राजविराज- राष्ट्रियसभाका निर्वाचनका लागि नेकपा (एमाले) ले प्रदेश नं. २ बाट ५५ जनाको नाम सिफारिस गरेको छ। राजविराजमा बिहीबार बसेको एमाले प्रदेश संगठन कमिटीको बैठकले नाम सिफारिस गरेको हो।
राष्ट्रियसभा सदस्यका हरेक प्रदेशबाट ३ महिला, ३ अन्य, १ दलित र अपाङ्ग वा अल्पसंख्यकबाट १ जना गरी ८ जना निर्वाचित हुने व्यवस्था छ।
बैठकमा सप्तरीबाहेक अन्य जिल्लाबाट धेरै जनाको नाम आएपछि छलफल गरी ५५ जनाको नाम पठाउने निर्णय गरिएको कमिटीका संयोजक एवं स्थायी समिति सदस्य सत्यनारायण मण्डलले जानकारी दिए।
सप्तरीबाट सुमनराज प्याकुरेलको नाम मात्र सिफारिस भएको छ भने सिरहाबाट रामचन्द्र यादव, जया घिमिरेसहित १३ जना, धनुषाबाट रत्नेश्वर गोइत, यदुवंश झा, भोला साहसहित १२ जना, पर्साबाट प्रभु हजरा, निर्मला देवकोटासहित ११ जनाको नाम सिफारिस भएको छ।
यसैगरी रौतहटबाट रोहित पासवान, बिना साहसहित ५ जना, सर्लाहीबाट कमलादेवी महतो, रेवती पन्त, सुरेन्द्र लामासहित ५ जना, बाराबाट दिनेशकुमार राय, पुरुषोत्तम पौडेलसहित ४ जना, महोत्तरीबाट रामदयाल मण्डलसहित ४ जनाको नाम सिफारिस भएको छ।
सिफारिस गरिएकाहरुबाट एमालेले छनोट गरी एमाले र माओवादीको कार्यदल बैठकले अन्तिम रुप दिने बताइएको छ।
यसैगरी राष्ट्रियसभा निर्वाचनको तयारीका लागि एमाओवादीसँग समन्वय गरी प्रदेश नम्बर २ मा मतदाताबीच भेला राखिने निर्णय भएको कमिटीका सहसंयोजक नागेन्द्र चौधरीले बताए।
माघ २४ गते हुने निर्वाचनका लागि माघ ७ गते मतदाता नामावली प्रकाशन गर्ने निर्वाचन आयोगको कार्यतालिका छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
