काठमाडौं – स्पेनिस क्लब एथ्लेटिको मड्रिडबाट बार्सिलोना आएका एन्टोनियो ग्रिजम्यानको ट्रान्सफरलाई ला लिगाले रोक्न सक्ने ला लिगा अध्यक्ष जेभियर टेबासले बताएका छन् ।
ग्रिजम्यानलाई ल्याउन बार्सिलोनाले रिलिज क्लज वापत १ सय २० मिलियन युरो तिरेको थियो । तर एथ्लेटिको मड्रिडले भने बार्सिलोनाले दुई सय मिलियन युरो तिर्नुपर्ने दाबी गर्दै आइरहेको छ ।
ग्रिजम्यानको रिलिज क्लज गएको १ जुलाईमा दुई सय मिलियन युरोबाट १ सय २० मिलियन युरोमा झरेको थियो । जब कि बार्सिलोनाले ग्रिजम्यानसँगको सम्झौता १२ जुलाईमा गरेको बताउँदै आएको छ । एथ्लेटिको मड्रिडले भने बार्सिलोनाले पहिले नै सम्झौता गरिसकेकाले पुरानै रकम तिर्नुपर्ने दाबी गरेको हो ।
यसमा ला लिगाका अध्यक्ष टेबासले भनेका छन्, ‘ग्रिजम्यानको ट्रान्सफर नै रोकिन सक्ने पनि देखिन्छ । कस्तो अवस्था आएको हो र के भएको हो भन्ने सबै ला लिगाले छानबिन गर्दै छ ।’
ग्रिजम्यान बार्सिलोना आएदेखि नै उनको ट्रान्सफरलाई लिएर विवादहरु आइरहेका छन् । त्यसमा ग्रिजम्यान भने अवस्थाअनुकुल दुवै क्लबले संयमता अपनाउनुपर्ने र आफू बार्सिलोना आउने बेला घटेको रिलिज क्लजलाई एथ्लेटिको मड्रिडले स्वीकार्दा नै राम्रो हुने बताउँदै आइरहेका छन् ।
ग्रिजम्यान चेल्सीसँग २–१ ले हारेको मैत्रीपूर्ण खेलमा बार्सिलोनाबाट खेलि नै सकेका छन् । यस्तोमा ला लिगा अध्यक्षको नयाँ भनाई आउनुले आशंका बढेको छ ।
टेबास भन्छन्, ‘एथ्लेटिको मड्रिडले उजुरी नै गरिसकेको छ, यसैले हामी नियमसंगत रुपमा नै अगाडि बढ्नुपर्ने हुन्छ ।’
गएको वर्ष नै ग्रिजम्यानलाई बार्सिलोनाले ल्याउने प्रयास गरिरहेको थियो । त्यसबेला पनि एथ्लेटिको मड्रिडले गैरकानुनी बाटोबाट ग्रिजम्यानसँग सम्झौता गर्न खोजेको भन्दै फिफामा उजुरी गरेको थियो । गएको वर्ष ग्रिजम्यानले नै बार्सिलोनाको प्रस्ताव अस्वीकार गरेका थिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751372795.jpg)
-1764146706.png)
