राष्ट्र सङ्घको औपचारिक निमन्त्रणामा प्रधानसेनापति थापा अमेरिका जाने

नेपाल लाइभ | २०७६ असार २० शुक्रबार | Friday, July 05, 2019 २२:२१:०० मा प्रकाशित

काठमाडौं- प्रधानसेनापति पूर्णचन्द्र थापा संयुक्त राष्ट्र सङ्घको औपचारिक निमन्त्रणामा विभिन्न कार्यक्रममा सहभागी हुन यही असार २३ गते संयुक्त राज्य अमेरिका जाने भएका छन्।        

राष्ट्रसङ्घको मुख्यालय न्युयोर्कमा ब्रिटिस आर्म्ड फोर्सले असार २५ गते आयोजना गर्ने प्रथम महिला, शान्ति र सुरक्षा सञ्जाल सम्बन्धी बैठक र संयुक्त राष्ट्रसङ्घ सचिवालयले असार २६ गते आयोजना गर्ने तेस्रो रक्षा प्रमुख सम्मेलनमा सहभागी हुन उनी ४ सदस्यीय नेपाली भ्रमण टोलीका साथ त्यसतर्फ जान लागेका हुन्।

भ्रमणको क्रममा प्रधानसेनापति थापाले अमेरिकी रक्षा विभागका उच्च पदाधिकारी तथा दक्षिण एसिया विभाग हेर्ने पदाधिकारीसँग भेटवार्ता गर्ने कार्यक्रम रहेको सैनिक जनसम्पर्क तथा सूचना निर्देशनालयले जनाएको छ। औपचारिक कार्यक्रम सम्पन्न गरी प्रधानसेनापति थापा आगामी साउन १ गते स्वदेश फर्कनेछन्।

यस किसिमको उच्च तहको सैनिक नेतृत्व वर्गको भ्रमणले नेपाली सेना र संयुक्त राष्ट्र सङ्घ तथा मित्रराष्ट्र अमेरिकी सेनाबीच रहँदै आएको आपसी सौहार्दपूर्ण सम्बन्धलाई थप सुमधुर एवं प्रगाढ बनाउन मद्दत पुग्ने सेनाले विश्वास व्यक्त गरेको छ। रासस/फाइल तस्बिर-नेपाली सेना