नारायणघाट- सांगीतिक समूह 'नेपथ्य'ले माघे संक्रान्तिको अवसरमा चितवनको नारायणघाटमा कन्सर्ट सम्पन्न गरेको छ।
माघे मेला भर्न आएका करिब ७ हजार दर्शनार्थीहरुका अघिल्तिर समूहका गायक अमृत गुरुङको टोलीले लोक रक धुनका विभिन्न गीत पस्कियो।
सुरुवातमा ‘सा कर्णाली’ र ‘सम्झिराख’मो म्युजिक भिडियो देखाइएको थियो। सरुभक्तले लेखेको ‘कुरुप अनुहार हो’, ‘भेँडाको ऊनजस्तो’, ‘छेक्यो छेक्यो’, आँगनैभरि’ गाउँदै गर्दा अमृतले समूह स्थापनाको सम्झना सुनाए।
‘हामीले यो गीत तयार पार्दा तपाईंहरु मध्ये अधिकांश त जन्मनु पनि भएको थिएन,’ तन्नेरी दर्शकहरुसँग रमाइलो गर्दै भने, ‘आज फेरि यो गीत गाइरहँदा मलाई तपाईंहरुकै उमेरमा पुगेको अनुभूति भइरहेको छ।’
नेपथ्य यतिबेला २५ औं वर्षगाँठको अवसरमा सांगीतिक यात्रामा छ। अमृतले क्रमशः ‘शिरफूल शिरैमा’, ‘लामपाते सुरती’, ‘चरी मर्यो’, ‘जोमसोमे बजारमा’, ‘ऐनाझ्याल’मा समेटिएको ‘जोगले हुन्छ भेट’ सुनाएका थिए। ‘तिमी पनि नेपाली’, ‘यो जिन्दगानी’, ‘कोसीको पानी’, ‘हिमाल चुचुरे’, ‘मै नाचे छमछमी’, ‘रेशम’ र ‘तालको पानी’ले उनले दर्शक उचालेका थिए।
नेपथ्यको व्यवस्थापन गर्दै आएको नेपालयका किरणकृष्ण श्रेष्ठले दमक, नारायणगढ र भैरहवामा कन्सर्ट आयोजना गरिएको जानकारी गराए। माघ ४ गते भैरहवास्थित पक्लिहवा हाइस्कुलमा नेपथ्य प्रस्तुत हुनेछ।
गायक अमृतलाई किबोर्डमा सुरज थापा, ड्रमसेटमा ध्रुव लामा, बेस गितारमा सुविन शाक्य, लिड गितारमा निरज गुरुङ र मादलमा शान्ति रायमाझीले सघाएका थिए।
‘दाताज् इभेन्ट म्यानेजमेन्ट’ले कार्यक्रमको आयोजना गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
