काठमाडौं – नयाँ सिजनको तयारीमा रहेको स्पेनिस क्लब बार्सिलोनाले मंगलबार इंग्लिस क्लब चेल्सीसँग मैत्रीपूर्ण खेल खेल्दै छ । जापानको साइतामा स्टेडियममा फ्रान्क लाम्पार्डको प्रशिक्षणमा रहेको चेल्सीविरुद्ध बार्सिलोनाले नयाँ सिजनका लागि योजना तय गर्ने छ ।
मैत्रीपूर्ण खेलमा नै बार्सिलोनाले शनिबार भिसेल कोबेसँग खेल्नेछ। कोबेमा बार्सिलोनाका पूर्व खेलाडी आन्द्रेस इनिस्टासमेत सामेल हुने भएकाले महत्वका साथ हेरिएको छ । केही नयाँ खेलाडीसहित जापान पुगेको टोलीमा यो हप्ता केही मुख्य विषय नजरमा रहने छन् ।
डी योङ र ग्रिजम्यान
नयाँ सिजनका लागि बार्सिलोनाले ल्याएका मुख्य दुई खेलाडी फ्रान्की डि योङ र एन्टोनियो ग्रिजम्यान केन्द्रमा रहने छन् । उनीहरुको खेल कसरी अगाडि बढ्छ र पोजिसन के हुन्छ भन्नेसम्मको निक्यौल जापानमा हुने छ ।
त्यसमा प्रशिक्षक एर्नेस्टो भालभर्देले मिडफिल्डमा डी योङलाई कसरी व्यवस्थापन गर्छन् भन्ने महत्वपूर्ण हुने छ । उनीसँगै सर्जियो बुस्केट्स र इभान ¥याकिटिक जापान टुृरमा खेल्ने देखिए पनि टिममा आर्थर मेलो, आर्टुरो भिडाल फर्किएपछि लाइनअप व्यवस्थापनमा कठिनाई हुने देखिन्छ ।
जापान टुरमा लियोनल मेस्सी र लुइस स्वारेज सामेल नभएकाले ग्रिजम्यान स्ट्राइकिङको मुख्य भूमिकामा हुने छन् । ग्रिजम्यानले जापानमा देखाएको खेलले नै उनको भूमिका कस्तो हुने भन्ने एकीन गर्ने छ ।
डेम्बेले र माल्कोम
बार्सिलोनाको टिममा आफ्नो भूमिका प्रस्ट पार्ने अवसर उसमान डेम्बेले र माल्कोमलाई जापान टुरले दिएको छ । बार्सिलोनाका लागि नयाँ सिजनमा उनीहरु कसरी अघि बढ्छन् भन्ने भालभर्देका लागि विशेष योजनाको विषय हुने छ ।
गएको सिजन चोटका कारण समस्यामा परे पनि डेम्बेलेले धेरै हदसम्म आफूलाई प्रमाणित गरेका हुन् । यसैले उनका तुलनामा माल्कोम अझ तयार हुनुपर्ने देखिन्छ । ग्रिजम्यानको आगमनले घटेको स्थान माल्कोमले पूरा गर्न जापान टुरमा अब्बल बन्नुपर्ने हुन्छ ।
लेङलेट र उमटिटी
बार्सिलोना डिफेन्स लाइनमा समेत प्रतिस्पर्धा निकै बढेको छ । गएको सिजन उमटिटी चोटमा रहेकाले लेङलेटले धेरै समय मैदानमा बिताउने अवसर पाएका थिए । तर नयाँ सिजनमा त्यो सुविधा उनलाई हुने छैन ।
जेरार्ड पिकेसँगै सेन्टर डिफेन्स लाइन कसले सम्हाल्ने भन्ने प्रश्न जापान टुरमा लेङलेट र उमटिटीको खेलले तय गर्नेछ ।
रिकी पुइग
गएको सिजन पाएका थोरै मौकामा रिकी पुइगले आफ्नो कला देखाएका थिए । यसैले उनी मैदानमा रहँदा बार्सिलोना समर्थकको खुशी दोहोरो बनेको देखिन्थ्यो । आउँदो सिजनमा पनि पुइगलाई कसरी प्रयोग गर्ने भालभर्देले योजना बनाइसकेका छैनन् ।
बी टिममा रहेर थप एक सिजन पुइगले खेल देखाउने भए पनि सिनियर टिममा नियमित खेलाडीका रुपमा आउन उनले प्रशिक्षकको मन जित्दै राम्रो खेल देखाउन आवश्यक छ ।
एर्नेस्टो भालभर्दे
जापान टुृरमार्फत आफ्नो भूमिका प्रमाणित गर्नुपर्ने सबैभन्दा ठूलो अवसर र चुनौती प्रशिक्षक एर्नेस्टो भालभर्देकै लागि छ ।
गएको सिजन च्याम्पियन्स लिगमा व्यहोरेको खराब हारपछि उनीमाथिको अरुची अझ बढ्न नदिन आफ्नो योजनामा प्रस्ट हुन आवश्यक छ ।
हिरोकी एब
चोटका कारण मंगलबारको खेल गुमाउने भए पनि बार्सिलोनाका नयाँ खेलाडी हिरोकी एब जापानी मैदानमा चर्चाको विषय हुने छन् ।
बार्सिलोना बी टिमका लागि ल्याइएका भए पनि मिडफिल्डर र फरवार्ड दुवै स्थानमा खेल्न सक्ने एब जापानी समर्थकका लागि बार्सा स्टार बनिसकेका छन् । उनले शनिबार भिसेल कोबेसँगको खेलमा आफूलाई प्रस्तुत गर्दै घरेलु समर्थकको मन जित्ने अवसर पाउने छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
