काठमाडौं– नेपाली कांग्रेसका नेता प्रकाशमान सिंहले राजनीतिमा लाग्ने सबै खराब नभएको भन्दै सबैलाई एउटै डालोमा हाल्न नहुने बताएका छन्।
आइतबार रामहरी जोशी प्रतिष्ठानले आयोजना गरेको कार्यक्रममा बोल्दै नेता सिंहले केहीले गलत गरे भन्दैमा समग्र राजनीतिलाई नै गाली नगर्न आग्रह गरे।
‘हरेक क्षेत्रमा केही खराब मान्छे हुन्छन्। तीनका कारण सबैलाई खराब नभनौं,’ नेता सिंहले भने, ‘राजनीतिमा रहेका राम्रा मान्छेलाई पनि समाजले चिन्नुपर्छ।’ राजनीतिमा रहेका राम्रा मान्छेलाई समाजले चिनेमा खराब मानिस आफैं राजनीतिबाट हट्दै जाने उनको भनाइ थियो।
कांग्रेसका संस्थापक नेता जोशीको दोस्रो स्मृति दिवसको कार्यक्रममा उनले आफ्ना पिता गणेशमान सिंह र जोशीको सरकार जीवनशैली र सादगीपनले आफूलाई सधैं प्रेरित गरिरहने बताए।
त्यस्तै कार्यक्रममा पूर्व सभामुख दमननाथ ढुंगानाले जोशीको जस्तो मूल्यमान्यताको राजनीति गर्नेहरूको संख्या नेपाली राजनीतिमा बढाउनुपर्नेमा जोड दिए। ‘उहाँ मधेस र पहाडलाई जोड्ने व्यक्ति हुनुहुन्थ्यो,’ ढुंगानाले भने, ‘के का लागि राजनीति गर्दैछु भन्ने उहाँलाई थाहा थियो। तर, अहिले राजनीतिमा किन आएको? भन्ने प्रश्नको जवाफै नभएकाहरू आएका छन्।’ उनले नयाँ पुस्तालाई मूल्यमान्यतासहितको संस्कृति निर्माण जरुरी रहेको बताए।
कांग्रेस नेता महेश आचार्यले जोशीसँग ०४८ सालको मन्त्रिपरिषद्मा सँगै बसेर काम गर्दै थुप्रै कुरा सिक्न पाएको भन्दै जोशीलाई आफ्नो अभिभावकका रुपमा स्मरण गरे।
‘उहाँ राजनीतिलाई सत्ता होइन समर्पणसँग जोड्ने पुल बनेर आउनुभयो,’ आचार्यले भने, ‘समताको संस्कृतिलाई कांग्रेसमा भित्र्याउने नेताका रुपमा उहाँलाई लिन्छु।’ संस्कतिविद् डा रामदयाल राकेशले जोशीको साहित्यिक पाटोका बारेमा चर्चा गरे।
कार्यक्रममा सिन्धुली कांग्रेसका सभापति उज्ज्वल बराल, सर्लाही कांग्रेसका पूर्व सभापति लक्ष्मणलाल राय, प्रतिष्ठानका संयोजक विनोद खनाल, प्रतिष्ठानकै रघु कार्की, अधिवक्ता जगन्नाथ दुलाल लगायतले जोशीको समाजवादी जीवनशैलीबाट कांग्रेस नेताहरूले सिक्नुपर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749801778.jpg)
-1749826086.png)
