काठमाडौं- लन्डनको ऐतिहासिक लर्डस् मैदानमा विश्वले आइतबार क्रिकेटको नयाँ च्याम्पियन पाउनेछ। यो न्युजिल्यान्ड र इंग्ल्यान्डमध्ये कोही पनि हुनसक्छ। यी दुवै टोली आइसिसी विश्वकप क्रिकेट २०१९ को उपाधिका लागि खेल्दैछन्।
न्युजिल्यान्ड ४ वर्षपछि फेरि फाइनलमा पुगेको हो भने इंग्ल्यान्ड २७ वर्षपछि विश्वकपको नजिक आइपुगेको छ। ४४ वर्षको इतिहासमा विश्वकप उचाल्ने उसको यो चोथो कोशिस हो।
यही डरका कारण फेरि एकपटक कोशिस असफल नहोस् भन्नेमा सचेत छ इंग्ल्यान्ड। किनकी यसअघिका ३ वटा प्रयासले हावा खाइसकेका छन्।
आइतबारको फाइनल खेल क्रिकेटको 'मक्का' मानिने लर्डस्को मैदानमा हुनेछ। सन् १९७९ मा माइक ब्रेयरलीको नेतृत्वमा यही मैदानमा पहिलोपल्ट फाइनल पुगेर इंग्लान्ड असफल भएको थियो। वेस्टइन्डिजले उसलाई ९२ रनले हराएर दोस्रो पटक विश्व च्याम्पयन बनेको थियो
इंग्ल्यान्डलई दोस्रो पटक विश्वकप जित्ने मौका १९८७ मा पनि मिलेको थियो। भारत र पाकिस्तानले संयुक्तरुपमा आयोजना गरेको खेलमा भारतलाई हराएर इग्ल्यान्ड फाइनलमा पुगेको थियो। तर, यसपटक पनि इंग्ल्यान्डको उपाधि जित्ने चाहनामा अष्ट्रेलिया बाधक बनिदियो। अष्ट्रेलिया ७ रनले विजयी भएको थियो।
इंग्ल्यान्ड तेस्रो पटक १९९२ मा पनि विश्वकपको फाइनलमा पुग्यो। तर, वर्तमान पाकिस्तानी प्रधानमन्त्री तथा पूर्व कप्तान इमरान खान नेतृत्वको पाकिस्तानी टिमले उसलाई वर्ल्डकप उचाल्नबाट रोक्यो।
यसपल्ट इंग्ल्यान्ड च्याम्पियन बन्ने कुरामा अनेक तर्क गरिएको छ। पहिलो तर्क यस्तो छ की इंग्ल्यान्ड आयोजक देश हो। यसअघि २०११ मा भारतले विश्वकप जित्दा उ पनि आयोजक थियो भने २०१५ मा अष्ट्रेलियाले पनि आयोजक भएरै विश्वकप देश बाहिर जान दिएको थिएन।
.jpg)
तर, तथ्य यो छ की घरेलु मैदानमा भएको सन् १९७९ को विश्वकपको शिर्ष २ मा पुगेर पनि इंग्ल्यान्ड विश्वकप हत्याउन असफल भएको थियो।
अब यो विश्वकपमा इंग्ल्यान्डको प्रदर्शन र उसको बलियो टिमको कुरा गरौं।
इंग्ल्यान्डले फाइनलमा पुगेको अर्को टिम न्युजिल्यान्डलाई लिग चरणमा ठूलो अन्तरले हराएको थियो। उक्त खेलमा इंग्ल्यान्डले ३ सय ५ रन बनाएको थियो। तर, न्युजिल्यान्ड १ सय ८६ रनमै समेटिएको थियो।
अब कुरा गरौं न्युजिल्यान्डको विश्वकप फाइनल यात्राको। न्युजिल्यान्ड बलियो टिम मानिने भए पनि उसले विश्वकप इतिहासमा फाइनल पुग्न ४० वर्ष कुर्नुपरेको थियो।
सन् २०१५ मा अष्ट्रेलियासँग संयुक्तरुपमा विश्वकप आयोजना गरेको न्युजिल्यान्ड पहिलो पटक फाइनल पुगेको थियो। पहिलो पटक उपाधि जित्ने होडमा रहेको न्युजिल्यान्डका लागि अर्को आयोजक राष्ट्र अष्ट्रेलिया बाधक बनेको थियो। लगातार दोस्रो पटक उपधिनजिक पुगेको न्युजिल्यान्डले यसपटक आफ्नो टोलीमाथि लाग्दै आएको 'अभागी'को ट्यागलाई उतार्ने लक्ष लिएको छ।
सन् २०१५ मा बलिङ, ब्याटिङ तथा फिल्डिङमा चुस्त रहेको न्युजिल्यान्डको टोलीको स्तर ४ वर्षपछि विश्वकप फाइनल पुग्दा पनि घटेको छैन, बरु सुधार भएको मान्छन् विश्लेषकहरु पनि।
के भन्छन् कप्तान?
यसअघि एक कदम पछि परेको उक्त अवस्था यसपटक पनि दोहोरियोस् भन्ने पक्षमा न्युजिल्यान्ड छैन। प्रि-म्याच कन्फ्रेन्समा बोल्दै न्युजिल्यान्डका कप्तान केन विलियम्सनले किवी टोली लर्डस् मैदानमा भिड्न तयार रहेको बताएका थिए। उनले आइतबारको खेलमा इंग्ल्यान्ड सबैको रोजाइमा परे पनि आफूहरु त्यसलाई चिर्दै एक कदम अघि बढ्ने उद्घोष गरेका थिए।
.jpg)
'यस खेललाई लिएर मान्छेले विभिन्न कुरा र आँकलनहरु गरिरहेका छन्। तर, आइतबारको अन्तिम समयसम्म यो एक खेल मात्र हुनेछ। जसका लागि हामी तयार छौं,' उनले भने।
उता इंग्ल्यान्डका कप्तान इयान मोर्गनले पनि युवा खेलाडीका लागि यो विश्वकप 'आइकोनिक' हुने भन्दै आफूहरु आफ्नै घरमा विश्वकप ट्रफी उठाउन तयार रहेको आत्मविश्वस जताएका थिए।
टिम सन्तुलनमा को बलियो?
प्रतियोगिता सुरु हुनुअघि यो विश्वकपमा भारत र इंग्ल्यान्ड सबैभन्दा ठूला दाबेदार मानिएका थिए। भारतीय टिम सेमिफाइनलमा न्युजिल्यान्डसँग सुरुवाती अवस्थामा सम्हालिन नसक्दा सेमिफाइनलबाटै बाहिरियो।
टिमका सुरुवाती खेलाडी जेसन रोय र जोनी वेरिस्टोले प्रतियोगितामा ९ सय २२ रन जोडिसकेका छन्। मध्यक्रममा जो रुटले ५ सय ४९, बेन स्टोक्सले ३ सय ८१ रन र कप्तान इयान मोर्गनले ३ सय ६२ रन बनाएका छन्।
उता उपाधिको दाबेदार न्युजिल्यान्ड ब्याटिङतर्फ भने केही कमजोर देखिन्छ। न्युजिल्यान्डको ब्याटिङ 'लाइनअप'मा नजर लगाउने हो भने कप्तान केन विलियम्सन र रोस टेलरलाई छाडेर कुनै पनि ब्याट्सम्यानले प्रतियोगिताभर ३ सय रनको आँकडा पार गर्न सकेका छैनन्। प्रारम्भिक र मध्यक्रमका अन्य ब्याट्सम्यान अन्य खेलमा जस्तै नचल्ने हो भने आइतबार न्युजिल्यान्डलाई घरेलु मैदानमा इंग्ल्यान्डलाई रोक्न मुश्किल पर्न सक्छ।
त्यसमाथि फाइनलमा न्युजिल्यान्ड कप्तान विलियम्सन र इंग्ल्यान्डका जो रुट एक विश्वकपमा सबैभन्दा बढी रन बनाउने किर्तिमान भंग गर्ने संघारमा छन्। सन् २००३ को विश्वकपमा 'मास्टर ब्लास्टर' सचिन तेन्दुलकरले बनाएको ६ सय ७३ रनको रेकर्ड तोड्न विलियम्सन र रुट क्रमशः १ सय २६ र १ सय २५ रन पछाडि छन्। यसकारण पनि फाइनलमा यी दुवैको प्रदर्शनमा सबैको नजर रहन्छ।
यसअघि उक्त रेकर्डको नजिक पुगेर पनि भारतका रोहित शर्मा (६ सय ४८ रन) र अष्ट्रेलियाका डेभिड वार्नर (६ सय ४७ रन) उक्त सफलता हात पार्न पछि परेका थिए।
.jpg)
बलरहरुमा इंग्ल्यान्डका जोफ्रा आर्चरले १९ विकेट, मार्क उडले १७ र क्रिस वोक्सले १३ विकेट लिइसकेका छन् भने स्पिनर आदिल रशिदको नाममा ११ विकेट दर्ता छ। इंग्ल्यान्डका शीर्ष ४ बलरले ६० विकेट लिइसकेका छन्। यसरी हेर्दा टिम इंग्ल्यान्डको सन्तुलन बलियो भन्न सकिन्छ।
तर, बलिङतर्फ भने न्युजिल्यान्डको प्रदर्शन पनि कमजोर छैन। उसका पनि सुरुवाती ४ बलरले ६० विकेट नै पतन गराइसकेका छन्। न्युजिल्यान्डका लोकी फर्गुसन(१९ विकेट), अष्ट्रेलियाविरुद्ध ह्याट्रिक लिएका ट्रेन्ट बोल्ट (१७ विकेट), म्याट हेनरी (१३ विकेट) र जेम्स निसम (१२ विकेट) न्युजिल्यान्डको बलिङका धारहरु हुन्।
भारत र स्वयम् न्युजिल्यान्डलाई समूह चरणमा र सेमिफाइनलमा बलियो अष्ट्रेलियामाथि शानदार जित हात पार्दै प्रतियोगितामा पुनरागमन गरेको इंग्ल्यान्ड र उपाधि दाबेदार भनेर राम्रो भनेर विश्लेषण गरिएको भारतीय टिमलाई परास्त गरेर फाइनलमा पुगेको न्युजिल्यान्डबीचको खेल रोमाञ्चक र प्रतिस्पर्धात्मक हुने अपेक्षा गरिएको छ।
लामो बाउन्ड्री रहेको यस मैदानमा मौसमका कारण पहिले ब्याटिङ गर्दा फाइदा पुग्ने खेल विश्लेषकहरुले अनुमान गरेका छन्। यसले गर्दा टस कसले जित्छ भन्नेमा पनि खेल निर्भर रहने बताइएको छ।
हालसम्म अष्ट्रेलियाले ७ पटक विश्वकप जित्दा भारत र वेस्टइन्डिज २/२ पटक यसको भागिदार भइसकेका छन्। श्रीलंका र पाकिस्तानले १/१ पटक विश्वकपको उपाधि घर भित्र्याएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
