जनकपुर- सर्लाहीको बाँके खोलाबाट बालुवा–गिट्टी झिक्दा बनेको खाल्डोमा डुबेर एक १२ वर्षीय बालक अमित रायको मृत्यु भएको थियो। शनिबार उनको मृत्यु भएको हो। यसपछि एकाएक आक्रोशित बनेका स्थानीयले आइतबार अपरान्ह पूर्व-पश्चिम राजमार्ग अवरुद्ध गर्न पुगेका थिए।
स्थानीयले गरेको विरोध प्रदर्शनमा प्रहरीले बल प्रयोग गर्यो। स्थानीयको विरोधले सर्लाहीमा पूर्व–पश्चिम राजमार्ग अवरुद्ध हुँदा सडक खुलाउन प्रहरीले हस्तक्षेप गर्दै गोली चलाएको हो। गोली लागेर एक जनाको मृत्यु भएको छ। झडपमा स्थानीय र प्रहरीसहित १ दर्जनभन्दा बढी घाइते भएको बताइएको छ। ४ जना स्थानीयलाई गोली लागेको छ। भने अन्य घाइते प्रहरी हुन्।
प्रदेश २ प्रहरी कार्यालय जनकपुरका अनुसार राजमार्ग खुलाउने क्रममा प्रहरीले हवाइ फायर गर्दा सर्लाही, इश्वरपुर-१३ बस्ने २७ वर्षका केवल महतोको मृत्यु भएको छ। उनको टाउकोमा गोली लाग्दा घटनास्थल मै मृत्यु भएको प्रहरीको भनाइ छ। तर, पीडित पक्षले भने प्रहरीले अन्धाधुन्द गोली प्रहार गरेको आरोप लगाएका छन्।
इश्वरपुर नगरपालिका–१३ गौरीशंकरस्थित बाँके खोलामा गिट्टी बालुवा निकाल्न खनिएको खाल्डोमा डुबेर लाले रायका छोरा अमितको शनिबार दिउँसो मृत्यु भएको थियो। उनको मृत शरीर आइतबार मात्र फेला परेको थियो।
आक्रोशित स्थानीय ६ किलोमिटर टाढा पूर्व–पश्चिम राजमार्गमा शवसहित प्रदर्शनमा उत्रिएपछि व्यापक रूपमा नेपाल प्रहरी र सशस्त्र प्रहरीको परिचालन गरिएको थियो।
प्रदेश २ का प्रहरी प्रमुख डिआइजी प्रद्युम्न कार्कीका अनुसार राजमार्ग अवरुद्ध हटाउन सुरक्षाकर्मीले धेरैपटक आग्रह गर्दा पनि प्रदर्शनकारीले ढुंगामुढा प्रहार गर्न थालेपछि प्रहरीले बल प्रयोग गरेको थियो। प्रदर्शनकारी समूह प्रहरीलाई लक्षित गरेर ढुंगामुढा गरेपछि सुरुमा लाठी चार्ज, १५ राउन्ड अश्रु ग्यास प्रहार गरिएको दाबी प्रहरीको छ। प्रहरीका अनुसार हवाइ फायरकै क्रममा गोली लागेर महतोको मृत्यु भएको हो।
सर्लाही र महोत्तरीको सीमामा बग्ने बाँके खोलामा गिट्टी बालुवा निकाल्दा बनेको गहिरो खाल्डोमा डुबेर बालकको मृत्यु भएपछि स्थानीय खोलामा भइरहेको अवैध उत्खनन् बन्द गर्नुपर्ने, खोलाबाट गिट्टीबालुवा निकाल्दा बनेको खाल्टो पुर्नुपर्ने, बस्ती नजिकमा रहेको अवैध क्रसर उद्योग बन्द गर्नुपर्ने, मृतक बालकका परिवारलाई उचित राहत दिनुपर्ने स्थानीयको माग छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
