वासिङ्टन- अमेरिकी विदेशमन्त्री माइक पोम्पेओले इरानी विदेशमन्त्री मोहमद जाभेद जारिफलाई संयुक्त राष्ट्रसंघीय मुख्यालय भ्रमणको लागि प्रवेशाज्ञा प्रदान गरिएको जानकारी दिएका छन्।
उक्त जानकारीले इरान र अमेरिका बीच चलिरहेको पछिल्लो वाकयुद्धका बारेमा सकारात्मक सन्देश जाने अनुमान गरिएको छ।
इरानी प्रतिनिधिमण्डलका अन्य सदस्यहरूको टोलीसहित आइतबार न्युयोर्क पुगेका इरानी विदेशमन्त्री जारिफलाई संयुक्त राष्ट्रसंघको मुख्यालय र त्यहाँ रहेको संयुक्त राष्ट्रसंघको लागि इरानी मिसनको कार्यालयसम्म यात्रा गर्न अनुमति दिइएको पोम्पोओले बताएको 'वासिङ्टन पोस्ट' पत्रिकाले जनाएको छ।
तर, इरानी कूटनीतिज्ञको यो भ्रमणलाई न्युयोर्कस्थित संयुक्त राष्ट्रसंघीय मुख्यालय वरपर मात्र सीमित गराइने भएको पनि अमेरिकी विदेश मन्त्रालयले जानकारी दिएको छ।
अमेरिकी कूटनीतिज्ञहरु तेहरानको वरपर भ्रमण गर्दैनन् त्यसैले इरानी कूटनीतिज्ञहरुलाई पनि न्युयोर्क सहरको आसपास स्वतन्त्र रूपमा भ्रमण गर्नुपर्ने कुनै कारण नदेखिएको पोम्पेओलाई उद्धृत गर्दै सो पत्रिकाले जनाएको छ।
हालैका केही महिनायता वासिङ्टन र तेहरानबीच सैन्य विवादसहितको वाकयुद्ध जारी रहेको छ। इरानमाथिको अमेरिकी नाकाबन्दीका कारण पनि सम्बन्ध बिग्रिएको बताइएको छ।
यसअघि आइतबार बिहान मात्रै अमेरिकाले इरानमाथि लगाएको प्रतिबन्ध फुकुवा गरेमा इरान अमेरिकासँग वार्ताको लागि तयार भएको इरानका राष्ट्रपति हसन रौहानीले बताएका थिए। रासस/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
