काठमाडौं- जिल्ला अदालत काभ्रेपलान्चोकले बाल यौन दुराचारमा संलग्न युएनका पूर्व कर्मचारीलाई १६ वर्षको जेल सजाय तोकेको छ। जिल्ला अदालतले ६० वर्षीय क्यानडियन नागरिक पिटर जोन डालगिल्सलाई दुई बालकमाथिको यौन दुराचारमा दोषी रहेको ठहर गर्दै ९ वर्ष र ७ वर्ष गरी कूल १६ वर्ष जेल सजाय हुने फैसला सुनाएको हो।
पिटरले अब अधिकतम ९ वर्ष कैद सजाय भोग्नुपर्नेछ। जिल्ला न्यायाधीश अर्जुन अधिकारीको इजलासले युएनका पूर्व कर्मचारीसमेत रहेका डालगिल्सलाई बाल यौन दुराचारमा कसुरदार ठहर गर्दै सजाय तोकेको हो। जिल्ला अदालत काभ्रेले यसअघि नै जेठ २६ गते उनलाई दोषी ठहर गर्ने फैसला सुनाए पनि सजाय भने सोमबार मात्रै तोकेको हो।
प्रहरीले उनलाई २०७४ चैत २५ गते बाल यौन दुराचार गरेको अभियोगमा पक्राउ गरेको थियो। विपन्न परिवारका बालबालिकालाई पढाइदिने भन्दै आश्वासन देखाएर जम्मा पार्ने र उनीहरूमाथि यौन शोषण गर्ने गरेको आरोप उनीमाथि लागेको थियो।
नेपाल प्रहरीको केन्द्रीय अनुसन्धान ब्युरो (सीआइबी)ले डालगिल्सलाई काभ्रेको मण्डन देउपुर नगरपालिकास्थित चिलकाजी महर्जनको घरबाट पक्राउ गरेको थियो।
डालगिल्सले हिमालयन कम्युनिटी फाउन्डेसन नामक संस्था खोली २ वर्षयता नेपालमा पटक-पटक आउने गरेको प्रहरी अनुसन्धानबाट खुलेको थियो। पक्राउ परेका डालगिल्सको साथबाट २ जना बालकको समेत उद्धार गरिएको थियो।
उनीविरुद्ध काभ्रे जिल्ला अदालतमा २०७५ बैसाख १९ गते मुद्दा दायर भएको थियो। मुलुकी संहिताअनुसार उनलाई दोषी ठहर गरिएको हो।
डालगिल्सले सन् २०१० देखि २०१४ सम्म सयुक्त राष्ट्र संघमा काम गरेका थिए। डालगिल्सको हिमालयन कम्युनिटी फाउण्डेसनले शिक्षा र खानेपानीका क्षेत्रमा काम गर्दै आएको थियो।
डालगिल्स नेपाल आउनुभन्दा अगावै बाल यौन दुराचारीमा लागेको सूचना प्रहरीले पाएको थियो। उक्त सूचना पाएको २ सातापछि नेपाल आएका डालगिल्सलाई प्रहरीले पिछा गरेर पक्राउ गरेको थियो।
डालगिल्सले १५ जनाभन्दा धेरै बालकलाई यस्तो धन्दामा लगाएको प्रहरीको अनुसन्धानबाट खुलेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
