इंग्ल्यान्ड– विश्वकको ४०औं खेलअन्तर्गत मंगलबार बर्मिंघमको एडबस्टनमा भारतले बंगलादेशको सामना गर्दैछ। ७ खेलमा ११ अंक जोडेर दोस्रो स्थानमा रहेको भारत यो खेल जितेर १३ अंक बनाउन चाहन्छ। यति अंकले उसको सेमिफाइनलको यात्रा पक्का हुन्छ।
उता बंगलादेशले ७ खेल खेलेर ७ अंक जोडेको छ। अंकतालिकामा छैठौं स्थानमा रहेको बंगलादेशलाई सेमिफाइनलमा पुग्ने अपेक्षा कायम राख्न यो खेल जित्नैपर्ने हुन्छ। जित्नैपर्ने दबाबमा रहेको बंगलादेशले यो विश्वकपमा एकपल्ट फेरि ताकत देखाउने प्रयास गर्नेछ।
खेलाडीको फिटनेस समस्या झेलिरहेको भारतले सवैभन्दा धेरै फर्ममा रहेका ओपनर गुमाउनुको पीडा अहिले खेपिरहेको छ। त्यसैमाथि मध्यक्रमका ब्याट्सम्यान विजय शंकरसमेत घाइते भएर विश्वकपबाटै बाहिरिएका छन्। भुवनेश्वर कुमार पाकिस्तानविरुद्धको खेलमा घाइते बनेका थिए। उनी अहिले खेल्न तयार त छन् तर भर पर्ने अवस्था छैन।
धवनको ठाउँमा आएका रिसभ पन्तलाई इंग्ल्यान्डका विरुद्ध उतारिएको थियो। तर, ठूला सट खेल्नुपर्ने दबाबका समयमा आइपुगेका उनले रन ठिकै जोडे पनि अनुभवहिनता प्रस्टै देखाए।
भारतका लागि रोहित शर्मा र विराट कोहली सवैभन्दा भरपर्दा खेलाडीका रुपमा देखिएका छन्। ओपनर रोहित शर्मा र कप्तान विराट कोहली फर्ममा छन्। बलरहरु जस्प्रित बुमराह र मोहम्मद शामी पनि आक्रामक देखिएका छन्।
टोलीमा रहेका सवैभन्दा भरपर्दा अनुभवी खेलाडी महेन्द्र सिंह धोनी यो विश्वकपमा भारतका कमजोरी बनिरहेका छन्। उनले जारी विश्वकपमा सम्झनलायक एउटा खेल पनि खेल्न सकेका छैनन्।
बंग्लादेशसँग यसपल्ट शाकिब अल हसन छन्। जसले खेललाई विपरीत दिशामा फर्काउन सक्ने ताकत राख्छन्। संसारकै एक नम्बर अलराउन्डर शकिब अल हसनले जारी प्रतियोगितामा जादू चलाइरहेका छन्। बगलादेशलाई अहिलेको अवस्थामा उनैले ल्याइपुर्याएका हुन्। उनले ४ सय ७६ रन मात्रै होइन, १० विकेट समेत लिएर अलराउन्ड प्रदर्शन गरिरहेका छन्। उनी जारी विश्वकपमा सबैभन्दा बढी रन बनाउनेको सूचीमा तेस्रो स्थानमा छन्।
भारतका लागि सवैभन्दा टाउको दुखाइका विषय उनी नै हुन्। उनी पछि मुशफिकुर रहिमले बंगलादेशलाई राम्रो योगदान दिइरहेका छन्। अनुभवी ब्याट्सम्यान रहिममाथि मंगलबारको खेलमा ठूलो जिम्मेवारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
