काठमाडौं– विनोद भण्डारीले विष्फोटक ब्याटिङ गरेपछि नेपालले मलेसियालाई १ सय ७४ रनको लक्ष्य दिएको हो।
मलेसियासँगको २ खेलको मैत्रिपूर्ण टी-२० क्रिकेट शृंखलाअन्तर्गतको दोस्रो खेलमा नेपालले ६ विकेटको क्षतिमा १ सय ७३ रनको योगफल खडा गरेको हो।
क्वालालम्पुरको किनरारा एकेडमी ओभल मैदानमा टस जितेर पहिले ब्याटिङ गरेको नेपालका लागि विनोद भण्डारीले २५ बलमा अविजित ५१ रनको पारी खेले। उनको पारीमा ३ चौका र ५ छक्का सामेल थियो।
शरद भेसवाकरले ४० रन जोडे। सर्भिन मुनियन्दीको बलमा अमिनुन्दिन राम्लीको हातबाट समातिनुअघि भेसवाकरले ४ चौका र २ छक्का प्रहार गरेका थिए। पहिलो ६ ओभरमा ३ विकेट गुमाएर दबाबमा आएको नेपालको इनिंग्सलाई मध्यक्रममा ब्याट्सम्यानले उकासेका थिए।
रोहित पौडेलले १९ रन बनाउँदा करण केसी १६ रनमा पेवलियन फर्किए। यसअघि आक्रामक सुरुवात गर्न खोजे पनि पहिलो विकेटको रुपमा पवन सर्राफलाई नेपालले गुमाएको थियो।
टप एज लागेर आकासिएको बललाई क्याच गर्न नसके पनि मलेसियाका बलर सैयद अजिजले सर्राफलाई रन आउट गराएका थिए। सर्राफले ११ बलमा २ चौकाको मद्दतमा १० रन बनाए। सर्राफपछि मैदानमा उत्रिएका उपकप्तान ज्ञानेन्द्र मल्ल पनि ३ बल मात्रै खेलेर ७ रनमा पेवेलियन फर्किए। उनले एक छक्का प्रहार गरेका थिए।
प्रारम्भिक ब्याट्सम्यानको रुपमा मैदानमा उत्रिएका कप्तान पारस खड्का पनि २३ रनमा क्याच आउट भए। १९ बल खेलेका उनले २ चौका र २ छक्का प्रहार गर्दै नेपाललाई आक्रमक सुरुवात दिन चाहे पनि पारी लामो समयसम्म टिक्न सकेन। उनले शनिबार भएको पहिलो खेलमा अविजित ८६ रन बनाउँदै नेपाललाई ७ विकेटको सहज जित दिलाएका थिए।
मल्ल र खड्कालाई मलेसियाका फित्री सामले छैटौं ओभरको दोस्रो र तेस्रो बलमा क्याच आउट गराएका थिए।
मलेसियाका फित्री सामले ३ विकेट लिँदा मुनियन्दी र सइद अजिजको नाममा समान १/१ विकेट रह्यो।
१ सय ७४ रनको लक्ष्य पछ्याएर अहिले मलेसियाले ब्याटिङ गरिरहेको छ।
साउन ६ देखि सिंगापुरमा हुने टी-२० विश्वकप छनोट खेल्नुअघि नेपाल मैत्रिपूर्ण खेलका लागि मलेसिया पुगेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
