काठमाडौं– प्रमुख प्रतिपक्षी नेपाली कांग्रेसले विषादीयुक्त तरकारी र फलफूल परीक्षण नगर्ने निर्णय र गैरन्यायिक रुपमा भएका हत्याको विषयमा सदनमा जानकारी माग गरेको छ।
सचेतक पुष्पा भुसालले प्रतिनिधिसभाको बैठकमा सुरक्षा दिनुपर्ने राज्यले गोली हान्ने र विष खुवाएर जनताको स्वास्थ्यमा हानि पुर्याउने काम गरेको बताइन्। त्यसको जवाफ सम्वन्धित मन्त्रालयका दुई मन्त्रीले दिनुपर्ने माग गर्दै उनले थपिन्, 'राज्यले सुरक्षा माग्दा गोली हानी हत्या गरियो। राज्यले यस्तो अधिकार कसले दियो? जनतालाई सरकार किन माया गर्दैन? विषादीयुक्त तरकारी र फलफूल खान किन बाध्य गर्दछ?'
संविधानले खाद्य अधिकार सुरक्षित गरे पनि सरकारले विषादी भएको वस्तु आयात नरोक्ने निर्णयबारे जनतालाई जानकारी गराउनुपर्ने उनको भनाइ थियो।
‘मन्द विषपान गराएर किन जनसंख्या घटाउने लक्ष्यमा सरकार लागेको हो?’ उनले भनिन्, ‘विदेश नियोगबाट आएको पत्र प्रधानमन्त्रीलाई थाहा हुँदैन? प्रधानमन्त्रीले सफेद झुट बोल्न मिल्छ? कसको पत्र, कहाँवाट भनेर प्रश्न गर्न मिल्छ?’
मन्त्रिपरिषद्ले गरेको निर्णय नै किन यसरी ढाँटिन्छ भन्दै उनले थप प्रश्न गरिन्।
‘देशको ढुकुटीमा भ्रष्टाचार गर्ने करोडौंका योजना तत्कालै बन्ने तर विषादी परीक्षण गर्ने स्थल छैन भन्न मिल्छ?’ उनले भनिन्, ‘यस विषयमा दुई मन्त्रीले जवाफ दिनु पर्दछ। नत्र हामी संसद अघि बढाउन सहयोग गर्न सक्दैनौं।’
भुसालले विप्पल समूहका कुमार पौडेल र सरोज यादवको हत्याको विषय गम्भीर रहेको भन्दै जानकारी पाउनुपर्ने माग गरिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1766648928.png)
