भद्रपुर- सन् २०१७ भित्र झापा जिल्ला खुला दिसामुक्त बनाउने अभियान असफल हुने देखिएको छ।
जिल्ला सरसफाइ समितिको पछिल्लो प्रगति विवरणअनुसार १४ प्रतिशत झापाली अझै पनि चर्पीविहीन रहेपछि अभियान असफल हुने भएको हो। यसमध्ये झापाका दक्षिणी क्षेत्रका साविकका गाविस पाठामारी, गौरीगञ्ज र खजुरगाछीमा २५ प्रतिशत घरधुरीले मात्र चर्पी निर्माण गरेका छन् भने अन्य चौरी या खोला किनारमा शौच गरिरहेको अवस्था छ।
अभियानमा सहरी क्षेत्र पनि चुनौतीका रुपमा खडा भएपछि खुला दिसामुक्त गर्ने सरकारको योजना झापामा सफल हुन नसक्ने देखिएको छ। १५ स्थानीय तह रहेको झापामा कार्यक्रम लागू भएको चार वर्षे अवधिमा आठ वटा स्थानीय तहमा मात्र पूर्णरुपमा खुला दिसामुक्त भएको कागजी विवरण झापा जिल्ला सरसफाइ समितिमा देखिन्छ ।
बाँकी सात स्थानीय तहका केही वडा पछिल्ला दुई महिनामा खुला दिसामुक्त क्षेत्रका रुपमा थपिँदै गए पनि सबै स्थानीय तह खुला दिसामुक्त नहुने अवस्था रहेको छ।
सरकारले स्थानीय तहमार्फत चर्पी नभएका घरधुरीलाई सेवा सुविधा नदिने घोषणा गरेको भए पनि राजनीतिक हस्तक्षेप र नियम पालनामा स्थानीय तहका नेतृत्वकर्ता असफल हुँदा अभियानमा सफलता हात नपरेको दातृ निकायका प्रतिनिधि बताउने गर्छन्।
झापा जिल्लाका ३० हजार हाराहारी घरधुरी चर्पीविहीन रहेकामा दुई महिनाको अवधिमा आठ हजार घरधुरीले चर्पी निर्माण प्रक्रिया सुरु गरे पनि अन्यको अवस्था जानकारीमा छैन।
समग्र झापाको विवरण हेर्दा ८४ प्रतिशत घरधुरीमा चर्पी निर्माण भएको भए पनि १४ प्रतिशत घरधुरी चर्पीविहीन अवस्थामा छन्। सदरमुकामसमेत रहेको झापाको भद्रपुर नगरमा मात्र दुई हजार तीन सय घरधुरी चर्पीविहीन रहेका छन्।
आदिवासी जनजातिको बाहुल्य रहेको भद्रपुर नगरमा राजवंशी, गन्गाई लगायतका समुदायमा ४० प्रतिशतभन्दा बढी घरधुरीमा शौचालय रहेका छैनन्।
शौचालय बनाउन आनाकानी गर्ने परिपाटीमा अनुदानको मात्र भरपर्ने, आफ्नो जग्गा नहुने, अर्काको जग्गामा बसोबास गर्नेजस्ता कारण मुख्य चुनौती रहेको खुला दिसामुक्त भद्रपुरका कार्यक्रम अधिकृत फणीन्द्र दाहाल बताउँछन्।
महेशपुरस्थित बुधकरण टी स्टेटले राखेका मजदुरलाई सञ्चालकले चर्पी बनाउन नदिँदा साविक महेशपुरमा १५० घरपरिवारको चर्पी निर्माण हुन नसकेको पाइएको छ।
चिया बगान तथा उद्योग क्षेत्रमा चर्पीविहीन बस्ती राख्ने परम्पराले पनि भद्रपुर नगरलाई खुला दिसामुक्त हुन चुनौती देखिएको छ।
झापा जिल्ला सरसफाइ समितिका फोकल पर्सन रुद्रबहादुर न्यौपानेका अनुसार आव २०६८ बाट राष्ट्रव्यापी रुपमा सुरु भएको खुला दिसामुक्त अभियान झापामा २०७० बाट थालिएको हो। यो अभियान पूर्णरुपमा अहिलेसम्म आठ वटा स्थानीय तहमा मात्र पूरा भएको छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779880470.png)
-1764146706.png)
-1779545841.jpg)
