नवलपरासी- नेपाली कांग्रेसका महामन्त्री डा शशांक कोइरालाले युवा विदेशतर्फ जानुभन्दा स्वदेशमै सिर्जनात्मक कार्य गर्नुपर्ने र सरकारले तिनलाई उद्यमशीलमुखी कार्यक्रम ल्याउनुपर्नेमा जोड दिएका छन्।
नवलपरासी (बर्दघाट सुस्ता पूर्व) कावासोतीमा दोस्रो नवलपरासी युवा सम्मेलनको उद्घाटनमा बोल्दै उनले युवालाई प्राविधिक सिप प्रदान गर्दै खाडी मुलुक जानबाट रोकी राष्ट्र निर्माणमा प्रयोग कसरी गर्ने भन्ने देशको प्रमुख कार्यसूची हुनुपर्ने बताए।
सम्मेलनमा उद्योगपति विनोद चौधरीले नेपालमा वार्षिक रुपमा चार लाख युवा जनशक्ति बजारमा आउने गरे पनि प्राविधिक शिक्षाको कमीका कारण दक्ष नहुँदा बेरोजगारी समस्या बढेको बताउँदै सरकारले नीतिगत रुपमा शिक्षा प्रणालीलाई परिवर्तन गर्नाको विकल्प नभएको बताएका छन्।
हरियाली संस्था र वातावरण जनजागरण विकास मञ्चको संयुक्त आयोजना तथा विभिन्न संघसंस्थाको सहकार्यमा ‘समाज परिवर्तनका लागि युवा’ भन्ने मूल नाराका साथ आयोजित सम्मेलनमा जिल्लाभरिका करिब सय युवाको सहभागिता छ। दिगो समृद्ध समाज निर्माणमा युवाको महत्वपूर्ण भूमिका हुने र त्यसका लागि युवालाई उत्तरदायी गराई समाजका हरेक कार्यमा युवालाई संलग्न गराउनका लागि सम्मेलनले टेवा पुर्याउने आयोजकले जनाएको छ।
आज सकिने सम्मेलनमा ‘नवलपरासीमा युवाको सम्भावना र चुनौती’, ‘दिगो समृद्ध समाज निर्माणमा युवा’, ‘विश्व सफाइ दिवस’ लगायत विषयमा छलफल हुने कार्यक्रम संयोजक सुधन लम्सालले जानकारी दिए।
सम्मेलनबाट आएका निष्कर्षबाट ‘युवा घोषणापत्र’ जारी गरी नवलपरासीका सम्पूर्ण स्थानीय तहका प्रमुख उपप्रमुखलाई हस्तान्तरण गरिनेछ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
