लाउडा र गोविन्दराज जोशीको भ्रष्टाचार मुद्दा हेर्न नमिल्ने न्यायाधीशको इजलासमा

सर्‍यो सुनुवाइ
नेपाल लाइभ | २०७६ असार २६ बिहीबार | Thursday, July 11, 2019 १७:४१:०० मा प्रकाशित

काठमाडौं- सर्वोच्च अदालतमा प्रत्येक दिन कार्यालय समय सुरु हुने बित्तिकै प्रधानन्यायाधीशले मुद्दाको पेशी तोक्ने गर्दछन्।

बिहान दश बजे इजलास बस्नुअघि नै कसले कुन मुद्दा हेर्ने उनैले तय गर्दछन्। सर्वोच्च अदालतमा विगतदेखि नै प्रधानन्यायाधीशले यसरी नै मुद्दा तोक्दै आएका छन्  

मुद्दाको पेशी तोक्नुअघि प्रधानन्यायाधीशले 'हेर्न नमिल्ने', 'हेर्दाहेर्दै' रहेका र 'अन्य विषय'का मुद्दा हेर्छन्। 'हेर्न नमिल्ने' मुद्दामा न्यायाधीशको नाम सोही मुद्दाको फाइलमा नै उल्लेख हुने गर्दछ। 

तरपनि बिहिबार सर्वोच्चमा लामो समयदेखि चलिरहेका हेर्न नमिल्ने दुई भ्रष्टाचारका मुद्दा न्यायाधीशको इजलासमा पेशी तोकिएको छ।

मुद्दाको पेशी तोक्नुअघि जानकारी नहुँदा हेर्न नमिल्ने न्यायाधीशको इजलासमा पेशी परेको भन्दै उक्त मुद्दाको सुनुवाइ सरेको छ। 

१६ वर्षदेखि अदालतमा घुमिरहेको बहुचर्चित लाउडा विमान भ्रष्टाचार काण्ड र सात वर्षदेखि सर्वोच्च घुमिरहेको पूर्वमन्त्री गोविन्दराज जोशीको मुद्दा तोकिएका न्यायाधीशले हेर्न नमिल्दा सुनुवाइ सरेको हो।

२०५७ सालमा लाउडा एयरको विमान भाडा प्रकरणमा भ्रष्टाचार भएको दाबीसहित अख्तियार दुरुपयोग अनुसन्धान आयोगले २०५८ सालमा तत्कालीन संस्कृति, पर्यटन तथा नागरिक उड्डयनमन्त्री तारिणीदत्त चटौतलगायत विरुद्ध दर्ता गराएको मुद्दा पनि हालसम्म किनारा लाग्न सकेको छैन।  

२०७४ बैशाख ७ गते २ न्यायाधीशको इजलासमा राय बाझिएपछि यो मुद्दा पूर्ण इजलासमा आएको थियो। न्यायाधीश ईश्वर खतिवडा र शारदाप्रसाद घिमिरेको इजलासले फरकफरक राय दिएको थियो। 

तर सर्वोच्चले बिहीबार उक्त मुद्दाको पेशी ईश्वर खतिवडासहितको पूर्ण इजलासमा तोकेको थियो। खतिवडाले यसअघि नै आफ्नो राय दिएकाले उनले उक्त मुद्दा हेर्न मिल्दैन। यसरी हेर्न नमिल्ने हुँदा उक्त मुद्दाको सुनुवाई साउन पहिलो साताका लागि पुगेको छ। उक्त मुद्दा न्यायाधीश खतिवडा, प्रधानन्यायाधीश चोलेन्द्र शमशेर राणा र शारदाप्रसाद घिमिरेको इजलासले हेर्न मिल्दैन।

लाउडा प्रकरण हालसम्म १० पटक पूर्ण इजलासमा पेशी तोकिएको छ। तर एकपटक पनि सुनुवाई हुन सकेको छैन। चारपटक पक्षका कानुन व्यवसायीले मुद्दा सारेका छन् भने ३ पटक हेर्न नभ्याइने र २ पटक हेर्न नमिल्ने इजलासमा पेशी परेर सुनुवाई सर्दै आएको छ। 

पूर्वप्रधानमन्त्री गिरिजाप्रसाद कोइरालासमेत विवादमा तानिएको लाउडा विमान खरिद प्रकरणमा तत्कालीन पर्यटनमन्त्री तारणीदत्त चौटौतसहित १० जना विरुद्ध अख्तियारले भ्रष्टाचार मुद्दा दायर गरेको थियो। हालका प्रधानन्यायाधीश राणा विशेष अदालतमा हुँदा सबैले सफाई पाएका थिए। 

यसैगरी, कांग्रेस नेता जोशीको मुद्दा न्यायाधीशद्वय हरिकृष्ण कार्की र डम्बरबहादुर शाहीको इजलासमा पेशी तोकिएको थियो। न्यायाधीश नियुक्त हुनुअघि कार्कीले जोशीका तर्फबाट कानुन व्यवसायीका रुपमा बहस गरेका थिए। कानुन व्यवसायी हुँदा हुनुपर्ने वकालत गरेका कारण कार्कीले उक्त मुद्दा हेर्न मिल्दैन। जोशीको मुद्दा कार्कीबाहेक प्रधानन्यायाधीश चोलेन्द्र शमशेर राणा, पुरुषोत्तम भण्डारी र केदारप्रसाद चालिसेलेसमेत उक्त मुद्दा हेर्न मिल्दैन। 

७ वर्षदेखि लगातार सर्दै आएको जोशीको मुद्दा फेरि १५ दिनका लागि सुनुवाई सरेको छ। २०६९ फागुन ८ मा सर्वोच्चमा दर्ता भएको सो मुद्दा विभिन्न बाहनामा सुनुवाई सर्दै आएको छ। 

अन्तिम सुनुवाईका लागि २०७३ सालमै सर्वोच्च अदालत पुगेको थियो। तर पछिल्लो पटक सर्वोच्चले जोशीको फाइल मगाउन आदेश गर्दै प्राप्त नभएमा अख्तियारका कर्मचारीलाई कारबाही हुने चेतावनी दिएको थियो। उक्त आदेशपछि अख्तियारले सर्वोच्चलाई फाइल फेला पर्न नसकेको जवाफ पठाएको छ। 

जोशीको मुद्दा चलिरहँदा सर्वोच्चमा ५ प्रधानन्यायाधीश परिर्वतन भइसकेका छन्। उक्त मुद्दा ७ पटक पक्षका वकिलले सारेका छन् भने ३ पटक विपक्षका कानुन व्यवसायीले सारेका हुन्। 

जोशीको मुद्दा ११ पटक 'हेर्न नमिल्ने' भनिएको थियो भने ७ पटक 'हेर्न नभ्याइने' हुँदै पेशी सरेको थियो। अहिलेसम्म ६२ जना न्यायाधीशको इजलासमा जोशीको मुद्दा घुमिसकेको छ। ३१ संयुक्त इजलासमा जोशीको मुद्दा पेशी तोकिँदै सुनुवाई टर्दै आएको  छ।