बङ्गलादेश- अत्यधिक मनसुनी वर्षाका कारण आएको बाढी र डुवानमा परी बङ्गलादेशको दक्षिणपूर्वी क्षेत्रमा रहेका रोहिंग्या शरणार्थी शिविरमा बस्दै आएका करिब ५ हजार शरणार्थीले वासस्थान गुमाएका अधिकारीहरूले आइतबार जनाएका छन्।
बङ्गलादेशको मौसम विज्ञान विभागले भनेको छ, 'म्यानमारबाट शरणार्थीका रूपमा बङ्गलादेशको कोक्स बजार क्षेत्रमा आई बसेका करिब ५ हजार परिवार शरणार्थी बाढी र डुवानका कारण पछिल्ला केही दिनयता विस्थापित बनेका छन्।'
अन्तर्राष्ट्रिय शरणार्थी संगठन (आइओएम)ले भनेको छ, 'अप्रिलदेखि जुलाई मध्यसम्म उक्त शिविरमा रहेका करिब १० जना रोहिंग्या शरणार्थीको बाढी र डुवानका कारण मृत्यु भएको छ भने ४ हजार ८ सय ८९ घर टहरा डुवानमा परेका छन्।'
शरणार्थी शिविरमा जुलाई २ देखि डुवानको समस्या भएको र कतिपय स्थानमा दुई फिटभन्दा बढी पानी जम्मा भएकाले उनीहरू शिविरबाट विस्थापित बनेका हुन्। बाँसले बनेका कमजोर संरचनालाई वर्षापछि आएको बाढीले सयौँ घर टहरालाई बगाएको पनि आइओएमले जनाएको छ।
म्यानमारको सीमा क्षेत्रमा बङ्गलादेशी भूमीमा घरटहरा रहेका र भिरालो क्षेत्रमा करिब २ सयभन्दा बढी स्थानमा पहिरो गएकोले शिविरको बसोबासमा खतरा सिर्जना भएको संयुक्त राष्ट्रसंघले पुष्टि गरेको छ। अप्रिलपछि कम्तीमा १० जना शरणार्थीको मृत्यु भएको र ६ हजारभन्दा बढी शरणार्थी विस्थापित बनेका राष्ट्र संघले पनि जनाएको छ।
विस्थापितहरूले आफूहरूलाई अत्यधिक वर्षापछि आएका पहिरोका कारण खाद्यान्न वितरण केन्द्रसम्म पनि पुग्न कठिनाई हुँदा दैनिक खानेकुराको समस्यासमेत भएको बताएका छन्।
विश्व स्वास्थ्य संगठनका प्रवक्ता गेम्मा स्नोडनले भने, 'मनसुनी समस्याका कारण शिविरहरूमा थप सहयोगका वृद्धि गर्नका लागि समस्या उत्पन्न भएको छ।'
अहिलेसम्म बाढी, पहिरो, र डुवानमा परेका करिब ११ हजार ४ सय शरणार्थीलाई थप खाद्यान्न तथा बन्दोबस्तीका सामान आवश्यक रहेको उनले बताए। अघिल्लो वर्ष जुलाईको अन्त्यसम्म जम्मा ७ हजार शरणार्थीलाई यस प्रकारको सहयोग वितरण गरिएको जनाउँदै यस वर्ष थप सहायताको आवश्यकता हुने रोहिंग्याको सङ्ख्या अत्यधिक बढेको उनले बताए।
बङ्गलादेशमा करिब १० लाख रोहिंग्या शरणार्थी शिविरमा बस्दै आएको आइओएमको अनुमान छ। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
