नयाँ दिल्ली- भारतीय क्रिकेटर पृथ्वी शाव डोपिङ जाँचमा दोषी ठहर भएका छन्। डोपिङ जाँचमा दोषी पाइएपछि उनलाई ८ महिनाका लागि प्रतिबन्ध लगाइएको छ। पृथ्वीसँगै अन्य २ खेलाडीलाई समेत निलम्बन गरिएको छ।
भारतीय क्रिकेट कन्ट्रोल बोर्ड (बिसिसिआई)ले एक विज्ञप्ति जारी गर्दै पृथ्वीले अन्जानमा एक प्रतिबन्धित पदार्थ सेवन गरेको पाइएको स्पष्ट पारेको छ। जुन पदार्थ विशेषगरी खोकीको बेला खाने औषधि 'कफ सिरप'मा पाइने बताइएको छ।
बिसिसिआईका अनुसार गत फेब्रुअरी २२ मा इन्दोरमा सैयद मुश्ताक अली ट्रफीको एक खेलका दौरानमा एन्टी डोपिङ जाँचका लागि पृथ्वीले आफ्नो पिसावको नमूना दिएका थिए। सो जाँचमा वर्ल्ड एन्टी डोपिङ एजेन्सी (वाडा)को प्रतिबन्धित सूचीमा रहेको पदार्थ भेटिएको बिसिसिआईले जनाएको छ।
पृथ्वीले आफूमाथि लगाइएको आरोप स्वीकार गर्दै सो पदार्थ खोकी लागेको बेला सामान्य औषधिको रुपमा सेवन गरेको बताएका पनि बिसिसिआईले बताएको छ।
पृथ्वीको यो बयानबाट सन्तुष्ट रहेको बताउँदै बोर्डले उनले उक्त पदार्थ औषधिको रुपमा प्रयोग गरेको तर आफ्नो प्रदर्शन राम्रो बनाउन सेवन नगरेकोमा बोर्ड स्पष्ट रहेको जनाएको छ।
बिसिसीिआईले कानुनअनरुप सबै किसिमका क्रिकेट खेल्नबाट पृथ्वीमाथि ८ महिनाको प्रतिबन्ध लगाएको छ। प्रतिबन्धको समयसीमा गत मार्च १६ देखि सुरु भई नोभेम्बर १५ सम्म रहनेछ।
पृथ्वीका अलावा घरेलु क्रिकेट खेल्दै आएका अक्षय दुलारवर र दिव्य गजराजलाई पनि समान ८ महिनाकै लागि प्रतिबन्ध लगाइएको छ।
पृथ्वी मुम्बई क्रिकेट संघसँग आवद्ध खेलाडी हुन्। गतवर्ष आफ्नो जीवनकै पहिलो टेस्ट म्याचमा उनले वेस्टइन्डिजविरुद्ध शतक प्रहार गरेका थिए। आफ्नो 'डेब्यू' खेलमा शतक प्रहार गर्ने पृथ्वी मास्टर ब्लास्टर सचिन तेदुलकरपछि दोस्रो भारतीय क्रिकेटर हुन्।
साथै पहिलो टेस्ट म्याचमै शतक प्रहार गर्ने उनी सबैभन्दा कम उमेरका भारतीय खेलाडीसमेत हुन्।
कुनै पनि टेस्ट म्याचमा कम उमेरमा शतक प्रहार गर्ने खेलाडीको कीर्तिमान सचिनको नाममा छ। उनले १७ वर्ष १ सय १२ दिनमा शतक प्रहार गरेका थिए। पृथ्वीले जब शतक लगाएका थिए, उनको उमेर १८ वर्ष ३ सय २९ दिन थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751372795.jpg)
-1764146706.png)
