म्याड्रिड– स्पेनिस ला लिगा अन्तगर्त शनिबार राति भएको खेलमा एट्लेटिको म्याड्रिडले गेटाफेलाई २–० ले हराएको छ।
खेलको १८ मिनेटमा एन्जेल कोरिआले गोल गर्दै एट्लेटिकोलाई अग्रता दिलाए। एन्टोनिया ग्रिजम्यानसँग वान टु वान पास खेलपछि बनेको मुभमा करिआलाई गोल पास भने मार्टिनेजले उपलब्ध गराए।
खेलको ६८ मिनेटमा डिएगो कोस्टाले एट्लेटिकोका लागि दोस्रो गोल गरे। गोल गरेलगत्तै उनी खुसी मनाउन मैदान छाडेर प्याराफिटमा गएका थिए। प्यारफिटमा गएर दर्शकसँग टाउँको जुधाएर खुसी मनाएका उनले दोस्रो पहेँलोसँगै रातो कार्डको समाना गर्नु पर्यो। त्यसको ६ मिनेट अघि उनले पहिलो पटक पहेँलो कार्ड पाएका थिए।
कोस्टाले रातो कार्ड पाउनुका बावजुद जित हात पारेको एट्लेटिको ला लिगाको अंक तालिकाको दोस्रो स्थानमा छ। एट्लेटिकोले १८ खेलबाट ३९ अंक जोडेको छ। १७ खेलबाट ४५ अंकसहित बार्सिलोना शीर्ष स्थानमा छ। तेस्रो स्थानको भ्यालेन्सियाले १८ खेलबाट ३७ तथा चौथो स्थानको रियल म्याड्रिडले १६ खेलबाट ३१ अंक बटुलेका छन्।
यसअघि बुधबार कोस्टाले एट्लेटिको म्याड्रिडमा पुनरागमन गरेको खेलमा पाँचौ मिनेटमै गोल गरेका थिए। कोपा डेलरे अन्तगर्त अन्तिम १६ को पहिलो लेगमा कोस्टाले लेइडा स्पोरतिउविरुद्ध गोल गरेका हुन्।खेलको ६४ मिनेटमा वैकल्पिक खेलाडीको रुपमा मैदान प्रवेश गरेका थिए। उनले ६९ मिनेटमा गोल गरेका थिए।
कोस्टा गत सेप्टेम्बरमा चेल्सीबाट आफ्नो पुरानो क्लब एट्लेटिकोमा फर्किएका थिए। चेल्सीका प्रशिक्षकसँग कुरा नमिलेपछि कोस्टाले तीन वर्षपछि एट्लेटिको फर्किएका थिए।
कोस्टा सन् २०१४ मा एट्लेटिकोबाट चेल्सीमा आबद्ध भएका थिए। ब्राजिलमा जन्मिएका कोस्टा अन्तर्राष्ट्रिय खेल भने स्पेनबाट खेल्दै आइरहेका छन्। कोस्टा सन् २०१४ मा ३ करोड २० लाख पाउन्डमा एट्लेटिकोबाट चेल्सी आएका थिए। तीन सिजनमा कोस्टाले चेल्सीबाट १ सय २० खेलमा ५८ गोल गरे । अघिल्लो सिजनमा चेल्सीले प्रिमियर लिगको उपाधि जित्दा कोस्टाले २० गोल गरेका थिए।
फिटनेसका कारण प्रशिक्षक कोन्टेले कोस्टालाई टिममा राखेका थिएनन्। त्यसपछि कोन्टे र कोस्टाबीच विवाद बढेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749307650.png)
-1749200817.png)
