काठमाडौं– एकपछि अर्को गर्दै उपाधिका दावेदार मानिएका २ टोलीलाई पराजित गर्दै आयोजक इंग्ल्यान्ड आइसीसी विश्वकप क्रिकेटको सेमिफाइनलमा पुगेको छ।
बुधबार राति सम्पन्न खेलमा न्युजिल्यान्डलाई १ सय १९ रनले पराजित गर्दै इंग्ल्यान्डले अन्तिम ४ मा स्थान सुरक्षित गरेको हो।
टस जितेर पहिलो ब्याटिङ गरेको इंग्ल्यान्डले पूरा ५० ओभर खेल्दै ३ सय ५ रनको योगफल तयार गरेको हो। इंग्ल्यान्डको पारीमा जोनी बेयरस्टोले शतकीय पारी खेले। उनले १ सय ६ रनको पारी खेले। ९९ बलको सामना गरेका उनले १५ चौका र १ छक्का प्रहार गरेका थिए।
शतकसँगै बेयरस्टो एउटै विश्वकपमा प्रारम्भिक ब्याट्सम्यानको रुपमा दुई वटा शतक प्रहार गर्ने पहिलो इंग्लिस ब्याट्सम्यान बन्न पुगेका छन्।
बेयरस्टो पहिलो विकेटका लागि जसोन रोयसँग मिलेर १ सय २३ रन बटुल्दै घरेलु टोलीलाई सटिक सुरुवात दिल्याएका थिए। रोयले ६० रन बनाए।
ठूलो लक्षतर्फ अघि बढेको इंग्ल्यान्डका मध्यक्रमका ब्याट्सम्यान चल्न नसक्दा इंग्ल्यान्डको पारी ३ सय ५ रनमा खुम्चिएको हो। कप्तान इयोन मोर्गनले ४२ रन बनाउनु बाहेर मध्यक्रममा कुनै पनि ब्याट्सम्यानले उल्लेख्य प्रदर्शन गर्न सकेनन्।
१ सय ९४ रनको अवस्थामा दोस्रो विकेट गुमाएको इंग्ल्यान्डको पारीमा बाँकी १ सय ११ रन जोड्दा ६ विकेट पतन भएको थियो।
बलिङतर्फ न्युजिल्यान्डका ट्रेन्ट बोल्ट, मट हेनरी र जेम्स निस्समले समान २/२ विकेट लिए।
.jpg)
३ सय ६ रनको चुनौती पछ्याउँदै ब्याटिङ गरेको न्युजिल्यान्डले खराब प्रदर्शन गर्दै ४५ ओभरमा सबै विकेटको क्षतिमा १ सय ८६ रन मात्रै बनाउन सक्यो।
न्युजिल्यान्डका लागि टोम लाथमले ५७ रन बनाउँदा रोस टेलरले २८ र कप्तान केन विलियम्सनले २७ रनको योगदान दिए। १४ रनको अवस्थामा २ विकेट गुमाइसकेको न्युजिल्यान्डका कुनै पनि ब्याट्सम्यानबीच ठूलो साझेदारी बन्न सकेन।
विकेट पतनको सिलसिला नरोकिएपछि न्युजिल्यान्डले पूरा ५० ओभर पनि खेल्न सकेको थिएन।
इंग्ल्यान्डका मार्क उडले न्युजिल्यान्डका ३ ब्याट्सम्यानलाई पेवेलियन फर्काए। जोफ्रा आर्चर, क्रिस ओएक्स, लियाम प्लुङ्केट, आदिल रसिद र बेन स्टोक्सले समान १/१ विकेट लिए।
आर्चर पहिलो विश्वकप सहभागितामै सबैभन्दा धेरै विकेट लिने इंग्लिस बलर हुन्। आसन्न विश्वकपमा उनले १७ विकेट लिइसकेका छन्।
जितसँगै इंग्ल्यान्ड सेमिफाइनलमा पुग्ने तेस्रो टिम बनेको छ। यसअघि अस्ट्रेलिया र भारतले पनि सेमिफाइनलमा स्थान सुरक्षित गरिसकेका छन्।
न्युजिल्यान्ड र पाकिस्तानमा कसको पल्ला भारी?
आफ्नो अन्तिम खेलमा इंग्ल्यान्डसँग हारे पनि युजिल्यान्डको सेमिफाइनल पुगेने सम्भावना भने बलियो छ। तर, ८ खेलबाट ९ अंक बनाएको पाकिस्तानको सेमिफाइनल यात्रा भने कठिन भएको छ।
पाकिस्तानले आफ्नो अन्तिम खेलमा बंगलादेशसँग खेल्नेछ। बंगलादेशसँगको खेलमा जित निकाले पनि पाकिस्तानको सेमिफाइन यात्रा भने सहज छैन। ९ खेलबाट ११ अंक बनाउँदै अंकतालिकाको चौथौ स्थानमा रहेको न्युजिल्यान्डको नेट रनरेट राम्रो छ।
त्यसकारण पनि पाकिस्तान इंग्ल्यान्डको हारको प्रतिक्षामा थियो। न्युजिल्यान्डले इंग्ल्यान्डलाई पराजित गरेको भए पाकिस्तानको विश्वकप सेमिफाइनलमा पुग्ने सम्भावना बलियो हुने थियो।
पाकिस्तानले अब विश्वकपको सेमिफाइनलमा पुग्नका लागि बंगलादेशमाथि भारी अन्तरको जित निकाल्नु पर्ने देखिएको छ। अन्यथा न्युजिल्यान्ड सजिलै अन्तिम ४ मा पुग्नेछ।
विश्लेषक एस राजेशका अनुसार पाकिस्तानले बंगलादेशलाई ३ सय १६ रनअन्तरमा हराउनु पर्नेछ। जसअनुसार पाकिस्तानले पहिले ब्याटिङ गर्दै ४ सय रन बनाउनु पर्नेछ भने बंगलादेशलाई ८४ भन्दा कमको स्कोरमा रोक्नु पर्नेछ। यसो भए पाकिस्तानले रनरेटमा न्युजिल्यान्डलाई पछि पार्नेछ।
पाकिस्तानले फराकिलो अन्तरको जित हात नपारेको अवस्थामा सेमिफाइनलमा पुग्ने चौथो टोली न्युजिल्यान्ड बन्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
