काठमाडौं– गत मंगलबार प्रधानमन्त्रीले बोल्न चाहँदाचाहँदै प्रतिपक्षी दल नेपाली कांग्रेसले गरेको संसद अवरोधप्रति नेकपाका सांसद योगेश भट्टराईले संसदीय गरिमा घटाउने गतिविधि भएको भन्दै टिप्पणी गरेका छन्।
भट्टराईले ०४६ सालपछि संसदलाई कमजोर बनाएर गरिमा घटाउने काम भएको र त्यसपछि विद्रोही स्थिति उत्पन्न भएको बताए। अहिलेको संसदको गरिमालाई पनि ख्याल नगर्ने हो भने हाम्रो मुलुकको व्यवस्था कसले बचाइदिन्छ भन्दै उनले प्रश्न गरे।
'हामी यो संसदमा सभामुखको आदेश मान्दैनौं। नियम कानुन मान्दैनौ। संविधान मान्दैनौं। किनकि दुनियाँले हामीलाई प्रजातन्त्रवादी भनिदिएकै छ। संविधान नमाने पनि प्रजातन्त्रवादीको श्रीपेच लगाउन पाइएकै छ', कांग्रेसप्रति संकेत गर्दै उनले भने, 'कानुन र संविधान कम्युनिस्टलाई मात्रै लाग्छ।'
उनले कानुन, प्रणाली र नियमावलीको अलगअलग व्याख्या हुन नसक्ने सम्झाए।
भट्टराईले आफूलाई कांग्रेसले संसदमा जे भयो त्यो गल्ती भयो भनेर आत्मालोचना गर्ला भन्ने लागे पनि त्यसो नभएको बताए। 'तर भोलिपल्ट आएर झन् रिसाएको बिरालोले खाँबो चिथोरेको ढंगले पो यहाँ प्रस्तुत हुन थाल्नुभयो', उनले भने।
कांग्रेसलाई आफ्ना यस्ता गतिविधिप्रति पुनर्विचार गर्न उनले सुझाए।
प्रतिपक्षी दलका नेता शेरबहादुर देउवाले बेलायतमा बसेर पनि संसदीय परम्परा नसिकेको भट्टराईको आरोप थियो। बेलायतमा पढेको भन्ने सुनेको र त्यहाँको सभ्यता सिकेको भन्ने आफूले ठाने पनि त्यस्तो नपाएको उनको भनाइ थियो।
'बेलायतको संसदीय अभ्यास उहाँले धेरै बुझ्नुभयो होला भन्ने मैले ठानेको थिएँ', उनले भने, 'सायद विश्वविद्यालयतिर धेरै जानुपर्ने भएकाले होला बेलायतको संसदतिर जान उहाँलाई फुर्सद भएनछ।'
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।