सोमबार भएको भेटपछि पत्रकार सम्मेलनका क्रममा ट्रम्प र खान।
काठमाडौं- काश्भीर विवादमा मध्यस्थता गरिदिन भारतका प्रधानमन्त्री नरेन्द्र मोदीले आफूसँग प्रस्ताव राखेको भन्ने अमेरिकी राष्ट्रपति डोनाल्ड ट्रम्पको भनाइको भारतले खण्डन गरेको छ।
भारतीय विदेश मन्त्रालयले ट्विट गर्दै ट्रम्पको उक्त भनाइमा सत्यता नरहेको स्पष्ट पारेको छ। ट्विटमा पाकिस्तानसँगका सवै विवाद दुई देशबीचको आपसी छलफलबाट टुंग्याइने बताइएको छ।
मंगलबार पाकिस्तानी प्रधानमन्त्री इमरान खानसँगको भेटपछि ह्वाइट हाउसमा पत्रकारहरुसँग बोल्दै राष्ट्रपति ट्रम्पले भारत र पाकिस्तानका बीचमा रहँदै आएको काश्भीर विवाद समाधानका लागि अमेरिकालाई मध्यस्थता गरिदिन प्रधानमन्त्री मोदीले २ साताअघि आफूसँग आग्रह गरेको बताएका थिए।
भारत र पाकिस्तान काश्मीर क्षेत्र आफ्नो सीमाभित्र पर्ने भन्दै लामो समयदेखि विवादमा छन्।
भारतीय विदेशमन्त्री एस जयशंकरले मंगलबार नै संसद्मा ट्रम्पको भनाइमा सत्यता नरहेको बताएका थिए।
तर, विपक्षी दलका सांसदहरुले भने प्रधानमन्त्री मोदी नै संसद्मा उपस्थित भएर यसबारेमा प्रष्ट पार्नुपर्ने माग गरेका थिए। भारतीय कांग्रेसको अध्यक्षबाट हालसालै राजीनामा दिएका राहुल गान्धीले एक ट्विट गर्दै यस सम्बन्धमा विदेशमन्त्रीको भनाइ पर्याप्त नहुने बताएका छन्।
हालसम्म काश्मीर विवादलाई लिएर भारत र पाकिस्तानबीचमा २ पटकसम्म युद्ध भएको छ। पछिल्लो समय गत फेब्रुअरी १४ मा मात्रै ४४ जना भारतीय सेनाको ज्यान जानेगरी भारतको पुलवामामा आत्मघाती आक्रमण भएको थियो। सोपश्चात् भारतले उक्त घटनाको दोष पाकिस्तानमाथि लगाएको थियो।
उक्त हमलाको जिम्मेवारी लिएको 'जैश ए मोहम्मद' नामक आतंकवादी संगठनको क्याम्प ध्वस्त पार्ने भन्दै फैब्रुअरी २६ मा भारतले पाकिस्तानमा बम खसालेको थियो।
तर, पाकिस्तानले भने भारतीय हवाई सेनाको लडाकु विमान आफ्नो क्षेत्रमा प्रवेश गरेको भन्दै खसालिदिएको थियो। सो क्रममा एक सेनाका पाइलटलाई पाकिस्तानले नियन्त्रणमा लिएर केही दिनमा छोडिदिएको थियो।
सो घटनापछि दुवै देशबीचको द्वन्द्व उचाइमा पुगेको छ।
ट्रम्पले ओभल हाउसमा पाकिस्तानका प्रधानमन्त्री इमरान खानसँग सोमबार भएको पहिलो प्रत्यक्ष भेटघाटपछि अमेरिकाले मात्रै दुई देशलाई एकै स्थानमा ल्याउनसक्ने बताए। पाकिस्तानी प्रधानमन्त्री खानले भारत र पाकिस्तानबीचमा पछिल्लो ७० वर्षदेखि रहँदै आएको काश्मीर विवाद सम्बन्धमा के अमेरिकाले सहयोग गर्न सक्छ भन्ने प्रश्नमा ट्रम्पले सो धारणा राखेका थिए।
जवाफका क्रममा ट्रम्पले २ साताअघिको भेटमा भारतीय प्रधानमन्त्री मोदीले आफूसँग काश्मीर विवादका सम्बन्धमा छलफल गर्दै मध्यस्थताको बारेमा अमेरिकाको धारणा सोधेका बताए। ट्रम्पले भने, 'यदि म सहयोग गर्न सक्छु भने त्यो मध्यस्तकर्ताकै रुपमा हो भनेर मैले बताएको थिए।'
पाकिस्तानले अमेरिकालाई मध्यस्ताकर्ताको रुपमा स्वागत गर्ने बताए पनि भारतले भने उक्त विवादलाई द्विपक्षीय सम्बन्धका आधारमा टुंग्याउनुपर्ने बताएको छ।
सन् १९८९ पछि काश्मीर क्षेत्रले लगातार आतकंको सामना गरिरहेको छ। सो क्रममा ७० हजार मानिसले ज्यान गुमाइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791822485.png)
-1786602170.png)
