काठमाडौं- श्रीलंकाका लागि नेपाली राजदूत प्रा डा विश्वम्भर प्याकुरेलले राजीनामा दिएका छन्।
परराष्ट्र मन्त्रालयका प्रवक्ता भरतराज पौडेलले त्यसको पुष्टि गरे। ‘उहाँले राजीनामा दिनु भएको रहेछ, त्यो स्वीकृत भएको छ,’ उनले भने।
राजीनामा दिनुको कारणबारे भने आफूलाई जानकारी नभएको उनले बताए।
उनले परराष्ट्र प्रशासनप्रति असन्तुष्टि देखाउँदै पदबाट राजीनामा दिएको बुझिएको छ। प्याकुरेल २३ बैसाख २०७४ मा श्रीलंकाका राजदूतमा नियुक्त भएका थिए।
लामो समय अर्थशास्त्रको प्राध्यापन गरेका उनी शेरबहादुर देउवा प्रधानमन्त्री रहँदा राजदूत नियुक्त भएका थिए।
उनको राजीनामा साउन १ गतेदेखि लागू हुने गरी गएको मंगलबार सरकारले स्वीकृत गरेको हो।
देउवाको पालामा नियुक्ति लिएर गएका अन्य राजदूतलाई यसअघि नै फिर्ता बोलाइए पनि प्याकुरेल र जापानका लागि नेपाली राजदूत रहेका प्रतिभा राणालाई भने फिर्ता बोलाइएको थिएन।
परराष्ट्रमन्त्री प्रदीप ज्ञवालीले प्याकुरेललाई आफ्नो राजीनामामा पटक-पटक पुनर्विचार गर्न आग्रह गरेका थिए।
अर्थशास्त्रमा विद्यावारिधि गरेका प्याकुरेल 'फुलब्राइट स्कलर'समेत हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
