सिरिज खेल्न पनि कठीन छ । टी–२० विश्वकपको छनोट र तय भएका सिरिजहरु छुट्ने डर खेलाडीहरुमा देखिन्छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
