काठमाडौं- भारतीय क्रिकेट टोलीका कप्तान विराट कोहलीले प्रशिक्षकमा रवी शास्त्रीलाई नै निरन्तरता दिन आग्रह गरेका छन्।
भारतीय प्रशिक्षक मण्डलका पदाधिकारीका लागि आवेदन दिने म्याद सकिनु एक दिनमात्रै अघि कोहलीले शास्त्रीलाई नै प्रशिक्षकमा निरन्तरता दिनुपर्ने मत राखेका हुन्।
यसअघि भारतीय क्रिकेट कन्ट्रोल बोर्ड (बिसिसिआई)ले हालको प्रशिक्षक मण्डललाई विश्वकपसम्मका लागि मात्रै जिम्मेवारी सुम्पिएकोमा त्यसलाई सेप्टेम्बर ३ सम्मका लागि लम्ब्याएको थियो। हाल कायम रहेका प्रशिक्षकसहितको टोली भारतको वेस्टइन्डिज भ्रमणसम्म कायम नै रहनेछ।
रविलाई लिएर कोहलीले सकारात्मक प्रतिक्रिया जनाएका हुन्। वेस्टइन्डिज र अमेरिकाको भ्रमणमा जानुअघि सोमबार गरिएको पत्रकार सम्मेलनमा बोल्दै कप्तान कोहलीले भने, 'हामीले रवि शास्त्रीजस्ता महान् प्रशिक्षक पाएका छौं। उहाँलाई टोलीका सबैजनाले सम्मान गर्छन्। टोलीको अवस्थालाई हेर्दा पनि हामी सँगै मिलेर निक्कै राम्रो गरिरहेका छौं।'
भारतीय प्रशिक्षकको रुपमा शास्त्रीलाई नै निरन्तरता दिएमा भारतीय टोली खुसी हुने उनको भनाइ छ। 'उहाँलाई प्रशिक्षकमा निरन्तरता दिएमा हामी सबैजना खुसी हुनेछौं। यदि यस सम्बन्धमा टोलीको कप्तानको रुपमा सल्लाहकार समितिले मेरो विचार जान्न खोजेमा त्यसका लागि म तयार छु,' कोहलीले भने, 'तर, हालसम्म सो सम्बन्धमा कुनै राय लिइएको छैन। र मलाई यो पनि थाहा छैन की यस सम्बन्धी प्रकृया कसरी अगाडि बढ्छ।'
बिसिसिआईले गत महिना एक सूचना जारी गर्दै सबै प्रशिक्षक मण्डलमा आवेदनका लागि आज (मंगलबार)सम्मको समयसीमा दिएको थियो। यसका आधारमा आगामी अगस्टको मध्यसम्ममा भारतीय टोलीको प्रशिक्षकको टुंगो लगाइनेछ।
सो सूचनामा हालको टोलीका मुख्य प्रशिक्षक शास्त्री, सहायक प्रशिक्षक सन्जय बन्गर, बलिङ प्रशिक्षक भरत अरुण तथा फिल्डिङ प्रशिक्षक आर श्रीधरको नाम स्वतः छनोट प्रकृयामा सामेल हुने बताइएको थियो। उनीहरुको नाम सर्ट लिस्टमा पर्न गएमा अन्तर्वार्तासमेत लिइने स्पष्ट पारिएको छ।
बिसिआईको सल्लाहकार समिति (सिएसी)मा पूर्व कप्तान कपील देव, पूर्व प्रशिक्षक एवम् ब्याट्सम्यान अन्सुमन गेइकवाड तथा भारतीय महिला टोलीकी पूर्व कप्तान शान्ता रांगस्वामी रहेका छन्। यही समितिले नै आवेदन दिएकाहरुको अन्तर्वार्ता लिने र अन्तिम नाम घोषणा गर्नेछ।
यसअघि सो समितिमा मास्टर ब्ला्स्टर सचिन तेन्दुलकर, पूर्व कप्तान सौरभ गांगुली र ब्याट्सम्यान भिभिएस लक्ष्मण थिए। यही समितिले नै हालका शास्त्री र सन् २०१६ मा अनिल कुम्बलेलाई भारतीय टोलीको प्रशिक्षकको रुपमा जिम्मेवारी दिएको थियो। पछि कुम्बलेले भने पदबाट राजीनामा दिएका थिए।
हाल सिएसीले आफ्नो राय नलिएको र चाहेमा त्यसका लागि आफू तयार रहेको कोहलीले स्पष्ट पारेका छन्। यसअघि कुम्बलेको राजीनामा विवादमा पर्दा कोहली आफैंले सिएसीलाई सम्पर्क गरेका थिए।
कुम्बलेको बहिर्गमनपछि सिएसीले शास्त्रीलाई टोलीको प्रशिक्षकको रुपमा जिम्मेवारी दिएको थियो। शास्त्रीसहित अन्य ४ आवेदकसँगको अन्तर्वार्तापछि सिएसीले कोहलीसँग छलफल गरी शास्त्री नयाँ प्रशिक्षकमा चुनिएको घोषणा गरेको थियो।
अहिले परेका आवेदनमध्येबाट सर्ट लिस्ट तयार गर्न र अन्तर्वार्ताको लागि सिएसीसामू २ साताको समय दिइएको छ। यस आधारमा पनि आगामी अगस्ट १४ सम्ममा भारतीय टोलीको प्रशिक्षकको टूंगो लाग्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
