काठमाडौं– शनिबार भएको एभरेस्ट प्रिमियर लिग (इपिएल) को फाइनलको अन्तिम ओभरमा भैरहवा ग्लाडिएटर्सलाई जितका लागि ९ रन आवश्यक थियो। भैरहवाका लागि यो लक्ष्य असहज थिएन, किनकि उसको हातमा ४ विकेट बाँकी थियो। अर्कोतर्फ भैरहवाका ब्याट्सम्यानले अन्तिम ओभरमा प्रतियोगितामा पहिलो पटक बलिङ गरिरहेका अनिल साहको सामना गर्दै थिए। फाइनलअघिका ६ खेलमा अनिलले बलिङ गरेका थिएनन्। नियमित बलर सहान अदिसा घाइते भएपछि कप्तान पारस खड्काले पार्टटाइम बलरको रुपमा अनिललाई फाइनलमा मौका दिएका थिए।
चुनौतीपूर्ण परिस्थितिमा बलिङमा आएका अनिलले अन्तिम ओभरको पहिलो बलमै चौका खाए। दोस्रो बलमा कृष्ण कार्कीलाई बोल्ड गरेर अनिल खेलमा फर्किए। तेस्रो बल डट फाले। जितका लागि भैरहवालाई ३ बलमा ५ रन आवश्यक थियो। अनिलले चौथो बलमा भुवन कार्कीलाई रन आउट गराए।
पाँचौं बलमा अनिलले पुनित मेहरालाई वैकल्पिक खेलाडी रामनरेश गिरीमार्फत क्याच गराए र खेल आफ्नो पक्षमा पारे। अन्तिम बलमा जितका लागि पनि अनिलले बाउन्ड्री प्रहार गर्न दिएनन्। ५ रन आवश्यक परेको भैरहवाले अन्तिम बलमा मात्र ३ रन जोड्न सक्यो। अनिलले प्रभावशाली बलिङ गरेपछि विराटनगरले १ रनले खेल जित्दै इपिएलको ट्रफी उचाल्यो।
अनिल इपिएलका सबैन्दा बढी क्याच लिने खेलाडी पनि बने। ७ खेलमा उनले १२ क्याच लिँदै आफू फिल्डिङमा अब्बल भएको साबित गरे। इपिएलमा बढी क्याच लिने दोस्रो स्थानमा रहेका भैरहवाका भुवन कार्कीले ६ क्याच लिए।
इपिएल फाइनलमा हिरो साबित भएका अनिल यू–१९ टिमका मध्यक्रमका भरपर्दा ब्याट्सम्यान हुन्। गत भदौमा भएको एसिसी यू–१९ पूर्वी क्षेत्रीय प्रतियोगिताबाट उनी चर्चामा आएका थिए। उनले थाइल्यान्ड विरुद्ध ९१ रन प्रहार गर्दै सबैको ध्यान तानेका थिए। त्यस लगत्तै भएको एसिसी यू–१९ एसिया कपमा पनि उनले प्रभावशाली प्रदर्शन गरेका थिए। एसिया कपमा उनले अफगानिस्तान विरुद्ध अर्धशतक प्रहार गरेका थिए। एसिया कपमा गरेको प्रदर्शनको आधारमा अनिललाई सिनियर टिमको बन्द प्रशिक्षणमा मौका दिइएको थियो।
गत महिना आइसिसी विश्व क्रिकेट लिग च्याम्पियनसिप अन्तर्गत युएई विरुद्ध खेलका लागि अनिल वैकल्पिक खेलाडीमा परेका थिए। वैकल्पिक खेलाडीमा परे पनि उनी युएई भ्रमणमा गएका थिए। युएईसँग खेल्नुअघि अमेरिकासँग भएको अभ्यास खेलमा अनिलले राष्ट्रिय टिममा डेब्यु गरे। तर, उक्त खेलमा अनिल शून्य रनमा आउट हुन पुगे।
युएई विरुद्ध दोस्रो खेलमा भने उनी नियमित टिममै परे। दीपेन्द्रसिंह ऐरी अभ्यासका क्रममा घाइते भएपछि अनिललाई युएई विरुद्धको दोस्रो राष्ट्रिय टिममा स्थान दिइएको थियो। तर, उनी मैदान उत्रन भने पाएनन्।
यसरी सुरु भयो अनिलको क्रिकेट करिअर
बारा कलैयाका साह स्कुल जीवनदेखि नै राम्रो ब्याटिङ गर्थे। उनी कलैयाको बाल एकता इंग्लिस बोर्डिङ स्कुलका विद्यार्थी हुन्। स्कुल क्रिकेटमै उनले ब्याटिङमा राम्रो प्रतिभा देखाएको बाराका सिनियर प्लेयर सुदीप चौधरी बताउँछन्।
‘स्कुलस्तरीय क्रिकेटदेखि नै अनिलले आफूसँग ब्याटिङ गर्ने राम्रो कला भएको प्रमाणित गरिसकेका थिए’, चौधरी सम्झन्छन्, ‘उनी आक्रामक ब्याटिङ गर्छन्। विकेटकिपिङ पनि उनको सोख हो।’
तत्कालीन समयमा साहका लागि जिल्लाको टिममा पर्नु ठूलो कुरा थियो। किनकि क्रिकेटको उर्वरभूमि बारामा सिनियर खेलाडीको कमी थिएन।
०६८ सालको जिल्लास्तरीय प्रतियोगिताका लागि बारा जिल्ला क्रिकेट टिमका ओपनर घाइते भए। पर्सा विरुद्ध महत्वपूर्ण खेलमा अन्तिम समय प्रारम्भिक ब्याट्सम्यान टिममा उपलब्ध हुन नसकेपछि चौधरीलाई तत्काल खेलाडी खोज्नुपर्ने बाध्यता आइलाग्यो। यतिबेला साहले आफूलाई प्रारम्भिक ब्याट्सम्यानको भूमिकामा खेलाउन कप्तान चौधरीसँग अनुरोध गरे। चौधरीले पनि साहको अनुरोध सहर्ष स्वीकार गरे।
'ओपनिङ गरेको पहिलो खेलमै उनले अर्धशतक प्रहार गरे', चौधरीले सुनाए।
पहिलो खेलमै प्रभावशाली प्रदर्शन गरेका साहलाई जिल्लाको टिममा पर्न गाह्रो भएन। जिल्ला र क्षेत्रको यू–१९ टोलीबाट नियमित राम्रो प्रदर्शन गरेपछि साहले गत वर्ष आयोजना भएको एभरेस्ट प्रिमियर लिग (इपिएल)मा कान्तिपुर गोर्खाजबाट खेल्ने मौका पाए। इपिएलमा सिनियर टिमका खेलाडीसँग खेलेका साहलाई यू–१९ टिमको बन्द प्रशिक्षणमा बोलाइयो।
गत वर्ष श्रीलंकामा भएको यू–१९ एसिया कपबाट साहले युवा टिमको जर्सी लगाउने मौका पाएका थिए। साहले गत बैशाखमा भएको धनगढी प्रिमियर लिग (डिपिएल)मा विराटनगर किंग्सबाट खेले। त्यस क्रममा विराटनगरको विकेटकिपिङ तथा मध्यक्रमको ब्याटिङ सम्हालेका साहले प्रभावशाली प्रदर्शन गर्न सकेनन्।
यहिबीचमा साह विभागीय टोली सशस्त्र प्रहरी बलको क्रिकेट टोलीमा आबद्ध भए। डिपिएल लगत्तै उनले प्रधानमन्त्री कप एकदिवसीय प्रतियोगितामा मध्यमाञ्चल विरुद्ध सर्वाधिक रन प्रहार गरेका थिए। मध्यमाञ्चल विरुद्ध नटआउट ७८ रन जोडेर साहले राष्ट्रिय क्रिकेटमा पहिलो पटक अर्धशतक बनाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
