काठमाडौं– अधिकांश अर्जेन्टिनी मिडियाहरुले बुधबार बिहान ब्राजिलसँग हुने खेलमा लिओनल मेसीलाई खेल अवधिभर विना दबाब खेल्न दिइनुपर्ने सुझाव दिएका दिएका छन्। ब्युनस आयर्स टाइम्समा खेल पत्रकार ड्यान इडवार्डस् लेख्छन्, ‘अर्जेन्टिनाको मौजुदा टिमले ब्राजिलको सामना गर्न सजिलो छैन तर यसअघिका खेलहरुबाट टिम मेसीले सिक्न जरुरी छ।’
रणनीतिक र सन्तुलित मात्र नभएर विना दबाब मेसीलाई मैदानमा उतार्न सकियो भने अर्जेन्टिनाले अपेक्षाकृत परिणाम दिन सक्ने विश्लेषण उनको छ।
तर उता, अधिकांश ब्राजिलियन अखबारहरुले अर्जेन्टिनासँगको अबको खेल अर्को ऐतिहासिक हुने तर्क गरिरहेका छन्। उनीहरुले ब्राजिलका लागि यो खेल सहज हुने तर लिओनल मेसीलाई भने खेलाडीहरुले दबाबमा राख्नुपर्ने बताइरहेका छन्।
‘आत्मविश्वास गुमाउनुभएन, खेल जित्न त्यति गाह्रो छैन,' द रियो टाइम्स लेख्छ, ‘अर्जेन्टिनाले कोपा अमेरिकामा खेलेका खेलहरु हेर्दा उसको खेल स्तरमा सुधार आएको देखिँदैन। तर ब्राजिलसँगले शक्ति सञ्चय गरेको हुन सक्छ। त्यसकारण ब्राजिल पनि रणनीतिक हुन जरुरी छ।’
कोपा अमेरिकामा अर्जेन्टिनी ‘हिरो’ मेसीले अपेक्षाकृत प्रदर्शन गर्न नसकिरहेकाले पनि ब्राजिलियन फुटबल विश्लेषकहरुका अनुमान उत्साहजनक छन्। तअहिलेसम्म १ गोल मात्र गर्न सकेका मेसी खेललाई जुनसुकै बेला पनि ‘यू टर्न’ गर्ने ल्याकत राख्छन् भन्नेमा कसैको दुई मत छैन। यतिसम्म कि, टिम ब्राजिलका एक जना महत्वपूर्ण खेलाडी थिएगो सिल्भाले भनेका छन्, ‘मेसीले आफ्नो शक्ति ब्राजिलविरुद्धको खेलका लागि सञ्चय गरेका हुन सक्छन्।’
सिल्भाको यस्तो भनाइले टिम ब्राजिल मेसीबारे सचेत छ भन्ने देखिन्छ। यद्यपि सबै खेलहरुमा यस्तो चमत्कारको अनुमान नमिल्न सक्छ। इतिहासमा यस्ता अपेक्षाहरु पानीको फोका बनेका छन्।
कोपा अमेरिकाका लागि मात्र होइन विश्व फुटबलकै लागि ब्राजिल र अर्जेन्टिना दुवै देश ‘पावर हाउस’ हुन्। फुटबल विश्वकपको इतिहासदेखि नै यी देशका खेल र खेलाडीका किस्सा प्रसंशकका लागि आकर्षण बन्दै आइरहेका हुन्। त्यसैले पनि कोपा अमेरिकामा भोलिको खेललाई सबैले महत्वका साथ पर्खिरहेका छन्।
यसबाहेक यी दुई देशबीच हुने भोलिको खेल किन पनि महत्वपूर्ण छ भने, यो खेलमा जसले जित्नेछ ऊ जारी कोपा अमेरिकाको फाइनलमा पुग्नेछ। त्यसैले पनि दुवै टिम आफ्नो रणनीतिमा सजग देखिन्छन्। कोपा अमेरिका सुरु भएपछि अन्तर्राष्ट्रिय मिडियासँग भनेका छन्, ‘हामी प्रतिबद्ध भएर खेल्ने हो। परिणामभन्दा पनि खेलको स्तर महत्वपूर्ण हो भन्ने लागेको छ।’
टिम मेसीका लागि अर्को अफ्ठेरो ‘फ्याक्टर’ के पनि थपिएको छ भने, यो टिम लड्ने मैदान ब्राजिलको घरेलु मैदान हो। मनोवैज्ञानिक रुपमा कतै न कतै टिम मेसीका खेलाडीहरुमा यसको प्रभाव पर्ला कि भन्ने संशय पनि थपिएको छ। त्यसो त कमजोर भनिएका टिमहरुसँग पनि अर्जेन्टिनाले खास दमदार खेल्न सकेको छैन। प्रारम्भका दुई खेलमा नै उसले जित निकाल्न सकेको थिएन। पहिलो खेलमा कोलम्बियासँग २–० ले पराजित भएको थियो भने दोस्रो खेलमा पाराग्वेसँग १–१ को बराबरी। फर्काइएको गोल पनि मेसीले पेनाल्टीबाट गरेका थिए।
समूहको अन्तिम खेलमा कोपा अमेरिकाका लागि आमन्त्रित टोली कतारलाई २–० ले पराजय गरेपछि बल्ल टिम मेसी अन्तिम ८ मा पुगेको थियो। क्वार्टरफाइनलमा भेनेजुएलाविरुद्ध २–० को परिणाम हात पार्दै यो टिम शीर्ष ४ को सूचीमा दर्ज भयो। कोपा अमेरिकाको पछिल्लो ५ मध्ये ४ संस्करणको फाइनलमा पुगे पनि मेसीको टिम अर्जेन्टिनाले सन् १९९३ देखि फाइनल जितेको छैन।
आफ्नो टिमको कठिन र संघर्षपूर्ण अवस्था मेसीलाई राम्ररी थाहा छ। उनले भनेका छन्, ‘हामीलाई थाहा छ, म पनि राम्रो खेलिरहेको छैन। संघर्षपूर्ण तरिकाले हामी मैदानमा छौं।’
यद्यपि टिम मेसीले आशा गुमाएको भने छैन। भोलिको खेल अपेक्षाकृत भएमा मेसी कोपा अमेरिकाको फाइनलमा देखिनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
