काठमाडौं– एक महिनापछि नामिबियामा हुने आइसिसी विश्व क्रिकेट लिग डिभिजन–२ का लागि नेपालले शुक्रबारबाट तयारी थाल्ने भएको छ। तयारीको पहिलो चरणमा २२ खेलाडीलाई बोलाइने भएको छ।
नेपाली टिमका प्रमुख प्रशिक्षक जगत टमाटाका अनुसार नेपाली टिमको तयारीबारे आइसिसीलाई जानकारी गराइएको छ। ०७३ वैशाखमा नेपाल क्रिकेट संघ (क्यान) निलम्बनमा परेपछि नेपाली क्रिकेट टिमको सम्पूर्ण व्यवस्थापन आइसिसीले हेर्दै आएको छ।
'हामीले नेपाली टिमको तयारीको कार्यतालिका आइसिसीलाई पठाएका छौं,' टमाटाले नेपाल लाइभसँग भने, 'हामीले मोन्टी देसाइलाई टिमको ब्याटिङ प्रशिक्षक राख्न र अन्तिम तयारी दक्षिण अफ्रिकामा गर्न पत्राचार गरेका छौं।'
पहिलो चरणको बन्द प्रशिक्षणमा सहभागी हुने २२ खेलाडी छनोटको आधार डब्लुसिएल च्याम्पियनसिपको सातौं चरण, यू १९ एसिया कप र एभरेस्ट प्रमियर लिग (इपिएल) भएको उनले बताए। 'पछिल्ला प्रतियोगितामा राम्रो खेलेका नयाँ अनुहार पनि टिममा छन्। प्रशिक्षक, कप्तान र उपकप्तानसँगको सल्लाहपछि खेलाडी छनोट गरेका हौं,' टमाटाले भने।
नेपालमा १५ दिन प्रशिक्षण गरेपछि राष्ट्रिय टिम घोषणा गरिनेछ। त्यसपछि नेपालले अन्तिम तयारी दक्षिण अफ्रिकामा गर्नेछ। टमाटाले भने, 'दक्षिण अफ्रिकामा कम्तिमा ३ वटा अभ्यास खेल खेल्छौं। १० देखि १२ दिन दक्षिण अफ्रिकामा बस्छौं र त्यहाँबाट सिधैं नामिबिया जान्छौं।'
नेपाली टिममा यसअघि पनि काम गरिसकेकाले देसाईलाई ब्याटिङ प्रशिक्षक नियुक्त गर्न लागिएको टमाटाले बताए। उनले भने, 'पहिला पनि काम गरेकाले देसाईलाई नेपाली टिमबारे धेरैं आइडिया छ। नेपाली खेलाडीको राम्रो–नराम्रो पक्षबारे उनले बुझेका छन्।'
टमाटाले नेपालले ब्याटिङ मात्र नभई बलिङ र फिल्डिङमा पनि ध्यान दिने बताए। 'हामीसँग तीन क्षेत्रमै उत्कृष्ट प्रदर्शन गर्नुपर्ने चुनौती छ,' उनले भने।
भारतीय प्रशिक्षक देसाईले नेपाली यू–१९ टिमको ब्याटिङ प्रशिक्षण सम्हालेका थिए। देसाईको ब्याटिङ प्रशिक्षणमा नेपाली युवा टिमले यू–१९ पूर्वी क्षेत्रीय प्रतियोगिता र एसिया कप खेलेको थियो। देसाईले सन् २००८ देखि २०१३ सम्म इन्डियन प्रिमियर लिग (आइपिएलमा) राजस्थान रोयल्सको प्रशिक्षण सम्हालेका थिए।
डिभिजन–२ प्रतियोगिता आगामी फेब्रुअरी ८ देखि १५ सम्महुँदैछ। डिभिजन–२ मा ६ टिमबीच प्रतिस्पर्धा हुनेछ। डिभिजन–२ मा नेपाल, युएई, नामिबिया, केन्या, क्यानडा र ओमानले खेल्नेछन्। डिभिजन–२ का शीर्ष २ टिम विश्वकप छनोट प्रतियोगिताका लागि छनोट हुनेछन्।
नेपालसहित युएई, नामिबिया र केन्या विश्व क्रिकेट लिग (डब्लुसिएल) च्याम्पियनसिपबाट शीर्ष चारमा पर्न नसकेपछि डिभिजन–२ मा झरेका हुन्। क्यानडा र ओमान भने डिभिजन–३ बाट उक्लिएका टिम हुन्।
डिभिजन–२ बाट २ टिम छनोट भएसँगै एकदिवसीय विश्वकप छनोट खेल्ने १० टिमको टुंगो लाग्नेछ। मार्चमा हुने छनोटका लागि डब्लुसिएल च्याम्पियनसिपबाट नेदरल्यान्ड्स, स्कटल्यान्ड, पपुवा न्युगिनी र हङकङ छनोट भएका थिए। यस्तै जिम्बावेसहित वेस्ट इन्डिज, अफगानिस्तान र आयरल्यान्डले प्रतिस्पर्धा गर्दै छन्। १० टिमको प्रतिस्पर्धाबाट शीर्ष २ टिम सन् २०१९ को विश्वकपमा छनोट हुनेछन्। विश्वकपमा ८ टिम यसअघि नै छानिइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
