राष्ट्रपतिको घरमा कलाकार नचाउँदा करिष्माको आपत्ति, ट्वाइलेटको कमोडमा बस्नुपर्दा सरोजको पछुतो

इन्टरटेनमेन्ट लाइभ

नेपाल लाइभ आइतबार, असार २९, २०७६ १४:३७

काठमाडौं– शुक्रवार राष्ट्रपति भवनमा सम्पन्न राष्ट्रिय चलचित्र पुरस्कार वितरण समारोह नतिजाका कारणमात्रै नभएर कमजोर व्यवस्थापनका कारण पनि विवादमा तानिएको छ।

०७३, ०७४ र ०७५ सालगरि तीन वर्षको अवार्ड एकैपल्ट बाँडिएको समारोहमा यसपाली सहभागीलाई ‘बोर’ नहोस् भनेर चलचित्र विकास बोर्डले पुरानादेखि नयाँ कलाकारसम्मको नृत्य प्रस्तुतिसमेत व्यवस्थापन गरेको थियो।

राष्ट्रपतिको घरमा कलाकारलाई नाच्न लगाएकोमा अभिनेत्री करिष्मा मानन्धरले विरोध गरेकी छन्। अवार्ड समारोह सम्पन्न भएपछि सामाजिक सञ्जाल फेसबुकमा उनले राष्ट्रपतिलाई कटाक्ष गर्दै लेखेकी छन्, ‘एकादेशको कथा, पहिला पहिला देशमा राजा हुन्थ्यो र राजा पनि प्रज्ञा प्रतिष्ठानको हलमा कलाकारलाई हेर्न आउँथे! घर गएर नाच्न बिल्कुलै स्वीकार्य छैन। बाहिर आउनुस् तपाईं हाम्रो आमा हो। हामी तपाईंको लागि ज्यान दिन्छौं।’

करिश्माले आपत्ति जनाएर स्टाटस् लेखेपछि यसमा अभिनेता सरोज खनालले समेत सहमति जनाएका छन्।

उनी स्वयम् राष्ट्रप्रति निवासमा आयोजित कार्यक्रममा नाच्नेमध्ये एक हुन्।

‘म तिम्रो विचारदेखि पुर्ण सहमत छु,’ करिष्माको स्टाटसमा उनले कमेन्ट गरेका छन्, ‘नृत्य गुरुका कारण मैले नाई भन्न सकिनँ तर त्यो ठाउँमा यो नै मेरो पहिलो र अन्तिम प्रस्तुति हो।’

करिष्माले बल्ल महसुस गर्नुभयो भनेर प्रतिप्रश्न गरेपछि उनको पछुतो त्यतिमै सीमित देखिएन, आयोजकको कमजोर व्यवस्थापनका कारण ट्वाइलेटको कमोडमा बसेर नाच्ने पालो कुर्नुपरेको तितो यथार्थ समेत उनले बाहिर ल्याइदिए।

करिष्माकै स्टाटसमुनि उनले ट्वाइलेटको कमोडमा बस्नुपरेको फोटो सार्वजनिक गर्दै लेखे, ‘सम्मानित हुने र सन्मान गर्ने त सोफामा बिराजमान थिए तर हामी पर्फमर करिब ३५ जनालाई ८ बाइ १०को कोठामा कोचेर राखे। म चाहिँ ट्वाइलेटको कमोडमा बसेर आफ्नो पालो पर्खी बसेँ। के गरुँ, आफ्नै क्षेत्रको दुर्दशा पब्लिकलाई देखाएर आफ्नै बेइज्जत हुन्छ र सेयर गरिनँ तर ‘मनको बह कसैलाई कह’ भन्छन्, त्यसैले मैले तिमीसँग सेयर गर्न चाहेँ।’

सोही कार्यक्रममा नृत्य प्रस्तुत गरेका अभिनेता रमेश उप्रेतीले समेत सरोज र करिष्माको विचारमा सहमति जनाएका छन्। राष्ट्रपति भवन अब उप्रान्त नेसनल फिल्म अवार्ड नहुनुपर्ने उनको तर्क छ।

अवार्ड कार्यक्रममा सरोजसँगै गौरी मल्ल, रमेश उप्रेती, दिपिल रायमाझी, दीपाश्री निरौला, जितु नेपाल, रेजिना उप्रेती, केदार घिमिरे, पुष्प खड्का, नीता ढुंगाना, पवित्रा आचार्य, बिमला के.सी., छुल्ठिम गुरुङ लगायत कलाकारले नाचेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

पाकिस्तानले घोषणा गर्यो भारतविरुद्ध अपरेशन ‘बुन्यान उल मर्सूस’

आजदेखि वीरेन्द्रनगरमा ‘कर्णाली छोरी सम्मेलन’ हुँदै

आजको मौसमः पहाडी क्षेत्रमा आंशिक बदली, मुख्यतया सफा रहने