काठमाडौं- नाइजेरियाले तेस्रो स्थानमा रहँदै आसन्न अफ्रिका कप अफ नेसन्स (अफ्कोन)को यात्रा टुंग्याएको छ।
ओडिओन इघालोको एक मात्र गोलको मद्दतमा नाइजेरियाले ट्युनिसियामाथि १-० को जित हात पार्दै प्रतियोगितामा तेस्रो भएको हो।
५ गोल गर्दै प्रतियोगितामा सबैभन्दा बढी गोल गर्नेको सूचीमा शीर्ष स्थानमा रहेका इघालोले खेलको तेस्रो मिनेटमै नाइजेरियालाई अग्रता दिलाएका थिए। ट्युनिसियाका डिफेन्डर यासिन मेरियले बल क्लियर गर्ने क्रममा आफ्नै गोलरक्षक मोइज बेन चेरिफियालाई लागेर फर्किएपछि इघालोले सो बलको सदुपयोग गर्दै सहज गोल गरेका थिए।
इजिप्टको कारियोमा त्यसपछि दुवै टोलीले गोल गर्ने प्रयास गरे पनि सफल हुन सकेनन्। ट्युनिसियाले खेल अवधिभर ५८ प्रतिशत बल आफ्नो पक्षमा राखे पनि गोल गर्न असमर्थ रह्यो। उसले नाइजेरियातर्फ ११ प्रहार गरे १ प्रहार मात्रै गोलपोष्ट केन्द्रित हुन सकेको थियो।
नाइजेरिया अफ्रिका कप अफ नेसन्सको ३ पटकको च्याम्पियन हो भने ट्युनिसिया सन् २००४ को विजेता हो। जितसँगै नाइजेरिया प्रतियोगितामा आठौं पटक तेस्रो भएको छ।
शुक्रबार हुने फाइनलमा सेनेगलले सन् १९९० को विजेता राष्ट्र अल्जेरियाको सामना गर्नेछ। सेनेगल अल्जेरियाविरुद्ध जित हात पार्दै पहिलो पटक अफ्कोनको ट्रफी उचाल्न चाहन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
