काठमाडौं- वेस्टइन्डिजमाथि २३ रनको जित निकाले पनि श्रीलंका विश्वकपबाट बाहिरिएको छ। योसँग विश्वकपबाट बाहिरिने श्रीलंका चौथो टोली बनेको छ।
आगामी खेलमा जित हात पारेर हाल अंकतालिकाको चौथो स्थानमा रहेको इंग्ल्यान्ड न्युजिल्यान्डसँग पराजित भएमा दुवै टोलीको समान १० अंक हुनेछ।
तर, धेरै खेल जितेको आधारमा इंग्ल्यान्ड अंकतालिकामा श्रीलंकाभन्दा माथि रहनेछ। अंक समान भए पनि इंग्ल्यान्डले माथि उल्लेखित अवस्थामा ५ खेल र श्रीलंकाले ४ खेलमा मात्रै जित हात पारेको हुनेछ।
विश्वकपमा नेट रनरेट भन्दाअघि धेरै खेल जितेको अवस्थालाई मान्यता दिइने नियम श्रीलंकाका लागि असहयोगी बनेको हो। यस आधारमा इंग्ल्यान्डले भारतलाई हराएपछि श्रीलंका विश्वकपबाट बाहिरिने टुंगो लागेको हो।
यद्यपि यसअघि नै बाहिरिइसकेको वेस्टइन्डिजमाथि भने श्रीलंकाले सान्त्वना जित निकालेको हो। टस हारेर पहिले ब्याटिङ गरेको श्रीलंकाले ६ विकेटको क्षतिमा ३ सय ३८ रनको बलियो योगफल तयार गर्यो।
उसका लागि अभिस्का फर्नान्डोले शतकीय पारी खेले। १ सय ३ बलको सामना गरेका अभिस्काले ९ चौका र २ छक्काको मद्दतमा १ सय ४ रन बनाए। अभिस्का विश्वकपमा शतक प्रहार गर्ने कम उमेरका श्रीलंकाली ब्याट्सम्यान बनेका छन्। त्यस्तै कुशल परेराले ६४ र लाहिरु थिरमानेले ४५ रनको योगदान दिए।
वेस्टइन्डिजका जसोन होल्डरले सर्वाधिक २ विकेट हात पारे।
३ सय ३९ रनको लक्ष पछ्याएको वेस्टइन्डिजको पारी ३ सय १५ रनमा समेटियो। वेस्टइन्डिजका निकोलस पुरनको शतक जितको भागिदार बन्न सकेन। उनले ११ चौका र ४ छक्काको मद्दतमा १ सय १८ रन बनाए।
फाबियन एलेनले ५१ रनको पारी खेले। सुरुवातमा लगातार दबाबमा आएको वेस्टइन्डिजलाई यी दुई खेलाडीले उकासेका थिए।
श्रीलंकाका लासिथ मलिंगाले सर्वाधिक ३ विकेट लिए।
हाल अंकतालिकामा अष्ट्रेलिया पहिलो स्थानमा छ र उ सेमिफाइनल प्रवेश गरिसकेको छ। भारत र न्युजिल्यान्डले समान ११ अंक जोडे पनि नेट रनरेटका आधारमा क्रमशः दोस्रो र तेस्रो स्थानमा छन्। इंग्ल्यान्ड १० अंकसहित चौथो स्थानमा छ।
हालसम्म अफगानिस्तान, दक्षिण अफ्रिका, वेस्टइन्डिज र श्रीलंका प्रतियोगिताबाट बाहिरिइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787645626.png)
-1786602170.png)
-1786513116.png)
