काठमाडौं- सांगीतिक कार्यक्रम ‘पलेँटी शृङ्खला’अन्तर्गत साउन महिनामा प्रसिद्ध संगीतकार विक्रम गुरुङको प्रस्तुति रहने भएको छ। यसका निम्ति संगीतकार गुरुङ हङकङबाट काठमाडौं आइपुगेका छन्।
संगीतकार गुरुङ फेवातालको पश्चिम पहाडमा रहेको तामागी गाउँमा जन्मिएका हुन्। गुरुङ विक्रमका पिता भारतीय सेनामा भएका कारणले उनको बाल्यकाल भारतको देहरादुनमा बित्यो। प्राथमिक तहमा पढ्दै गर्दा स्कुलमा पियानो बजाउँदै बालगीत सिकाएको दृश्यले उनलाई आकर्षित त गर्थ्यो तर त्यतिबेला उनी संगीत कक्षामै सहभागी विद्यार्थी भने थिएनन्।
कक्षा पाँचको अध्ययनपछि विक्रमको परिवार पोखरा फर्कियो र उनी सुरुमा नेपाली आदर्श विद्यालयको नामले चिनिएको गण्डकी बोर्डिङ स्कुलमा भर्ना भए। त्यहाँ कक्षा १० सम्म पढेका उनले एसएलसी भने मल्टी पर्पोज नेसनल हाइस्कुलबाट गरे।
गुरुङको सानै उमेरदेखिको संगीतप्रतिको जिज्ञासु स्वभाव किशोरावस्थासम्म आइपुग्दा बिना बाजागाजा गुनगुनाएर धुन बुन्नेसम्मको अवस्थामा पुगेको थियो। ‘मैले ट्युन गर्न पहिलो कोसिस गरेको त ‘फेरि उसैका लागि’मा रहेका राजा महेन्द्रका शब्दहरूबाट हो, त्यो पनि बिना गाजागाजा। त्यो संगीतप्रतिको मेरो रहरको जिज्ञासु चरण थियो,' पलेँटीको अभ्यासमा रहेका उनले संगीतमा आफ्ना सुरुवाती दिन सम्झिँदै भने।
विसं २०३३/३४ सालपछि भने उनको सांगीतिक रुचिले नयाँ मोड लियो। त्यो नयाँ मोडमा पुर्याउने पात्र भने गायक अरुण थापा थिए। अरुणको स्वर त्यतिबेला मौलिक रचनामा प्रवेश भएकै थिएन। उनी रेडियो र फिल्ममा चलेका हिन्दी, नेपाली गीत गाउँथे। उनको गायकीको चर्चासँगै पोखरामा रहेका संगीत र साहित्य प्रेमीहरूको चहलपहल बढ्यो। त्यही चहलपहलले पोखरेली युवा सांस्कृतिक परिवारको जन्म भयो।
‘अरूणसँगको भेटपछि भने पोयुसापको जन्म भयो। विभिन्न कार्यक्रमहरू आयोजना हुन थाले। त्यसका निम्ति नेपाली गीत बनाउनुपर्छ भन्ने सोच आयो र मैले पनि अरुण सँगसँगै बसेर संगीत सिर्जना गर्ने जाँगर चलाएँ,' विक्रमले भने।
उनले सिर्जना गरेका ३ वटा गीत मात्र अरुणले गाएका छन्। ती तीनवटै गीतले लोकप्रियता र बौद्धिक जमातको प्रशंसा दुवै बटुले। ‘भुलूँ भुलूँ लाग्यो मलाई’ले त लोकप्रियताको उचाइ नै चुम्यो। साथै ‘आँखाको निद खोसी लाने’ र ‘कतै टाढा तिमीबाट भुलेँ भने’बाट पनि यी दुईको जुगलबन्दीलाई धेरैले अझैसम्म पनि सम्झिन्छन्।
अरूण र विक्रमको सांगीतिक सहकार्यमा राम्रो सम्भावना रहेको तत्कालीन संगीतकर्मीले बताए पनि त्यो सम्भावनाले लामो दीर्घरुप भने पाउन सकेन। कारण थियो- आफ्नो उच्च शिक्षा हासिल गर्न विक्रम पोखरा छोडेर काठमाडौंतिर लाग्नु। उनी कीर्तिपुरको त्रिभुवन विश्वविद्यालयमा भर्ना भए। तर, अरुण भने पोखरामै रहे।
केही अन्तरालमा अरूण पनि काठमाडौं त आए। तर, त्यसपछि उनीहरु बीचमा पोखराको जस्तो सांगीतिक जमघट भने हुन सकेन। साँगाको प्रहरी विद्यालय हुँदै अध्यापन पेसामा प्रवेश गरेका विक्रमलाई त्यही पेसाले हङकङ पुर्यायो। संगीतबाट उनी टाढा नै त भएनन् तर त्यसमै तल्लीन रहन पनि पेसा र समयले साथ दिएन।
‘अरूणकै निम्ती भनेर केही गीत तयार पनि गरेँ। काठमाडौंमै रेकर्ड गर्ने तयारी पनि भयो। म्युजिक ट्रयाक पनि बने। तर, अरूण हराइरहेको बेला थियो त्यो। अरूणको स्वास्थ्य खस्किसकेको बेला थियो। उनको मनले गाउन खोज्थ्यो तर शरीरले साथ दिएन। ती ट्रयाकहरू त्यत्तिकै थन्किए,' अरुणसँगको सहकार्य टुट्दाको समय सब्झिँदै उनले भने।
पलेँटीमा आगामी शुक्रबार, शनिबार र आइतबार तिनै क्षण र सांगीतिक यात्राको सम्झना गर्दै आफ्ना गीत प्रस्तुत गर्ने तयारीमा छन् संगीतकार गुरुङ। ‘पलेँटीले शब्द लेख्ने र धुन भर्नेहरूलाई प्रस्तुत गर्ने क्रममै मलाई पनि निम्त्याएको हो भन्ठान्छु। यो मञ्चमा नेपाली आधुनिक संगीतका धेरै योगदानकर्ताहरू प्रस्तुत भइसक्नु भएको छ। यो मञ्चले नेपाली आधुनिक संगीतको प्रतिष्ठा उठाउन गरेको अभियानमा जोडिन पाउनु खुसीको कुरा हो,’ आफ्ना धेरैजसो गीत आफैं गुनगुनाउने तयारीमा रहेका गुरुङले भने।
उनलाई महिला गायनतर्फ भने गायिका मीना निरौलाले साथ दिनेछिन्।
‘पलेँटीमार्फत विक्रम दाइसँगको संगतलाई अझ परिमार्जित गर्न पाउनु एउटा छुट्टै सांगीतिक रचनाको अध्ययन गर्नु जस्तै हो। उनले संख्यामा थोरै गीत बनाए पनि तिनको मिठास र गुणले म सँधै आकर्षित भएको छु,’ पलेँटी संयोजक आभास भन्छन्।
यही महिनाको १० गते सुरु हुने विक्रम गुरुङसँगको पलेँटी ३ दिनसम्म चल्नेछ। कार्यक्रमलाई पलेँटीको सुरुवातदेखि नै सञ्चालन गर्दै आएका संगीतकर्मी आभासले संगीतकार विक्रम गुरुङको सांगीतिक जीवनको सेरोफेरोमा रहेर अन्तरसंवाद पनि गर्नेछन्।
कालिकास्थानस्थित ‘आर’शालामा आयोजना हुने पलेँटीमा संगीतकार गुरुङलाई वाद्यवादनतर्फ किबोर्डमा दिनेश रेग्मी, तबलामा सन्देश महर्जन, गिटारमा सुरज प्रधान, प्रकसनमा पारस, बाँसुरीमा बलराम समाल र बेस गिटारमा अम्बर गुरुङ ‘पोखरेली’ले साथ दिनेछन्।
सुरुमा अंग्रेजी महिनाको अन्तिम शुक्रबार एक दिन मात्र हुने गरेको पलेँटी कार्यक्रम केही महिनादेखि महिनाको अन्तिम सप्तान्त- शुक्रबार, शनिबार र आइतबार गरी तीन दिन सञ्चालन हुँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
