काठमाडौं – स्पेनिस क्लब रियल मड्रिड गएको सिजन निकै तनावमा रह्यो । वर्षमै तीन प्रशिक्षक परिवर्तन र खराब हारको निरन्तरताले आजित बनेको मड्रिडले सबै प्रतियोगिता गुमायो ।
यसैले मड्रिडले नयाँ सिजनका लागि महत्वपूर्ण परिवर्तन गर्न खोजेको छ । तर प्रि सिजनका खेल हेर्दा पुरानो अवस्थामा राम्रो सुधार भइसकेको देखिँदैन ।
प्रि सिजनको तयारीमा बायर्न म्युनिखसँग ३-१ ले हारेको रियल मड्रिडले आर्सनलाई टाइब्रेकरमा ३-२ ले हराएको थियो । दुवै खेलमा नमिलेको तालमेल एथ्लेटिको मड्रिडविरुद्ध त ध्वस्त नै देखियो । एथ्लेटिकोले ७-३ ले हराएपछि मड्रिड व्यवस्थापनमाथि पनि प्रश्न उठेको छ ।
‘नतिजाबाट हामी खुशी छैनौँ तर टिमप्रति मेरो विश्वास छ । हामी राम्रो गर्ने छौँ । यो चिन्ता गर्नुपर्ने विषय होइन तर पनि नराम्रो हारले दुःख त लाग्छ नै’ प्रशिक्षक जिनेदिने जिदानले भनेका छन् ।
नयाँ खेलाडीहरु ल्याइएका छन् । कतिपय पुराना खेलाडी जिदानको योजनामा अटाएका छैनन् । तर जिदान भनिरहेका छन् - हामी योजनाबद्ध छौँ, आत्तिएका छैनौँ । जिदानले यसो बताइरहे पनि प्रि सिजनका खेल हेर्दा मड्रिड टिममा केही कमजोरीहरु प्रस्ट देखिएका छन् ।
उही खेलाडीको वरपर
यदि क्रिष्टियानो रोनाल्डोको ठाउँमा इडन हाजार्डलाई र केलर नाभासको ठाउँमा थियाबट कोर्टुवालाई राख्ने हो भने रियल मड्रिड टिममा बाँकी परिवर्तन देखिँदैन ।
हाजार्डबाहेक अरु नयाँ ल्याइएका खेलाडीले त सुरुवाती ११ मा खेल्न पाउने नपाउने पनि दुविधा नै देखिन्छ । यसले टिममा सकारात्मक धारणाको सञ्चार भएको देखिँदैन ।
मिडफिल्डमा टोनी क्रुस र लुका मोडरिका साथै डिफेन्समा ड्यानी कार्भाजल, सर्जियो रामोस, मार्सेलो या त राफेल भारान र नाचो फर्नान्डेज जिदान यिनैको वरिपरि छन् ।
नफेरिएको व्यवस्थापन
जिदानले आर्सनलविरुद्ध ४–४–२ को शैलीमा खेलाडी मिलाएर खेलाए । जसमा लुका जोभिकसँगै करिम बेन्जेमा अट्याकमा थिए । तर जिदानको पहिलो रोजाइँका खेलाडी ४–४–३ को शैलीमा नै थिए ।
नयाँ खेलाडीसँग पुरानो तालमेल मिलाउन नसक्दा मैदानमा उनको योजना प्रस्ट भइरहेको छैन । एथ्लेटिको विरुद्धको खेलमा त तालमेल अझ बिग्रिएको थियो ।
त्यसमा खेलाडीमा तीब्रताको र खेलप्रतिको एकाग्रताको अभाव देखिएको थियो । जुन गएको सिजनमा रायो भालेकानो, रियल सोसिडाड र रियल बेटिससँग हारेको भन्दा भिन्न थिएन ।
कमजोर मनोबल
मड्रिड पहिलो रोजाइँका खेलाडीहरुमा खेलमा पहिले गोल खाँदा मनोबल कमजोर हुने समस्या देखिएको छ । प्रि सिजनका खेलहरुमा पनि पहिले नै पछि परेको अवस्थामा खेलाडीहरु हच्चिएका देखिन्थे ।
जित्नैपर्छ भन्ने ध्यानको अभावले तालमेल समेत विग्रिएको थियो । प्रि सिजन तयारीको तीन खेलमा खाएको १२ गोलमध्ये ८ गोल त पहिलो हाफमा नै थियो । त्यसले उनीहरुको दोस्रो हाफसमेत राम्रो हुन सकेन ।
युवा खेलाडीलाई कम समय
ब्राहिम डियाजको इन्जुरीपछि रियल मड्रिड टिममा युवा खेलाडीका लागि समय अझ घटेको छ । बायर्न म्युनिखविरुद्ध सबैभन्दा राम्रो देखिए पनि ताकेफुसा कुबो र रोड्रिगोले खेलमा आवश्यक समय नै पाएका छैनन् ।
गएको सिजन प्रशिक्षक सान्टियागो सोलारीले सुरुवाती ११ मा मार्कस लोरेन्टे, सर्जियो रेगुलियन, भिनिसियस जुनियर जस्ता खेलााडीलाई अवसर दिएका थिए । जिदानको वापसीपछि उनले युवा खेलाडीलाई बेञ्चमा राखेर क्रुस, मोडरिक र इस्को जस्ता सिनियर खेलाडीलाई नै विश्वास गरे ।
जिदानले गएको सिजन पुराना खेलाडीलाई नै खेलाउनुमा सिजनपछिको बिक्रीमा सहज होस् भन्ने धारणा रहेको धेरैले बताएका थिए । तर नयाँ सिजनमा जिदानको योजना त्यही वरपर देखिएपछि उनको विश्वास पुराना खेलाडीप्रति नै बढी रहेको देखिन्छ ।
गोल पोस्टमा उस्तै तनाव
थियाबट कोर्टुवा जिदानको योजनामा पहिलो रोजाइँका गोलकिपरका रुपमा देखिएका छन् । तर गएको सिजनमा जस्तै कमजोर स्थितिमा कोर्टुवा देखिएका छन् ।
गएको सिजन बार्सिलोनासँग पाँच गोल, सेभियासँग तीन गोल र आयाक्ससँग ४ गोल खाएका कोर्टुवा आफ्नो खेललयमा आउन सकेका छैनन् ।
च्याम्पियन्स लिगमा लगातार उत्कृष्ट देखिएका गोलकिपर केलर नाभास र कोर्टुवाबीच कसले बढी खेल समय पाउने भन्नेमा पनि दुविधा नै देखिन्छ । नाभासलाई नयाँ क्लबमा पठाउने तयारी भइरहे पनि भनेअनुसार मिलेको देखिँदैन ।
घाइते खेलाडीको समस्या
रियल मड्रिड गएको सिजन विभिन्न ४३ इन्जुरीले समस्यामा परेको थियो । यसरी हेर्दा एक हप्तामा एक खेलाडी घाइते रहने देखिन्छ । अहिले प्रि सिजनमा पनि मड्रिड टिममा उही अवस्था दोहोरिरहेको छ ।
मड्रिड टिममा अहिले फिटनेस प्रशिक्षक र फिजियो परिवर्तन गरिए पनि खेलाडी घाइते हुने समस्यामा सुधार भएको छैन । प्रि सिजनमा नै डियाज, फर्लान्ड मेन्डी, मार्को एसेन्सियो र लुका जोभिक घाइते रहेका छन् ।
यी सँगै नयाँ सिजनमा मड्रिड टिमले विश्वस्तरीय नयाँ खेलाडीलाई ल्याउने समर्थकको आशा पनि पूरा भएको छैन । त्यसमा हाजार्ड मात्रै एक्ला देखिन्छन् । २००९ मा फ्लोरेन्टिनो पेरेजले जसरी क्रिष्टियानो रोनाल्डो, जाभी एलन्सो, काका र करिम बेन्जेमालाई ल्याएका थिए त्यही शैलीमा मड्रिड अगाडि बढ्ने आश पूरा नहुने देखिएको छ ।
सञ्चार माध्यमसँगको कुराकानी र पत्रकार सम्मेलनमा नै पनि जिदान प्रस्ट देखिँदैनन् । अवस्था जस्तो आए पनि उनी टिमप्रति विश्वस्त छन् । यतिसम्म कि एथ्लेटिको मड्रिडसँग ७ गोल खाँदा पनि उनले टिमको कमजोरीप्रति केही औँल्याएनन् । यही विश्वस्तता सिजन सुरु भएपछि कायम रहला या केही परिवर्तनको बाटोमा लाग्लान् ?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751372795.jpg)
-1764146706.png)
