पालनपुर- गुजरातको बनासकाँठा जिल्लाका ठाकोर समुदायले अविवाहित युवतीलाई मोबाइल प्रयोगमा प्रतिबन्ध लगाएको छ। उक्त समुदायले अन्तर्जातीय विवाह गर्नेका आमाबाबुलाई जरिवाना लगाउने उर्दीसमेत जारी गरेको छ।
समुदायका एक नेताका अनुसार दाँतीबाडा तालुकमा १२ गाउँका सुमदायका पाका मानिसले १४ जुलाईमा एक बैठक गर्दै यस्तो निर्णय गरेका हुन्। उनीहरुले सबै गाउँका गाउँलेको सर्वसम्मतिमा यस्तो निर्णय गरेको दाबी गरेका छन्। बैठकमा छिमेकी र अन्य गाउँका प्रतिनिधि र युवा गरी ८ जना ठाकोर नेता उपस्थित भएका थिए।
‘अविवाहित महिलाले मोबाइल राख्न हुँदैन,’ बैठकपछि जारी उर्दीमा लेखिएको छ, ‘यदि उनीहरुलाई मोबाइल फोनका साथ रंगेहात पक्राउ गरिएमा उनीहरुको बाबुआमालाई त्यसको जिम्मेवार ठहर्याइनेछ।’
बैठकले यदि कुनै युवाले अन्तर्जातीय विवाह गरेको पाइएमा उसका आमाबाबुले डेढ लाखदेखि दुई लाख रुपैयाँसम्म जरिवाना तिर्नुपर्ने निर्णय समेत बैठकले गरेको एक नेताले बताए।
दाँतीबाडाको उक्त समुदायका नेता सुरेश ठाकोरले युवतीहरुलाई पढाइमा ध्यान केन्द्रित गराउनका लागि मोबाइलको प्रयोगमा प्रतिबन्ध लगाइएको बताए। विवाह लगायतका कार्यमा अनावश्यक खर्च कम गर्ने यी निर्णयहरुमा उल्लेख रहेको नेता ठाकोरको भनाइ छ। यसमा डिजे, अतिशबाजी र धेरै जन्ती ल्याउनसमेत रोक लगाउने निर्णय बैठकले गरेको उनले जानकारी दिए।
विधायक अल्पेश ठाकोरले विवाहमा हुने अनावश्यक खर्च रोक्ने समुदायको निर्णय आफूले स्वागत गर्ने बताएका छन्। यसले गर्दा शिक्षामा अधिक खर्च गर्न सकिने उनको भनाइ छ।
पछिल्ला केही समयमा यो जिल्लामा अन्तर्जातीय विवाह भएको थियो। बढ्दो अन्तर्जातीय विवाहपछि ठाकोर समुदायले यस्तो निर्णय गरेको हो।
समुदायले जारी गरेको उर्दी अनुसार यदि ठाकोर समुदायका युवती अन्य समुदायका केटाले विवाह गरेमा पनि परिवारले डेढ लाख जरिवाना बुझाउनुपर्नेछ। त्यस्तै ठाकोर समुदायका केटाहरुले अन्य जातिको केटी विवाह गरेमा उनीहरुका परिवारले दुई लाख रुपैयाँ जरिवाना भर्नुपर्ने निर्णय गरिएको छ।
कांग्रेस विधायक गनीबेन ठाकोरले केटीहरुलाई मोबाइल बोक्न प्रतिबन्ध लगाउनुमा कुनै गलत कदम नभएको बताए। उनले यो उमेरमा प्रविधिवाट टाढा रहेर पढाइमा ध्यान दिनु आवश्यक भएको धारणा राखे।
’मलाई हरेक दिन आफ्ना छोरीहरु अन्य समुदायसँग भागेको आमाबाबुले गुनासो गर्न आउने गरेका छन्,’ उनले भने, ‘पछिल्लो एक महिनामा मात्र कम से कम १० मामला यस्तो आयो जसमा उनीहरुका छोरा वा छोरीले नहरमा हाम फालेर आत्महत्या गरे।’
युवतीहरुलाई मोबाइलमा प्रतिबन्ध लगाउने निर्णयलाई सही मान्दै उनले यसका कारण केटाहरुमा पनि नियन्त्रण हुने बताए। केटीहरुले मोबाइल नबोक्नेबित्तिकै केटाहरुमा मोबाइल प्रयोग आफै कम हुने उनको तर्क छ।
‘मोबाइल फोन नबोकेपछि केटीहरु आमाबाबुको साथमै रहन्छन्,’ उनले भने, ‘त्यसैले अन्तरर्जातीय विवाह वा अन्य नाममा आत्महत्या गर्ने काम रोकिन्छ, त्यसैले यो फैसला ठिक छ।’
(द वायरबाट अनूदित। प्रतीकात्मक तस्बिर : रोयटर्स)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
