काठमाडौं- प्रतिनिधिसभाको बैठकमा नेपाली काँग्रेसले पेश गरेको सार्वजनिक महत्वको प्रस्तावमा छलफल सुरु भएको छ।
प्रतिनिधिसभाको नियम ७१ बमोजिम मिनेन्द्र रिजाललाई सार्वजनिक महत्वको प्रस्तावमा बोल्नका लागि सभामुख कृष्णबहादुर महराले समय दिएका थिए।
संसदमा बोल्दै रिजालले विपत्तिको समयमा हेलिकोप्टरमा घुमेर फर्कने सरकारभन्दा जनताको उद्दार गर्नु आवश्यकता भएको बताए।
विपदको समयमा प्रतिपक्ष र सत्तापक्ष भनेर विभाजित हुन आवश्यक नहुने भन्दै रिजालले सबै एक भएर काम गर्न संसदले सहयोग गर्नु पर्ने बताए।
‘संसदमा रहेको दलहरु यो विपत्तिको अवस्थामा एक ठाउँमा हुनुपर्दछ,’ उनले भने ‘यही कुराका लागि सार्वजनिक महत्वको प्रस्ताव राखेको हुँ।’
बाढी र पहिरोको समस्या देशभर भएको र सय जना भन्दा धेरै मानिसको मृत्यु भईसकेको भन्दै उनले असारे विकासमा बजेट खर्च नगरी योजनाबद्ध रुपमा काम गर्न समेत आग्रह गरेका थिए।
रिजालले आफू पनि विपत्तिग्रस्त क्षेत्रको सांसद भएको भन्दै प्रधानमन्त्रीको निर्वाचन क्षेत्रसँग खोलाले छुट्टाएको बताए। ‘ प्रधानमन्त्रीको निर्वाचन क्षेत्रको खोला नियन्त्रण गर्न सकेका छैनौ,’उनले भने, ‘जनताको क्षेत्रमा कहिले हो ?’
उनले कसैको आलोचना गर्नु आफ्नो धर्म नठान्ने भन्दै विपत्तिको समयमा सबै एकताबद्ध भएर सरकारलाई सहयोग गर्न तयार रहेको बताए।
‘सरकार हेलिकप्टरमा उडेर जनताको विपत्ति हेरेर फर्कने नहोस्, जनताको घरमा पुगेर उद्दार गर्न सक्ने बनोस्,’ उनले भने, ‘विपत्ति आईराख्ने भएकाले सरकार विपत्ति सकिएपछि पुग्ने होइन। विपत्तिको जोखिम न्यूनीकरणका लागि सरकारले काम गर्ने हो।’
स्थानीय तहको सरकारलाई काम गर्ने सरकार बनाउनुपर्ने भन्दै उनले त्यसका लागि केन्द्रले सहयोग गर्नुपर्ने बताए।
गाउँगाउँमा पुर्याएको सिंहदरबारले काम गर्न सक्नुपर्ने भन्दै आउने दिनमा सरकारले प्रभावकारी रुपमा काम गर्नुपर्ने उनको भनाइ छ।
‘हामी यहाँ उभिदाँ कोही प्रतिपक्ष र कोही सत्तापक्ष हुँदैन,’उनले भने, ‘सबैले यो सार्वजनिक महत्वको प्रस्तावलाई साझा बनाउनु भएको छ।’
सांसदको सुझाव सुनेर गृहमन्त्रीले काम गर्नुपर्ने उनको भनाइ थियो। जनतामा काम गर्ने कुरामा जनताको बीचमा सरकार बसोस् भन्दै उनले सरकारका सकारात्कक काममा सहयोग हुने र सफलताका लागि शुभकामना रहेको टिप्पणी गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
