काठमाडौं– एसपी दीपकराज खरेलको दोहोरो नागरिकता भएको पाइएको छ। अवकाश भएको ६ वर्षसम्म पनि सेवामा बहाली रहेको समाचार नेपाल लाइभले प्रकाशन गरेपछि उनलाई प्रहरी किताबखानाले अवकाशको पत्र थमाएको थियो। त्यसपछि उनी सर्वोच्च गुहार्न पुगेका थिए। उनको मुद्दा विचाराधीन छ।
अवकाश भएको ६ वर्षसम्म सरकारलाई झुक्याएर सेवामा रहेका खरेलको सेवा प्रवेशदेखि नागरिकतासम्म पनि गम्भीर गल्ती भएको पाइएको छ।
एसपी खरेलको दोहोरो नागरिकता भएको सूचना आएपछि नेपाल लाइभले त्यसबारे खोजी गरेको थियो। उनीसँग दोहोरो नागरिता भएको पुष्टि भएको छ।
खरेलले ललितपुर बस्दा ०१-५३५५१... ल्यान्डलाइन नम्बर प्रयोग गर्थे। उक्त नम्बर लिने बेला पेस नेपाल टेलिकममा पेस गरेको नागरिकताको प्रतिलिपिमा २०२५ साल पुस १४ को जन्ममिति उल्लेख गरेका छन्। यस्तै उनीसँग २०२२ साल पुस १४ गतेको अर्को नागरिकता पनि रहेको प्रमाण हामीले फेला पारेका छौं।
२०३९ चैत १३ गते खरेल तत्कालीन मध्यक्षेत्रीय प्रहरी तालिम केन्द्र हेटौंडाबाट प्रहरी जवान पदमा भर्ना भएका थिए। त्यसबेला उनले भर्ना फाराममा उमेर १८ वर्ष उल्लेख गरेका थिए। तर उनको दोहोरो नागरिकतामध्ये जिल्ला प्रशासन कार्यालय काभ्रेबाट जारी २०२२ पुस १४ बाटै हिसाब गर्दा पनि उनको उमेर १८ वर्ष पुग्दैन। जबकि त्यसबेला पनि १८ वर्ष नपुग्दै जागिर खाने कानुनी प्रावधान थिएन। प्रहरी सेवामा भर्नाका लागि आवेदन दिँदा खरेलको उमेर १७ वर्ष ३ महिना १ दिन मात्रै हुन आउँछ।
जिल्ला प्रशासन कार्यालय ललितपुरबाट जारी भएको नागरिकताका आधारमा त उनी १४ वर्ष ३ महिना १ दिनमै प्रहरी सेवामा प्रवेश गरेको देखिन्छ। यी दुवै नागरिकता प्रमाणले नै पुष्टि गर्छन्, उनको प्रहरी सेवा प्रवेश गैरकानुनी देखिन्छ।
प्रहरी निरीक्षक हुने निश्चित भएपछि हवल्दारबाट राजीनामा दिएर प्राविधिक जवानमा भर्ना हुन उनले २०५५ पुस १४ मा कागजात पेस गरेका थिए। उनले बुझाएको तीनप्रति निवेदनमध्ये दुई वटामा प्रस्ट देखिनेगरी २०२५ पुस १४ गते जन्ममिति लेखिएको छ। एउटामा भने केरमेट गरेर २०२२ पुस महिना १४ गते उल्लेख छ।
जन्ममिति मात्रै होइन प्रभावमा पारेर खरेलले नागरिकता नम्बरसमेत सच्याउन भ्याएका छन्।
सुरुमा काभ्रेबाट पहिलो नागरिकता लिएको उनले ललितपुरबाट अर्को नागरिकता लिएका थिए। काभ्रेको नागरिकता नम्बर १८६ छ भने ललितपुरबाट २०४४ साउन २० गते जारी भएको पहिलो प्रतिलिपि नागरिकताको नम्बर ७८६ छ।
जन्ममिति लम्ब्याएर बढी जागिर खान खरेलले राज्यलाई झुक्याएर नागरिकता नम्बरसमेत सच्याएको गोप्य कागजात नेपाल लाइभले फेला पारेको छ।
खरेल निकट स्रोतले समेत उनले गम्भीर गल्ती नगरेको बताएका छन्। ‘नागरिकता जारी गर्ने कार्यालयबाट त्रुटि भएको भन्दै २०५५/२०५६ सालमै उहाँले सफाइ पाइसक्नुभएको हो। उहाँको नागरिकता २०२२ सालकै हो।’
खरेल निकट स्रोतले २०२२ सालकै नागरिकता सही भएको बताए पनि त्यसमा समेत शंका गर्नुपर्ने ठाउँ देखिन्छ। खरेलले २०५७ असार ३ गते बनाएको कर्मचारी सञ्चयकोषको रेकर्डमा भने उनको जन्ममिति २०२५ पुस १४ नै देखिन्छ।
हेर्नुस्, फरकफरक नागरिकता-
यो पनि :
EXCLUSIVE : अवकाशको ६ वर्षपछि खरेललाई एसपीको फुली, पूर्व आइजिपीको कुटिल चाल, गुमराहमा सरकार
अवकाशको ६ वर्षपछि एसपीको फुली काण्ड : छानबिन गर्न गृह र सतर्कता केन्द्रलाई निर्देशन
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
